Read Papantla Totonac Deuteronomio 24 Bible Online

Deuteronomio 24 - Papantla Totonac bible

Deuteronomio 24

¹"Ora ku un homber tuma un esposa i kasa kune, i sosode ku e esposa no ta agrad'e, pasobra el a hana algu indesente den dje, i e skirbie un karta di diborsio i entrega esaki den su man i mand'e bai for di su kas,

²i e muhe sali for di su kas i bai i bira esposa di otro homber,

³i e ultimo esposo aki abores'e i skirbie un karta di diborsio, i entrega e karta den man di e muhe i mand'e bai for di su kas, of e ultimo esposo, ku a tum'e pa su esposa, muri,

⁴e ora ei su prome esposo, ku a mand'e bai, no mag bolbe tum'e pa ta su esposa, komo ku el a wordu hasi impuru; pasobra esei ta un abominashon dilanti di SENOR, i bo no mester trese pika riba e tera ku SENOR bo Dios ta dunabo komo erensia.

⁵"Ora ku un homber ta resien kasa, e no mester sali bai guera, ni wordu enkarga ku ningun obligashon; e mester ta liber na kas pa un ana i duna felisidat na e esposa ku el a tuma.

⁶"Ningun hende no mag tuma un mulina di man of e piedra di mulina di mas ariba komo garantia, pasobra ta un bida e ta tuma komo garantia.

⁷"Si un hende wordu hana ta sekuestra un di su paisanonan for di e yunan di Israel, i e maltrat'e of bend'e, e ladron ei mester muri; bo mester kita e maldat for di meimei di bo.

⁸"Den kaso di plaga di lepra, perkura di opserva i hasi eksaktamente konforme tur loke e saserdotenan levita ta sina boso; manera mi a ordena nan, asina boso mester perkura di hasi.

⁹Korda kiko SENOR bo Dios a hasi ku Miriam na kaminda, ora boso a sali for di Egipto.

¹⁰"Ora bo fia bo prohimo kualke kos, no drenta su kas pa tuma su garantia.

¹¹Keda pafo, i laga e homber, na kende bo a fia, trese e garantia pafo pa bo.

¹²I si e ta un homber pober, no bai drumi ku su garantia den bo poder.

¹³Sin falta bo mester debolb'e e garantia ora solo ta baha, pa e por drumi den su mantel i bendishonabo; i esaki lo ta hustisia pa bo dilanti di SENOR bo Dios.

¹⁴"No oprimi un sirbido kontrata ku ta pober i den nesesidat, sea ku e ta un di bo paisanonan of un di e stranheronan ku ta biba na bo tera den bo statnan.

¹⁵Dun'e su sueldo riba mesun dia, prome ku solo baha, pasobra e ta pober i ta konta kune, pa e no sklama na SENOR kontra bo i esaki bira pika den bo.

¹⁶"Tatanan no mester wordu mata pa motibu di nan yu hombernan, ni yu hombernan no mester wordu mata pa motibu di nan tatanan; kada un mester wordu mata pa su mes pika.

¹⁷"No trose e hustisia ku un stranhero of werfano tin derecho riba dje, ni tuma bisti di un biuda komo garantia.

¹⁸Korda ku bo tabata esklabu na Egipto, i ku SENOR bo Dios a redimibo for di einan; pesei mi ta ordenabo hasi e kos aki.

¹⁹"Ora bo ta rekohe bo kosecha den bo kunuku i a lubida un bohi den kunuku, no bai bek pa koh'e; laga esaki keda pa e stranhero, pa e werfano i pa e biuda, pa SENOR bo Dios por bendishonabo den tur e trabou di bo mannan.

²⁰Ora bo sakudi bo palu di oleifi, no bolbe repasa e ramanan; laga esaki keda pa e stranhero, pa e werfano i pa e biuda.

²¹Ora bo piki wendruif di bo kunuku di wendruif, no bolbe repas'e; laga esaki keda pa e stranhero, pa e werfano i pa e biuda.

²²I korda ku bo tabata esklabu na tera di Egipto; pesei mi ta ordenabo hasi e kos aki.