Read Papantla Totonac Deuteronomio 27 Bible Online

Deuteronomio 27 - Papantla Totonac bible

Deuteronomio 27

¹E ora ei Moises i e ansianonan di Israel a ordena e pueblo, bisando: "Warda tur e mandamentunan ku mi ta ordena boso awe.

²I lo t'asina ku riba e dia ku bo ta krusa Jordan pa bai na e tera ku SENOR bo Dios ta dunabo, bo mester lanta pa bo mes piedranan grandi, i hunta nan ku kalki

³i skirbi riba nan tur e palabranan di e lei aki, ora bo ta krusa pasa pa drenta e tera ku SENOR bo Dios ta dunabo, un tera ku tin lechi i miel na abundansia, manera SENOR, e Dios di bo tatanan, a primintibo.

⁴Asina lo ta ku ora bo ta krusa Jordan, bo mester lanta e piedranan aki riba Seru Ebal, manera mi ta ordena boso awe, i hunta nan ku kalki.

⁵Ademas, ayanan bo mester traha un altar pa SENOR bo Dios, un altar di piedra; bo no mester traha ku herment di heru riba nan.

⁶Traha e altar di SENOR bo Dios di piedra ku no a wordu gekap, i ofrese riba dje ofrendanan kima na SENOR bo Dios;

⁷i ofrese ofrendanan di pas i kome ayanan, i regosiha dilanti di SENOR bo Dios.

⁸I riba e piedranan bo mester skirbi kla-kla tur e palabranan di e lei aki."

⁹E ora ei Moises i e saserdotenan levitiko a papia ku henter Israel, bisando: "Keda ketu i skucha, O Israel! Awe bo a bira un pueblo di SENOR bo Dios.

¹⁰Pesei, obedese SENOR bo Dios, i kumpli ku Su mandamentunan i Su statutonan ku mi ta ordenabo awe."

¹¹Tambe Moises a ordena e pueblo e dia ei, bisando:

¹²"Ora bo ta krusa Jordan, esakinan mester para riba Seru Gerizim pa bendishona e pueblo: Simeon, Levi, Juda, Isakar, Jose, i Benjamin.

¹³I pa maldishona, esakinan mester para riba Seru Ebal: Ruben, Gad, Aser, Zabulon, Dan i Neftali.

¹⁴"E ora ei e levitanan mester kontesta i bisa tur e hombernan di Israel na bos haltu:

¹⁵'Maldishona ta e homber ku traha un idolo of un imagen basha, un abominashon na SENOR, e trabou di e mannan di un homber di ofishi, i lanta esaki na skondi.' I henter e pueblo mester kontesta i bisa: 'Amen.'

¹⁶'Maldishona ta esun ku desonra su tata of su mama.' I henter e pueblo mester bisa: 'Amen.'

¹⁷'Maldishona ta esun ku hala e piedra ku ta marka tereno di su prohimo.' I henter e pueblo mester bisa: 'Amen.'

¹⁸'Maldishona ta esun ku hasi un siegu desvia for di kaminda.' I henter e pueblo mester bisa: 'Amen.'

¹⁹'Maldishona ta esun ku trose e hustisia ku un stranhero, werfano i biuda tin derecho riba dje.' I henter e pueblo mester bisa: 'Amen.'

²⁰'Maldishona ta esun ku drumi ku esposa di su tata, pasobra el a profana kama di su tata.' I henter e pueblo mester bisa: 'Amen.'

²¹'Maldishona ta esun ku tin relashon seksual ku un bestia.' I henter e pueblo mester bisa: 'Amen.'

²²'Maldishona ta esun ku drumi ku su ruman muhe, yu muhe di su tata of di su mama.' I henter e pueblo mester bisa: 'Amen.'

²³'Maldishona ta esun ku drumi ku su suegra.' I henter e pueblo mester bisa: 'Amen.'

²⁴'Maldishona ta esun ku mata su prohimo na skondi.' I henter e pueblo mester bisa: 'Amen.'

²⁵'Maldishona ta esun ku asepta plaka pasa bou di mesa pa mata un persona inosente.' I henter e pueblo mester bisa: 'Amen.'

²⁶'Maldishona ta esun ku no konfirma e palabranan di e lei aki pa kumpli ku nan.' I henter e pueblo mester bisa: 'Amen.'