Read Papantla Totonac Deuteronomio 31 Bible Online

Deuteronomio 31 - Papantla Totonac bible

Deuteronomio 31

¹Asina Moises a bai papia e palabranan aki ku henter Israel.

²I el a bisa nan: "Awor aki mi tin shent'i binti ana; mi no por drenta ni sali mas, i SENOR a bisami: 'Lo bo no krusa e Jordan aki.'

³Ta SENOR bo Dios mes lo krusa bai bo dilanti; E lo destrui e nashonnan aki bo dilanti, i lo bo kore ku nan. Josue ta esun ku lo krusa bai bo dilanti, meskos ku SENOR a bisa.

⁴I SENOR lo hasi ku nan meskos ku El a hasi ku Sehon i Og, reinan di e amoreonan, i ku nan tera, ora ku El a destrui nan.

⁵I SENOR lo entrega nan na boso i boso lo hasi ku nan konforme tur e mandamentunan ku mi a ordena boso.

⁶Sea fuerte i tene kurashi, no tene miedu ni tembla pa nan, pasobra SENOR bo Dios ta Esun ku ta bai ku bo. E lo no fayabo ni bandonabo."

⁷E ora ei Moises a yama Josue i a bis'e den presensia di henter Israel: "Sea fuerte i tene kurashi, pasobra abo mester bai ku e pueblo aki den e tera ku SENOR a hura na nan tatanan di duna nan, i dun'e na nan komo un erensia.

⁸I SENOR ta Esun ku ta bai bo dilanti; E lo ta ku bo. E lo no fayabo ni bandonabo. No tene miedu ni desmaya."

⁹Asina Moises a skirbi e lei aki i a dun'e na e saserdotenan, e yu hombernan di Levi, kendenan tabata karga e arka di aliansa di SENOR, i na tur e ansianonan di Israel.

¹⁰E ora ei Moises a ordena nan, bisando: "Na fin di kada shete ana, na e tempu di ana di kanselashon di debe, na e Fiesta di Tabernakelnan,

¹¹ora henter Israel ta bin pa presenta dilanti di SENOR bo Dios na e luga ku E lo skohe, bo mester lesa e lei aki dilanti di henter Israel pa nan tende.

¹²Reuni e pueblo, homber, muhe i mucha, i e stranhero ku ta keda den bo stat, pa nan tende i sina i teme SENOR boso Dios, i perkura di kumpli ku tur e palabranan di e lei aki.

¹³I nan yunan, ku no tabata sa, lo tende i sina pa teme SENOR boso Dios, tanten ku boso ta biba na e tera ku boso ta bai krusa Jordan pa podera di dje."

¹⁴E ora ei SENOR a bisa Moises: "Mira, bo dia di muri ta serka; yama Josue i presenta boso mes na e tent di reunion, pa Mi dun'e ordu." Asina Moises i Josue a bai i a presenta nan mes na e tent di reunion.

¹⁵I SENOR a parese den e tent den un pilar di nubia, i e pilar di nubia a keda para na entrada di e tent.

¹⁶I SENOR a bisa Moises: "Mira, bo ta serka di bai sosega serka bo tatanan, i e pueblo aki lo lanta i prostitui nan mes dor di sigui tras di e diosnan stranhero di e tera, den kual nan ta bai, i lo bandonaMi i kibra Mi aliansa ku Mi a sera ku nan.

¹⁷E ora ei Mi rabia lo sende kontra nan riba e dia ei, i lo Mi bandona nan i skonde Mi kara pa nan, i nan lo wordu destrui i hopi maldat i angustia lo bin riba nan, asina ku nan lo bisa riba e dia ei: 'No ta pasobra nos Dios no ta meimei di nos e kosnan malu aki a bin riba nos?'

¹⁸Ma siguramente lo Mi skonde Mi kara riba e dia ei pa motibu di tur e maldat ku nan lo hasi, pasobra nan lo bira bai serka otro diosnan.

¹⁹"Pesei anto, skirbi e kantika aki pa boso mes, i sin'e na e yunan di Israel; pon'e riba nan lep, pa e kantika aki por ta un testigu pa Mi kontra e yunan di Israel.

²⁰Pasobra ora Mi hiba nan den e tera ku tin lechi i miel na abundansia, ku Mi a hura na nan tatanan, i nan a kome i a keda satisfecho i a bira gordo, e ora ei nan lo bira bai serka otro diosnan i sirbi nan, i nan lo rechasaMi i kibra Mi aliansa.

²¹E ora ei lo sosode ku ora hopi kos malu i angustia bin riba nan, e kantika aki lo testifika kontra nan komo un testigu (pasobra e lo no wordu lubida den boka di nan desendientenan); pasobra Mi konose e intenshon ku nan tin awe, prome ku Mi a hiba nan na e tera ku Mi a hura di duna nan."

²²Asina Moises a skirbi e kantika aki e mesun dia, i a sin'e na e yunan di Israel.

²³E ora ei SENOR a duna ordu na Josue, yu homber di Nun, i a bisa: "Sea fuerte i tene kurashi, pasobra abo lo hiba e yunan di Israel na e tera ku Mi a hura na nan, i lo Mi ta ku bo."

²⁴I a sosode ku ora Moises a kaba di skirbi e palabranan di e lei aki den un buki te ora nan a keda kompleta,

²⁵Moises a duna ordu na e levitanan ku tabata karga e arka di aliansa di SENOR, bisando:

²⁶"Tuma e buki di lei aki i pon'e banda di e arka di aliansa di SENOR boso Dios, pa e keda ayanan komo un testigu kontra bo.

²⁷Pasobra mi konose bo rebeldia i bo kapricho; mira, mientras ku awe mi ta na bida huntu ku boso ainda, boso tabata rebelde kontra SENOR; kuantu mas anto despues di mi morto!

²⁸Reuni tur e ansianonan di boso tribunan i boso ofisialnan serka mi, pa mi papia e palabranan aki pa nan tende i pa mi yama shelu i tera komo testigu kontra nan.

²⁹Pasobra mi sa ku despues di mi morto boso lo aktua na manera korupto i bira bai for di e kaminda ku mi a ordena boso; i kosnan malu lo bin riba boso den e ultimo dianan, pasobra boso lo hasi loke ta malu den bista di SENOR dor di probok'E na rabia ku e obra di boso mannan."

³⁰E ora ei Moises a resita pa henter e asamblea di Israel tende e palabranan di e kantika aki, te na su fin: