Read Papantla Totonac Deuteronomio 28 Bible Online

Deuteronomio 28 - Papantla Totonac bible

Deuteronomio 28

¹"Awor lo sosode ku si bo obedese ku tur diligensia SENOR bo Dios, i perkura di kumpli ku tur Su mandamentunan ku mi ta ordenabo awe, SENOR bo Dios lo halsabo riba tur e nashonnan di mundu.

²I tur e bendishonnan aki lo bin riba bo i lo alkansabo, si bo obedese SENOR bo Dios.

³"Bendishona lo bo ta den stat, i bendishona lo bo ta den kunuku.

⁴"Bendishona lo ta e fruta di bo barika, e kosecha di bo tera, i e yunan di bo bestianan, e oumento di bo kria di baka i e lamchinan di bo tou di karne.

⁵"Bendishona lo ta bo makutu i bo komchi-pa-traha-mansa.

⁶"Bendishona lo bo ta ora bo drenta, i bendishona lo bo ta ora bo sali.

⁷"SENOR lo hasi ku bo enemigunan ku lanta kontra bo ta keda derota bo dilanti; nan lo sali bin kontra bo for di un direkshon i lo hui pa bo den shete direkshon.

⁸"SENOR lo ordena e bendishon riba bo den bo mangasinanan i riba tur loke bo pone bo man riba dje, i E lo bendishonabo na e tera ku SENOR bo Dios ta dunabo.

⁹"SENOR lo stablesebo komo un pueblo santu pa Su mes, manera El a hura na bo, si bo warda e mandamentunan di SENOR bo Dios, i kana den Su kamindanan.

¹⁰Asina tur e pueblonan di mundu lo mira ku bo ta wordu yama na e nomber di SENOR, i nan lo tin temor pa bo.

¹¹I SENOR lo hasibo abunda den prosperidat, den e fruta di bo barika, den e yunan di bo bestianan i den e kosecha di bo tera, na e tera ku SENOR a hura na bo tatanan pa dunabo.

¹²"SENOR lo habri Su bon deposito, e shelunan, pa bo, pa duna awaseru na bo tera na su tempu i pa bendishona henter e trabou di bo mannan; i abo lo fia na hopi nashon, ma abo si lo no pidi fiansa.

¹³I SENOR lo hasibo e kabes i no e rabu, i lo bo ta solamente ariba i lo bo no ta abou, si bo skucha e mandamentunan di SENOR bo Dios, ku mi ta ordenabo awe, pa perkura di kumpli ku nan,

¹⁴i no bira bai for di ningun di e palabranan ku mi ta ordenabo awe, ni na man drechi ni na man robes, pa bai tras di otro diosnan pa sirbi nan.

¹⁵"Ma lo sosode ku si bo no obedese SENOR bo Dios pa perkura di kumpli ku tur Su mandamentunan i Su statutonan ku mi ta ordenabo awe, e ora ei tur e maldishonnan aki lo bin riba bo i alkansabo.

¹⁶"Maldishona lo bo ta den stat i maldishona lo bo ta den kunuku.

¹⁷"Maldishona lo ta bo makutu i bo komchi-pa-traha-mansa.

¹⁸"Maldishona lo ta e fruta di bo barika i e kosecha di bo tera, e oumento di bo kria di baka i e lamchinan di bo tou di karne.

¹⁹"Maldishona lo bo ta ora bo ta drenta, i maldishona lo bo ta ora bo ta sali.

²⁰"SENOR lo manda maldishonnan, konfushon i reprenshon riba bo den tur loke bo pone bo man pa hasi, te ora bo keda destrui i te ora bo perese rapidamente, pa motibu di e maldat di bo obranan, pasobra bo a bandonaMi.

²¹SENOR lo hasi pest pega na bo te ora ku El a kaba ku bo for di riba e tera ku bo ta bai drenta pa podera di dje.

²²SENOR lo afligibo ku tuberkulosis, keintura, inflamashon, kimamentu, spada, pispis i beskem, i nan lo persiguibo te ora bo perese.

²³I e shelu ku ta riba bo kabes lo ta di brons, i e tera ku ta bou di bo, di heru.

²⁴SENOR lo hasi e awaseru di bo tera bira puiru i stof; for di shelu esaki lo baha riba bo te ora bo keda destrui.

