Read Papantla Totonac Deuteronomio 22 Bible Online

Deuteronomio 22 - Papantla Totonac bible

Deuteronomio 22

¹"Si bo mira ku buey of karne di bo paisano a perde kaminda, no keda sin paga atenshon na nan; sigur-sigur bo mester hiba nan bek pa bo paisano.

²I si bo paisano no ta biba pega ku bo, of si bo no sa ken e ta, e ora ei bo mester hib'e na bo mes kas i lagu'e keda serka bo te ora bo paisano bin busk'e; i e ora ei debolb'e na dje.

³I asina bo mester hasi ku su buriku i ku su pana di bisti, i bo mester hasi meskos ku kiko ku bo paisano a perde, ku el a perde i abo a hana. Bo no mag nenga bo yudansa.

⁴"Si bo mira ku buriku di bo paisano of su buey a kai abou riba kaminda, no keda sin paga atenshon na nan; sigur-sigur bo mester yud'e lanta nan.

⁵"Hende muhe no mester bisti pana di homber, ni hende homber no mester bisti pana di muhe; pasobra ken ku hasi e kosnan aki ta un abominashon na SENOR bo Dios.

⁶"Si sosode ku riba kaminda bo hana un neishi di parha den kualke palu of riba suela, ku yu of webu aden, i ku e mama drum! riba e yunan of riba e webunan, no kohe e mama huntu ku e yunan;

⁷sigur-sigur bo mester laga e mama bai, ma e yunan bo por tuma pa bo, pa bai bon ku bo i pa bo tin bida largu.

⁸"Ora bo traha un kas nobo, traha un rant na bo dak, pa bo no trese kulpa di sanger riba bo kas, si un hende kai for di dje.

⁹"No sembra bo kunuku di wendruif ku dos sorto di simia, pa henter e kosecha di e simia ku bo a sembra i e produkshon di e kunuku di wendruif no dana.

¹⁰"No plug ku un buey i un buriku huntu.

¹¹"No bisti pana di un tela ku ta un meskla di lana i lino.

¹²"Traha frana na e kuater puntanan di bo pana ku bo ta tapa bo kurpa kune.

¹³"Si un homber tuma un esposa i drumi kune, anto desgusta di dje,

¹⁴i akus'e di echonan bergonsoso, i publikamente lanta testimonio falsu kontra dje, i bisa: 'Mi a tuma e muhe aki, ma ora mi a aserk'e, mi a hana ku e no ta birgen,'

¹⁵e ora ei tata i mama di e mucha muhe mester kohe e prueba di birginidat di e mucha muhe hiba pa e ansianonan di e stat na porta di e stat.

¹⁶Anto tata di e mucha muhe lo bisa e ansianonan: 'Mi a duna mi yu muhe na e homber aki pa esposa, ma el a desgusta di dje;

¹⁷i mira, el a akus'e di echonan bergonsoso, bisando: "Mi no a hana ku bo yu muhe ta birgen." Ma esaki ta e prueba di mi yu muhe su birginidat!' Anto nan lo habri e pana dilanti di e ansianonan di e stat.

¹⁸Asina e ansianonan di e stat ei mester kohe e homber i kastigu'e,

¹⁹i nan lo dun'e un but di shen pida plata i duna esaki na e mucha muhe su tata, pasobra publikamente el a dana nomber di un birgen di Israel. I e mucha muhe lo keda su esposa; pa restu di su bida e homber no por diborsi'e.

²⁰"Ma si e akusashon aki ta berdat, ku e mucha muhe no tabata birgen,

²¹e ora ei nan lo saka e mucha muhe hiba na entrada di kas di su tata, i e hombernan di su stat lo piedr'e te ora ku e muri, pasobra el a komete un echo bergonsoso na Israel, dor di komete fornikashon den e kas di su tata; asina bo mester kita e maldat for di meimei di boso.

²²"Si hana un homber ta drumi ku un muhe kasa, e ora ei nan tur dos mester muri, tantu e homber ku a drumi ku e muhe komo e muhe; asina bo mester kita e maldat for di Israel.

²³"Si tin un mucha muhe ku ta birgen, ku ta komprometi ku un homber, i un otro homber han'e den stat i drumi kune,

²⁴e ora ei boso lo saka tur dos hiba na porta di e stat ei i piedra nan mata; e mucha muhe, pasobra e no a grita pa yudansa den e stat, i e homber, pasobra el a viola esposa di su prohimo. Asina bo mester kita e maldat for di meimei di boso.

²⁵"Ma si ta den kunuku e homber hana e mucha muhe ku ta komprometi, i e homber viol'e, e ora ei solamente e homber ku a hasi esaki lo muri.

²⁶Ma bo no mester hasi e mucha muhe nada; e mucha muhe no a hasi pika ku merese morto, pasobra e kaso aki ta meskos ku esun di un homber ku ta lanta kontra su prohimo i ta mat'e.

²⁷Ora ku el a han'e den kunuku, e mucha muhe komprometi a grita, ma no tabatin ningun hende pa salb'e.

²⁸"Si un homber hana un mucha muhe ku ta birgen, ku no ta komprometi, i e gara e mucha muhe i drumi kune, i nan wordu deskubri,

²⁹e ora ei e homber ku a drumi kune mester duna tata di e mucha muhe sinkuenta pida plata, i e mester bira su esposa, pasobra el a viol'e; pa restu di su bida e homber no por diborsi'e.

³⁰"Un homber no mag tuma esposa di su tata, pa e no profana kama di su tata.