Read Papantla Totonac Deuteronomio 29 Bible Online

Deuteronomio 29 - Papantla Totonac bible

Deuteronomio 29

¹Esakinan ta e palabranan di e aliansa ku SENOR a ordena Moises pa sera ku e yunan di Israel na tera di Moab, fuera di e aliansa ku El a sera ku nan na Horeb.

²I Moises a manda yama henter Israel i a bisa nan: "Boso a mira tur loke SENOR a hasi dilanti di boso bista na tera di Egipto, ku Farao i ku tur su sirbidonan i ku henter su tera:

³e pruebanan grandi ku boso wowo a mira, e senalnan i maraviyanan grandi ei.

⁴Sinembargo, te dia djawe SENOR no a duna boso un kurason pa komprende, ni wowo pa mira, ni orea pa tende.

⁵I Mi a guia boso kuarenta ana largu dor di desierto; boso pananan no a gasta na boso kurpa, ni boso sandalia no a gasta na boso pia.

⁶Boso no a kome pan, ni boso no a bebe bina ni bibida sterki, pa boso por sa ku ta Ami ta SENOR boso Dios.

⁷"Ora boso a yega na e luga aki, Sehon, rei di Hesbon, i Og, rei di Basan, a sali pa kontra nos pa bataya, ma nos a derota nan;

⁸i nos a tuma nan tera i a duna esaki komo erensia na e rubenitanan, e gaditanan i e mitar tribu di Manases.

⁹"Pesei, warda e palabranan di e aliansa aki pa kumpli ku nan, pa boso por prospera den tur loke boso ta hasi.

¹⁰Awe boso tur ta para dilanti di SENOR boso Dios: boso hefenan, boso tribunan, boso ansianonan i boso ofisialnan, tur homber di Israel,

¹¹boso yu chikitunan, boso esposanan i e stranhero ku ta biba den bo kampamentunan, for di esun ku ta kap palu pa bo te na esun ku ta saka awa pa bo,

¹²pa bo drenta e aliansa ku SENOR bo Dios, i den Su huramentu ku SENOR bo Dios ta hasi ku bo awe,

¹³pa E stablesebo awe komo Su pueblo i pa E por ta bo Dios, meskos ku El a papia ku bo i manera El a hura na bo tatanan, na Abraham, Isaak i Jakob.

¹⁴"Awor no ta ku boso so Mi ta sera e aliansa aki i e huramentu aki,

¹⁵sino tantu ku esnan ku awe ta para aki ku nos den e presensia di SENOR nos Dios, komo ku esnan ku no ta ku nos aki awe

¹⁶(pasobra boso sa kon nos tabata biba na tera di Egipto, i kon nos a pasa meimei di e nashonnan ku boso a pasa dor di dje.

¹⁷Ademas, boso a mira nan abominashonnan i nan idolonan di palu, piedra, plata i oro, ku nan tabatin huntu ku nan);

¹⁸pa no tin meimei di boso ningun homber of muhe, of famia of tribu, kende su kurason ta bandona SENOR nos Dios awe, pa bai sirbi e diosnan di e nashonnan ei; pa no tin un rais meimei di boso ku ta karga fruta venenoso i apsintus.

¹⁹"I lo t'asina ku ora e tende e palabranan di e maldishon aki, e lo bendishona su mes den su kurason, bisando: 'Mi tin pas maske mi ta kana den duresa di mi kurason, pa destrui tantu e tera muha komo esun seku.'

²⁰SENOR nunka lo ta dispuesto pa pordon'e, ma mas bien e rabia di SENOR i Su yalursheit lo kima kontra e homber ei, i tur maldishon ku ta para skirbi den e buki aki lo sosega riba dje, i SENOR lo kita su nomber for di bou di shelu.

²¹E ora ei SENOR lo apart'e for di tur e tribunan di Israel pa atversidat, konforme tur e maldishonnan di e aliansa ku ta para skirbi den e buki di lei aki.

²²"Awor e generashon ku ta bin, boso yu hombernan ku ta lanta despues di boso i e stranhero ku ta bin for di tera leu, ora nan mira e plaganan di e tera i e malesanan ku SENOR a afligie kune, lo bisa:

²³'Henter su tera ta swafel i salu, kima pa kandela; e no ta wordu sembra i e no ta produktivo, i yerba no ta krese riba dje, manera tempu di e destrukshon di Sodoma i Gomora, Adma i Zeboim, kualnan SENOR a destrui den Su rabia i den Su furia.'

²⁴I tur e nashonnan lo bisa: 'Pakiko SENOR a hasi asin'aki ku e tera aki? Pakiko e rabia furioso aki?'

²⁵"E ora ei e hendenan lo bisa: 'Pasobra nan a bandona e aliansa di SENOR, e Dios di nan tatanan, ku El a sera ku nan dia ku El a saka nan for di tera di Egipto.

²⁶I nan a bai sirbi otro diosnan i a adora nan, diosnan ku nan no a konose i ku E no a duna nan.

²⁷Pesei e rabia di SENOR a kima kontra e tera ei, pa trese riba dje tur maldishon ku ta para skirbi den e buki aki;

²⁸i SENOR a ranka nan ku rais ku tur for di nan tera ku rabia, ku furia i ku gran indignashon i a tira nan den un otro tera, manera ta awe.'

²⁹"E kosnan sekreto ta pertenese na SENOR nos Dios, ma e kosnan revela ta pertenese na nos i na nos yunan pa semper, pa nos kumpli ku tur e palabranan di e lei aki.