Read Papantla Totonac Deuteronomio 26 Bible Online

Deuteronomio 26 - Papantla Totonac bible

Deuteronomio 26

¹"Anto lo t'asina ku ora bo drenta e tera ku SENOR bo Dios ta dunabo komo erensia, i bo podera di dje i biba den dje,

²bo mester kohe algun di e prome frutanan di henter e kosecha di e tera, ku bo ta rekohe for di e tera ku SENOR bo Dios ta dunabo, i pone esaki den makutu i bai na e luga ku SENOR bo Dios ta skohe pa stablese Su nomber.

³I bo mester bai serka e saserdote ku ta sirbi den e dianan ei i bis'e: 'Awe mi ta deklara na SENOR mi Dios ku mi a drenta e tera ku SENOR a hura na nos tatanan di duna nos.'

⁴E ora ei e saserdote mester tuma e makutu for di bo man pon'e dilanti di e altar di SENOR bo Dios.

⁵I bo mester kontesta i bisa dilanti di SENOR bo Dios: 'Mi tata tabata un arameo ku tabata na punto di perese, i el a bai Egipto i a keda biba ayanan pa un tempu, ku poko hende; ma ayanan el a bira un nashon grandi, poderoso i numeroso.

⁶I e egipsionan a maltrata nos i a afligi nos i a pone trabou pisa riba nos.

⁷E ora ei nos a sklama na SENOR, e Dios di nos tatanan, i SENOR a tende nos bos i a mira nos aflikshon, nos trabou pisa i nos opreshon;

⁸i SENOR a saka nos for di Egipto ku un man poderoso i un brasa ekstendi, ku gran teror, i ku senalnan i maraviyanan;

⁹i El a trese nos na e luga aki i a duna nos e tera aki, un tera ku tin lechi i miel na abundansia.

¹⁰I awor, mira, mi a trese e prome frutanan di e kosecha di e tera ku Abo, O SENOR, a dunami.' Anto bo mester pon'e dilanti di SENOR bo Dios i adora dilanti di SENOR bo Dios;

¹¹i abo, e levita i e stranhero ku ta biba meimei di bo lo regosiha den tur kos bon ku SENOR bo Dios a duna abo i bo kas.

¹²"Ora bo a kaba di paga henter e diesmo di bo produkshon den e di tres ana, e ana di paga diesmo, e ora ei bo mester duna e levita, e stranhero, e werfano i e biuda esaki, pa nan kome den bo statnan i keda satisfecho.

¹³I bo mester bisa dilanti di SENOR bo Dios: 'Mi a saka e porshon sagrado for di mi kas, i tambe a duna e levita, e stranhero, e werfano i e biuda esaki, konforme tur Bo mandamentunan ku Bo a ordenami; mi no a transgresa ni lubida ningun di Bo mandamentunan.

¹⁴Mi no a kome di dje mientras ku mi tabata na rou, ni mi no a kita nada di dje mientras ku mi tabata impuru, ni a ofrese nada di dje na e mortonan. Mi a skucha e bos di SENOR mi Dios; mi a hasi konforme tur loke Bo a ordenami.

¹⁵Wak abou for di Bo habitashon santu, for di shelu, i bendishona Bo pueblo Israel i e tera ku Bo a duna nos, un tera ku tin lechi i miel na abundansia, manera Bo a hura na nos tatanan.'

¹⁶"Riba e dia aki SENOR bo Dios ta ordenabo pa kumpli ku e statutonan i ordenansanan aki. Pesei, perkura di kumpli ku nan ku henter bo kurason i ku henter bo alma.

¹⁷Awe bo a deklara ku SENOR ta bo Dios i ku lo bo kana den Su kamindanan i warda Su statutonan, Su mandamentunan i Su ordenansanan, i ku lo bo skucha Su bos.

¹⁸I SENOR a deklara awe na bo ku lo bo ta Su pueblo pekuliar, manera El a primintibo, i ku bo mester warda tur Su mandamentunan;

¹⁹i ku E lo halsabo riba tur nashon ku El a traha, pa alabansa, fama i onor; i ku lo bo ta un pueblo konsagra na SENOR bo Dios, manera El a bisa."