Read Papantla Totonac Deuteronomio 30 Bible Online

Deuteronomio 30 - Papantla Totonac bible

Deuteronomio 30

¹"Asina lo sosode ku ora tur e kosnan aki a bin riba bo, e bendishon i e maldishon ku mi a pone bo dilanti, i bo tene kuenta ku nan den tur nashon pa unda SENOR bo Dios a deportabo,

²i bo bolbe na SENOR bo Dios i obedes'E ku henter bo kurason i ku henter bo alma, konforme tur loke mi ta ordenabo awe, abo i bo yu hombernan,

³e ora ei SENOR bo Dios lo tresebo bek for di koutiverio, i tene kompashon ku bo, i lo bolbe rekohebo for di tur e pueblonan pa unda SENOR bo Dios a plamabo.

⁴Maske esnan di bo ku ta plama ta te na e finnan di mundu, for di ayanan SENOR bo Dios lo rekohebo i for di ayanan E lo tresebo bek.

⁵I SENOR bo Dios lo hibabo na e tera ku bo tatanan a podera di dje, i lo bo podera di dje; i E lo prosperabo i multiplikabo mas ku bo tatanan.

⁶Ademas, SENOR bo Dios lo sirkumsida bo kurason i kurason di bo desendientenan, pa bo stima SENOR bo Dios ku henter bo kurason i ku henter bo alma, pa bo por biba.

⁷I SENOR bo Dios lo pone tur e maldishonnan aki riba bo enemigunan i riba esnan ku ta odiabo i ku a persiguibo.

⁸I lo bo obedese SENOR atrobe, i kumpli ku tur Su mandamentunan ku mi ta ordenabo awe.

⁹E ora ei SENOR bo Dios lo hasibo prospera abundantemente den henter e trabou di bo man, den e fruta di bo barika, den e yunan di bo bestianan i den e kosecha di bo tera, pasobra SENOR lo tin goso atrobe den bo pa bon, meskos ku E tabatin goso den bo tatanan,

¹⁰si bo obedese SENOR bo Dios pa warda Su mandamentunan i Su statutonan ku ta para skirbi den e buki di lei aki, si bo bolbe serka SENOR bo Dios ku henter bo kurason i ku henter bo alma.

¹¹"Pasobra e mandamentu aki ku mi ta ordenabo awe no ta muchu difisil pa bo, ni e no ta fuera di alkanse.

¹²E no ta den shelu, ku bo mester bisa: 'Ken lo subi na shelu pa nos, busk'e pa nos, i hasi nos tend'e pa nos kumpli kune?'

¹³Ni e no ta na e otro banda di laman, ku bo mester bisa: 'Ken lo krusa laman pa nos, busk'e pa nos, i hasi nos tend'e pa nos kumpli kune?'

¹⁴Ma e palabra ta masha serka di bo, den bo boka i den bo kurason, pa bo kumpli kune.

¹⁵"Mira, awe mi a pone bo dilanti bida i prosperidat, morto i atversidat,

¹⁶dor ku mi ta ordenabo awe pa stima SENOR bo Dios, pa kana den Su kamindanan i pa warda Su mandamentunan, Su statutonan i Su huisionan, pa bo biba i multiplika, i pa SENOR bo Dios bendishonabo na e tera ku bo ta bai drenta pa podera di dje.

¹⁷"Ma si bo kurason desvia i bo no ta obedese, ma ta wordu hala for di e kaminda i ta adora otro diosnan i ta sirbi nan,

¹⁸mi ta deklara na boso awe ku siguramente boso lo perese. Boso lo no prolonga boso dianan na e tera ku boso ta krusa Jordan pa drenta i podera di dje.

¹⁹"Mi ta yama shelu i tera komo testigu kontra boso awe, ku mi a pone bida i morto boso dilanti, e bendishon i e maldishon. Pesei, skohe bida pa bo biba, abo i bo desendientenan,

²⁰dor di stima SENOR bo Dios, dor di obedese Su bos i dor di tene duru na djé; pasobra esaki ta bo bida i e largura di bo dianan, pa bo biba na e tera ku SENOR a hura na bo tatanan, na Abraham, Isaak i Jakob, pa duna nan."