Read Papantla Totonac Deuteronomio 25 Bible Online

Deuteronomio 25 - Papantla Totonac bible

Deuteronomio 25

¹"Ora hombernan tin un pleitu ku otro i nan bai korte i e huesnan huzga nan kaso, i nan hustifika e hustu i kondena e malbado,

²e ora ei, si e homber malbado merese sota, e hues mester lagu'e kai drumi abou i laga sut'e den su presensia ku e kantidat di sota di akuerdo ku su kulpa.

³E mag dun'e kuarenta sota, ma no mas, pa e no dun'e muchu mas sota ku esakinan i bo ruman wordu rebaha den bo bista.

⁴"No bisti buey bosal ora ku e ta trapa mainshi.

⁵"Ora ruman hombernan ta biba huntu i un di nan muri sin laga yu homber, esposa di e defunto no mag kasa pafo di e famia ku un homber stranhero. Ruman homber di su esposo mester drumi kune i tum'e komo esposa i kumpli ku e deber di ruman homber di un esposo p'e.

⁶I lo t'asina ku e primogenito ku e duna lus na dje lo karga nomber di su ruman homber defunto, pa su nomber no wordu kita for di Israel.

⁷"Ma si e homber no ta desea di tuma esposa di su ruman, e ora ei esposa di su ruman mester bai na porta di stat serka e ansianonan i bisa: 'Ruman homber di mi esposo ta nenga di stablese un nomber pa su ruman homber na Israel; e no kier kumpli ku e deber di ruman homber di un esposo pa mi.'

⁸E ora ei e ansianonan di su stat mester manda yam'e i papia kune. I si e persist! i bisa: 'Mi no ta desea di tum'e,'

⁹e ora ei esposa di su ruman mester aserk'e den bista di e ansianonan, i kita sandalia di e homber for di su pia i skupi den su kara; i e muhe mester deklara: 'Asina ta hasi ku e homber ku no ta edifika kas di su ruman.'

¹⁰I na Israel nan lo dun'e e nomber: 'Kas di esun ku su sandalia a wordu kita.'

¹¹"Si dos homber, un homber i su paisano, bringa ku otro, i esposa di esun yega serka pa libra su esposo for di man di esun ku ta dal e, i e esposa saka su man i gara su partinan priva,

¹²e ora ei bo mester korta su man afo; no tene duele di dje.

¹³"Bo no mester tin den bo saku diferente sorto di peso, un grandi i un chikitu.

¹⁴Bo no mester tin den bo kas diferente sorto di midi, un grandi i un chikitu.

¹⁵Bo mester tin peso eksakto i hustu; bo mester tin un midi eksakto i hustu, pa bo dianan wordu prolonga na e tera ku SENOR bo Dios ta dunabo.

¹⁶Pasobra ken ku hasi e kosnan aki, ken ku aktua inhustu, ta un abominashon na SENOR bo Dios.

¹⁷"Korda kiko Amalek a hasi ku bo na kaminda, tempu ku bo a sali for di Egipto,

¹⁸kon el a topabo na kaminda i a ataka tur e debilnan ku a keda bo tras, ora bo tabata morcha i morto kansa; i e no tabatin temor di Dios.

¹⁹Pesei lo sosode ku ora SENOR bo Dios dunabo sosiegu for di tur bo enemigunan ront di bo, na e tera ku SENOR bo Dios ta dunabo komo erensia pa bo podera di dje, bo mester kita e rekuerdo di Amalek for di bou di shelu; no lubida esaki!