Read Papantla Totonac Deuteronomio 3 Bible Online

Deuteronomio 3 - Papantla Totonac bible

Deuteronomio 3

¹"E ora ei nos a bira i a subi e kaminda pa Basan, i Og, rei di Basan, a sali ku henter su pueblo pa kontra ku nos den bataya na Edrei.

²Ma SENOR a bisami: 'No tene miedu di dje, pasobra Mi a entrega e ku henter su pueblo i su tera den bo man; i lo bo hasi kune meskos ku bo a hasi ku Sehon, rei di e amoreonan, kende tabata biba na Hesbon.'

³"Asina SENOR nos Dios a entrega Og tambe, rei di Basan, ku henter su pueblo, den nos man, i nos a derota nan te ora ku no a keda ni un sobrebibiente.

⁴I e tempu ei nos a konkista tur su statnan; no a keda ni un stat ku nos no a kita for di nan: sesenta stat, henter e region di Argob, e reino di Og na Basan.

⁵Tur esakinan tabata statnan fortifika ku murayanan haltu, portanan i baranan, ademas di un gran kantidat di stat sin muraya.

⁶I nos a destrui nan kompletamente, manera nos a hasi ku Sehon, rei di Hesbon, i a destrui tur homber, muhe i mucha di tur stat.

⁷Ma tur e bestianan i e botin di e statnan nos a kohe pa nos mes.

⁸"Asina e tempu ei nos a kita for di man di e dos reinan di e amoreonan e teritorio ku tabata na e otro banda di Jordan, for di e vaye di Arnon te na Seru Hermon

⁹(e sidonionan ta yama Hermon Sirion, i e amoreonan ta yam'e Senir):

¹⁰tur e statnan di e yanura i henter Galaad i henter Basan te na Salka i Edrei, statnan di e reino di Og na Basan.

¹¹(Pasobra solamente Og, rei di Basan, a keda di e restante di e gigantenan. Mira, su kama tabata un kama di heru i e ta keda na Raba di e yu hombernan di Amon. Su largura tabata nuebe kodo i su hanchura kuater kodo, segun e kodo regular.)

¹²"Asina e tempu ei nos a podera di e tera aki. For di Aroer, ku ta keda banda di e vaye di Arnon, i mitar di e serunan di Galaad ku su statnan, mi a duna e rubenitanan i e gaditanan.

¹³Anto e restu di Galaad i henter Basan, e reino di Og, mi a duna na e mitar tribu di Manases, henter e region di Argob (henter e Basan aki ta wordu yama tera di e gigantenan.

¹⁴Jair, yu homber di Manases, a kohe henter e region di Argob te na e frontera di e gesuritanan i maakatitanan, i a yama esaki, esta Basan, na su mes nomber, Havot-jair, manera ta te dia djawe.)

¹⁵I mi a duna Galaad na Makir.

¹⁶I na e rubenitanan i gaditanan mi a duna, for di Galaad te na e vaye di Arnon, e parti meimei di e vaye komo frontera, te na Riu Jabok, frontera di e yu hombernan di Amon.

¹⁷Tambe Araba, ku Jordan komo frontera, for di Kineret te na e laman di Araba, Laman Salu, na pia di e bahadanan di Pisga, parti pariba.

¹⁸"I e tempu ei mi a ordena boso, bisando: 'SENOR boso Dios a duna boso e tera aki pa podera di dje; ma boso tur, hombernan balente, mester krusa arma dilanti di boso rumannan, e yunan di Israel.

¹⁹Ma boso esposanan, boso yu chikitunan i boso bestianan di kria (mi sa ku boso tin hopi bestia di kria), mag keda den boso statnan ku mi a duna boso,

²⁰te ora SENOR duna boso rumannan sosiegu, manera na boso, i nan tambe podera di e tera ku SENOR boso Dios lo duna nan na e otro banda di Jordan. E ora ei kada un di boso mag bolbe na su propiedat ku mi a duna boso.'

²¹"I e tempu ei mi a ordena Josue, bisando: 'Bo wowo a mira tur loke SENOR boso Dios a hasi ku e dos reinan aki; asina SENOR lo hasi ku tur e reinonan dor di kual bo ta bai pasa.

²²No tene miedu di nan, pasobra ta SENOR boso Dios ta Esun ku ta bringa pa boso.'

²³"Tambe mi a roga SENOR e tempu ei, bisando:

²⁴'O Senor DIOS, Bo a kuminsa mustra Bo sirbido Bo grandesa i Bo man poderoso; pasobra ki dios tin den shelu of riba tera ku por hasi obranan i echonan poderoso manera Abo?

²⁵Mi ta pidiBo, lagami krusa i mira e tera bunita ku ta keda na e otro banda di Jordan, e bunita serunan ei i Libano.'

²⁶"Ma pa boso motibu SENOR tabata rabia ku mi i no kier a skuchami; i SENOR a bisami: 'Basta! No papia ku Mi mas di e asunto aki.

²⁷Subi bai na kabes di Pisga i hisa kara wak pabou, panort, pasuit i pariba, i mira esaki ku bo wowo, pasobra lo bo no krusa e Jordan aki.

²⁸Ma enkarga Josue, enkurash'e i fortales'e, pasobra ta e lo krusa na kabes di e pueblo aki i ta e lo duna nan komo erensia e tera ku abo lo mira.'

²⁹Asina nos a keda den e vaye enfrente di Bet-peor.