²⁵"SENOR lo hasibo keda derota dilanti di bo enemigunan; lo bo sali bai kontra nan for di un direkshon, ma lo bo hui pa nan den shete direkshon, i lo bo ta un ehempel di teror pa tur e reinonan di tera.

²⁶I boso kadavernan lo ta kuminda pa tur parha di shelu i pa e bestianan di tera, sin ku tin un hende pa spanta nan.

²⁷SENOR lo afligibo ku e blufeinnan di Egipto i ku tumor, ku sarna i ku grawatashi, di kualnan bo no por wordu kura.

²⁸SENOR lo afligibo ku lokura, ku sieguedat i ku paniko den bo kurason;

²⁹i merdia lo bo kana fula manera un hende siegu ta kana fula den skuridat, i lo bo no prospera den bo kamindanan; ma lo bo wordu oprimi i roba kontinuamente, sin ku tin un hende pa salbabo.

³⁰"Lo bo ta komprometi ku un muhe, ma un otro homber lo viol'e; lo bo traha un kas, ma lo bo no biba aden; lo bo planta un kunuku di wendruif, ma lo bo no disfruta di dje.

³¹Bo buey lo wordu mata dilanti di bo bista, ma lo bo no kome di dje; bo buriku lo wordu ranka for di bo i lo no wordu debolbi na bo; bo karnenan lo wordu duna na bo enemigunan, i lo bo no tin ningun hende pa reskata nan.

³²Bo yu hombernan i bo yu muhenan lo wordu duna na otro pueblo, mientras ku bo ta mira esaki ku bo mes wowo i ta anhela na nan kontinuamente, sin ku bo por hasi nada.

³³Un pueblo ku bo no konose lo kome e kosecha di bo tera i tur loke bo a traha duru p'e, i lo bo wordu solamente oprimi i trapa kontinuamente.

³⁴I loke bo wowo ta mira lo hasibo bira loko.

³⁵SENOR lo sutabo na bo rudia i na bo pia ku yaga maligno, di kual bo no por wordu kura, for di bo plant'i pia te na bo korona di kabes.

³⁶"SENOR lo hiba abo i bo rei, ku lo bo pone riba bo, na un nashon ku ni abo ni bo tatanan no a konose, i ayanan lo bo sirbi otro diosnan, palu i piedra.

³⁷I lo bo bira un horor, un proverbio i un refran di bofon meimei di henter e pueblo na unda SENOR lo mandabo bai.

³⁸"Lo bo hiba hopi simia na kunuku, ma lo bo rekohe masha poko, pasobra tirakochi lo kaba kune.

³⁹Lo bo planta i kultiva kunukunan di wendruif, ma lo bo no bebe di e bina ni piki e wendruifnan, pasobra bichi lo kome nan.

⁴⁰Lo bo tin palu di oleifi den henter bo teritorio, ma lo bo no hunta bo mes ku e zeta, pasobra bo oleifinan lo kai abou.

⁴¹Lo bo hana yu homber i yu muhe, ma nan lo no ta di bo, pasobra nan lo bai den koutiverio.

⁴²Tirakochi lo podera di tur bo palunan i di e kosecha di bo tera.

⁴³"E stranhero ku ta meimei di bo lo lanta mas i mas haltu riba bo, ma abo lo baha mas i mas abou.

⁴⁴E lo fiabo, ma abo lo no fi'e; e lo ta e kabes i abo lo ta e rabu.

⁴⁵"Asina tur e maldishonnan aki lo bin riba bo i persiguibo i alkansabo te ora bo keda destrui, pasobra bo no kier a obedese SENOR bo Dios dor di warda Su mandamentunan i Su statutonan ku El a ordenabo.

⁴⁶I nan lo bira un senal i un maraviya riba abo i bo desendientenan pa semper.

⁴⁷Pasobra bo no a sirbi SENOR bo Dios ku goso i ku un kurason kontentu, pa e abundansia di tur kos,

⁴⁸pesei lo bo sirbi bo enemigunan ku SENOR lo manda kontra bo, ku hamber, ku set, den desnudes, i ku falta di tur kos; i E lo pone un yugo di heru riba bo nek te ora ku El a destruibo.

⁴⁹"SENOR lo trese kontra bo un nashon for di leu, for di e fin di tera, ku ta baha lihe manera aguila, un nashon ku bo no ta komprende su lenga,

⁵⁰un nashon di aparensia kruel ku lo no tin respet pa e ansiano, ni ta mustra grasia na e hoben.

