Read Papantla Totonac Deuteronomio 23 Bible Online

Deuteronomio 23 - Papantla Totonac bible

Deuteronomio 23

¹"Ningun homber ku ta herida na su testikulonan of ku su organo maskulino ta korta afo, no mag drenta e asamblea di SENOR.

²"Ningun hende ku ta yu djafo no mag drenta e asamblea di SENOR; ningun di su desendientenan, ni te na e di dies generashon, no mag drenta e asamblea di SENOR.

³"Ningun amonita ni moabita no mag drenta e asamblea di SENOR; ningun di nan desendientenan, ni te na e di dies generashon, no mag drenta e asamblea di SENOR,

⁴pasobra nan no a bin pa kontra ku boso ku pan i awa na kaminda, ora boso a sali for di Egipto, i pasobra nan a kontrata Balaam, yu homber di Beor for di Petor na Mesopotamia, pa maldishonabo.

⁵Sinembargo, SENOR bo Dios no tabata kier a skucha Balaam, ma SENOR bo Dios a kambia e maldishon den un bendishon pa bo, pasobra SENOR bo Dios ta stimabo.

⁶Nunka lo bo no buska pas ni prosperidat pa nan durante di henter bo bida.

⁷"No aborese un edomita, pasobra ta bo ruman e ta; no aborese un egipsio, pasobra bo tabata un stranhero na su tera.

⁸E yu hombernan ku nase pa nan den e di tres generashon mag drenta e asamblea di SENOR.

⁹"Ora bo sali bai komo un ehersito kontra bo enemigunan, warda bo mes di tur kos malu.

¹⁰Si tin meimei di boso un homber ku ta impuru pa motibu di un emishon nokturno, e ora ei e mester sali pafo di e kampamentu i no bolbe drenta e kampamentu.

¹¹Ma ora nochi ta bai sera e mester bana su kurpa ku awa, i ora solo baha e por bolbe drenta e kampamentu.

¹²"Tambe bo mester tin un luga pafo di e kampamentu pa bo sali bai ayanan,

¹³i bo mester tin un skop den bo ekipahe, i ora bo sinta pafo pa hasi bo nesesidat, bo mester koba un buraku kune i tapa bo sushi.

¹⁴Komo ku SENOR bo Dios ta kana meimei di bo kampamentu pa librabo i pa derota bo enemigunan bo dilanti, pesei bo kampamentu mester ta santu, pa E no mira nada indesente den bo i bira bai for di bo.

¹⁵"No entrega na su shon un esklabu ku a hui bai for di su shon bin serka bo.

¹⁶E por biba meimei di bo, na e luga ku e lo skohe den un di bo statnan, kaminda ta agrad'e; no maltrat'e.

¹⁷"No mag tin prostituta den e yu muhenan di Israel; ni no mag tin sodomita den e yu hombernan di Israel.

¹⁸Bo no mag trese pago di un prostituta ni plaka di un sodomita den e kas di SENOR bo Dios pa ningun ofrenda di promesa, pasobra esakinan tur dos ta abominashon na SENOR bo Dios.

¹⁹"No eksigi interes for di bo paisano: ni interes riba plaka ni riba komestibel, ni riba nada ku por wordu fia ku interes.

²⁰Bo mag eksigi interes for di un stranhero, ma no for di bo paisano, pa SENOR bo Dios bendishonabo den tur loke bo ta hasi na e tera ku bo ta bai drenta pa podera di dje.

²¹"Ora bo hasi un promesa na SENOR bo Dios, no tarda pa kumpli kune, pasobra esaki lo ta pika den bo, i siguramente SENOR bo Dios lo eksigi esaki for di bo.

²²Sinembargo, si bo keda sin hasi promesa, esei lo no ta pika den bo.

²³Perkura di warda i kumpli ku loke ta sali for di bo boka, meskos ku bo a priminti boluntariamente na SENOR bo Dios loke bo a papia ku bo boka.

²⁴"Ora bo drenta kunuku di wendruif di bo prohimo, bo por kome wendruif te ora bo ta kompletamente satisfecho, ma no pone nada den bo makutu.

²⁵Ora bo drenta den kunuku di mainshi di bo prohimo, bo por kita algun tapushi ku bo man, ma no zwai ku sikkel den e mainshi di bo prohimo.