Read Papantla Totonac Deuteronomio 21 Bible Online

Deuteronomio 21 - Papantla Totonac bible

Deuteronomio 21

¹"Si hana un homber mata tira abou den kunuku habri na e tera ku SENOR bo Dios ta dunabo pa bo podera di dje, i nan no sa ta ken a mat'e,

²e ora ei bo ansianonan i bo huesnan lo sali bai i midi e distansia te na e statnan ku ta keda ront di e homber ku a wordu mata.

³I lo t'asina ku e stat ku ta keda mas serka di e homber mata, esta, e ansianonan di e stat ei, lo kohe for di e kria di baka un bishe muhe ku nunka no a wordu uza pa trabou i ku nunka no a karga yugo;

⁴i e ansianonan di e stat ei lo hiba e bishe muhe den un vaye kaminda tin awa ta kore i ku nunka nan no a plug of sembra, i kibra nek di e bishe muhe ayanan den e vaye.

⁵E ora ei e saserdotenan, e yu hombernan di Levi, lo yega serka, pasobra SENOR bo Dios a skohe nan pa sirbié i pa bendishona den e nomber di SENOR; i tur pleitu i tur asalto lo keda regla dor di nan.

⁶I tur e ansianonan di e stat ei, ku ta keda mas serka di e homber mata, lo laba nan man riba e bishe muhe ku nan a kibra su nek den e vaye;

⁷i nan lo kontesta i bisa: 'Nos mannan no a drama e sanger aki, ni nos wowonan no a mira.

⁸Pordona Bo pueblo Israel ku Bo a redimi, O SENOR, i no pone kulpa di sanger inosente meimei di Bo pueblo Israel.' I nan lo ta pordona di e kulpa di sanger.

⁹Asina lo bo kita e kulpa di sanger inosente for di meimei di boso, ora bo hasi loke ta korekto den bista di SENOR.

¹⁰"Ora bo sali pa bringa kontra bo enemigunan i SENOR bo Dios entrega nan den bo man, i bo hiba nan komo katibu,

¹¹i bo mira entre e katibunan un muhe bunita, i bo ta dese'e i kier tum'e komo bo esposa,

¹²e ora ei tum'e den bo kas, i lagu'e feita su kabes i korta su hunanan,

¹³i kita e bisti di su koutiverio. I despues ku el a keda den bo kas i a yora su tata i su mama henter un luna, bo mag drumi kune i bira su esposo, i e lo ta bo esposa.

¹⁴I si e no ta agradabo, e ora ei bo mester lagu'e bai kaminda ku e kier; ma siertamente bo no mester bend'e pa plaka, ni maltrat'e, pasobra bo a umiy'e.

¹⁵"Si un homber tin dos esposa, esun stima i e otro no-stima, i nan tur dos, esun stima i esun no-stima, a hana yu hombernan p'e, i si e yu homber primogenito ta di esun no-stima,

¹⁶e ora ei riba e dia ku e hasi su yu hombernan ereda loke ku e tin, e no mag hasi yu homber di esun stima primogenito na luga di yu homber di esun no-stima, ku ta e primogenito.

¹⁷Ma e mester rekonose e primogenito, yu homber di esun no-stima, dor di dun'e un porshon dobel di tur loke ku e tin, pasobra e ta e prinsipio di su vigor; ta na dje e derecho di primogenitura ta pertenese.

¹⁸"Si un homber tin un yu homber kabesura i rebelde ku no kier obedese su tata ni su mama, i ora nan kastigu'e, e no kier skucha nan,

¹⁹e ora ei su tata i su mama lo gar'e hib'e pa e ansianonan di su stat, na porta di e stat kaminda e ta biba.

²⁰I nan lo bisa e ansianonan di su stat: 'E yu homber di nos aki ta kabesura i rebelde; e no kier obedese nos; e ta un golos i un burache.'

²¹E ora ei tur e hombernan di su stat lo piedr'e te ora ku e muri; asina bo mester kita e maldat for di meimei di boso, i henter Israel lo tende di esaki i tin temor.

²²"I si un homber a komete un pika digno di morto i e wordu mata, i boso kologu'e na un palu,

²³e ora ei su kurpa no mester keda kologa henter anochi na e palu, ma siguramente bo mester der'e riba e mesun dia (pasobra esun ku wordu kologa ta maldishona di Dios), pa bo no kontamina e tera ku SENOR bo Dios ta dunabo komo erensia.