⁵¹Ademas, e lo kome e yunan di bo bestianan i e kosecha di bo tera te ora bo keda destrui; tampoko e no ta laga mainshi pa bo, ni bina nobo, ni zeta, ni e oumento di bo kria di baka, ni e lamchinan di bo tou di karne, te ora ku el a hasibo perese.

⁵²I e lo rondonabo den tur bo statnan te ora bo murayanan haltu i fortifika, den kualnan bo tabata konfia, bash'abou den henter bo tera, i e lo rondonabo den tur bo statnan den henter e tera ku SENOR bo Dios a dunabo.

⁵³"E ora ei lo bo kome e fruta di bo mes barika, e karni di bo yu hombernan i di bo yu muhenan ku SENOR bo Dios a dunabo, durante di e tempu ku bo ta wordu rondona i den e ansha ku bo enemigu lo oprimibo kune.

⁵⁴E homber meimei di boso ku ta masha fini i delikado lo mira su ruman homber i e esposa ku e ta stima i e restu di su yunan ku ta keda, ku mal wowo,

⁵⁵asina ku e lo no duna ni un di nan nada di e karni di su yunan ku e ta kome. Esaki lo ta tur ku a ked'e pa motibu di e sufrimentu ku bo enemigu lo afligibo kune durante di e tempu ku boso statnan ta keda rondona.

⁵⁶E muhe asina fini i delikado meimei di boso, ku di puru delikadesa i finura lo no a tribi pone su plant'i pia na suela, lo wak e esposo ku e ta stima i su yu homber i yu muhe, ku mal wowo,

⁵⁷pa no komparti ku nan su plasenta ku ta sali for di meimei di su pianan, i su yunan ku e ta hana, pasobra e lo kome nan na sekreto pa falta di algu otro, durante di e tempu ku e statnan ta keda rondona i durante di e angustia ku bo enemigu lo tormentabo kune den bo statnan.

⁵⁸"Si bo no perkura di kumpli ku tur e palabranan di e lei aki, kualnan ta para skirbi den e buki aki, pa teme e nomber onra i temibel aki, SENOR bo Dios,

⁵⁹e ora ei SENOR lo trese plaganan teribel riba bo i riba bo desendientenan, plaganan severo i permanente, i malesanan maligno i duradero.

⁶⁰I E lo bolbe trese riba bo tur e malesanan di Egipto ku bo tabatin miedu di dje, i nan lo pega na bo.

⁶¹Tambe tur malesa i tur plaga ku no ta para skirbi den e buki di e lei aki, SENOR lo trese riba bo te ora bo keda destrui.

⁶²E ora ei boso lo keda ku poko hende, siendo ku boso tabata un multitut, manera e streanan di shelu, pasobra boso no a obedese SENOR boso Dios.

⁶³I lo sosode ku meskos ku a agrada SENOR pa prospera boso i multiplika boso, asina lo agrada SENOR pa hasi boso perese i pa destrui boso; i boso lo wordu ranka for di e tera ku boso ta bai drenta pa podera di dje.

⁶⁴"Ademas, SENOR lo plamabo meimei di tur pueblo, for di esun fin di tera te na e otro fin di tera; i ayanan lo bo sirbi otro diosnan, palu i piedra, kualnan ni abo ni bo tatanan no a konose.

⁶⁵I meimei di e nashonnan ei lo bo no hana sosiegu, i lo no tin luga di sosiegu pa bo plant'i pia; ma ayanan SENOR lo dunabo un kurason ku ta tembla, wowo yen di heimwe i tristesa di alma.

⁶⁶Asina lo bo biba den insiguridat konstantemente; i lo bo ta den teror di dia i anochi, i lo bo no ta sigur di bo bida.

⁶⁷Mainta lo bo bisa: 'Mara tabata nochi!' I anochi lo bo bisa: 'Mara tabata mainta!' pa motibu di e teror ku ta terorisa bo kurason i pa e bista ku bo wowo lo mira.

⁶⁸I SENOR lo hibabo bek na Egipto den barku, pa e kaminda di kual mi a bisabo: 'Nunka mas lo bo mir'e!' I ayanan boso lo ofrese pa bende boso mes ku boso enemigunan komo esklabu homber i esklabu muhe, ma lo no tin kumprado."