Read Papantla Totonac Deuteronomio 32 Bible Online

Deuteronomio 32 - Papantla Totonac bible

Deuteronomio 32

¹"Skucha, O shelunan, i lagami papia; i laga tera tende e palabranan di mi boka.

²Laga mi sinansa kai manera awaseru, mi diskurso gotia manera serena, manera gota di awa riba yerba fresku i manera awaseru ta basha riba yerba di speserei.

³"Pasobra mi ta proklama e nomber di SENOR; atribui grandesa na nos Dios!

⁴E Baranka! Su obra ta perfekto, pasobra tur Su kamindanan ta hustu; un Dios di fieldat i sin inhustisia, hustu i rekto E ta.

⁵"Nan a aktua na manera korupto pa kuné, nan no ta Su yunan, pa motibu di nan defekto; ma nan ta un generashon perverso i malbado.

⁶T'asina bo ta paga SENOR, O pueblo loko i bobo? No ta E ta bo Tata ku a kumprabo? Ta E a trahabo i stablesebo.

⁷"Korda e dianan di prome aya, konsidera e ananan di tur generashon. Puntra bo tata, i e lo kontabo, bo ansianonan, i nan lo bisabo.

⁸Tempu ku e Haltisimo a duna e nashonnan nan erensia, tempu ku El a separa e yunan di hende, El a pone e markanan di frontera di e pueblonan konforme e kantidat di e yunan di Israel.

⁹Pasobra SENOR Su porshon ta Su pueblo; Jakob ta e parti di Su erensia.

¹⁰"El a han'e na un tera di desierto, i den abandono di horibel soledat; El a rondon'e, El a perkura p'e, El a ward'e manera Su pret'i wowo.

¹¹Manera un aguila ku ta aktiva su neishi, ku ta zwef riba su puitunan, El a habri Su halanan i a kohe nan, El a karga nan riba Su plumanan.

¹²SENOR so tabata gui'e, i no tabatin ningun dios stranhero huntu kune.

¹³"El a hasie kabalga riba e luganan haltu di tera, i el a kome e kosecha di kunuku; i El a hasie chupa miel for di baranka, i zeta for di piedra duru,

¹⁴lechi kuaha di baka i lechi di karne, ku vet di lamchi, i karne chubatu, di e kria di Basan, i kabritu, ku e miho di e trigo; i di e sanger di wendruif bo a bebe bina.

¹⁵"Ma Jesurun a bira gordo i a sapatia-- bo a bira gordo, diki, i ta lombra di manteka-- e ora ei el a bandona Dios, Kende a trah'e, i a despresia e Baranka di su salbashon.

¹⁶Nan a hasié yalurs ku diosnan stranhero; ku abominashonnan nan a probok'E na rabia.

¹⁷Nan a ofrese sakrifisio na demononan, no na Dios, na diosnan ku nan no a konose, diosnan nobo ku a bin ultimamente, pa kendenan bo tatanan no tabatin temor.

¹⁸Bo a neglisha e Baranka ku a engendrabo, i a lubida e Dios ku a dunabo bida.

¹⁹"I SENOR a mira esaki i a rechasa nan, pa motibu di e probokashon di Su yu hombernan i yu muhenan.

²⁰E ora ei El a bisa: 'Lo Mi skonde Mi kara pa nan i mira kiko nan fin lo ta; pasobra nan ta un generashon perverso, yunan den kendenan no tin fieldat.

²¹Nan a hasiMi yalurs ku loke no ta Dios; nan a probokaMi na rabia ku nan ldolonan. Pesei lo Mi hasi nan yalurs ku esnan ku no ta un pueblo; lo Mi proboka nan na rabia ku un nashon bobo,

²²pasobra un kandela a wordu sendi den Mi rabia, i ta kima te na e profundidat di Seol, i ta kaba ku tera huntu ku loke e ta produsi, i ta sende e fundeshinan di e serunan na kandela.

²³'Lo Mi montona desaster riba nan; lo Mi tira mi flechanan riba nan.

²⁴Hamber lo kaba ku nan, i plaga i destrukshon amargo lo devora nan, i lo Mi manda djente di bestia riba nan, ku veneno di loke ta lastra den stof.

²⁵Pafo spada lo destrui, i paden spantu-- tantu hoben komo birgen, yu na pechu komo homber ku kabei blanku.

²⁶Lo Mi a bisa: "Lo Mi korta nan na pida-pida, lo Mi kita e rekuerdo di nan for di hende,"

²⁷si Mi no tabatin temor di e probokashon di e enemigu, pa nan atversarionan no komprende robes, pa nan no bisa: "Nos man ta triunfa, i no ta SENOR a hasi tur esaki."'

²⁸"Pasobra nan ta un nashon ku falta konseho, i no tin komprendementu den nan.

²⁹Mara nan tabata sabi, ku nan lo a komprende esaki, ku nan lo a tene kuenta ku e fin ku ta spera nan.

³⁰Kon un so por persigui mil, i dos pone dies mil hui, si no ta nan Baranka a bende nan, i SENOR a entrega nan?

³¹Di berdat, nan baranka no ta manera nos Baranka, nos enemigunan mes ta huzga esaki.

³²Pasobra nan mata di wendruif ta bin for di e mata di wendruif di Sodoma, i for di e kunukunan di Gomora; nan wendruifnan ta wendruifnan venenoso, nan troshinan ta marga.

³³Nan bina ta veneno di kolebra, i veneno kruel di kobra.

³⁴'No ta serka Mi e ta warda, seya den Mi luganan di warda tesoro?

³⁵Vengansa ta di Mi, i rekompensa, na su debido tempu nan pia lo slep; pasobra e dia di nan kalamidat ta serka, i e kosnan prepara pa nan ta bin rapido riba nan.'

³⁶"Pasobra SENOR lo huzga Su pueblo, i lo tin kompashon ku Su sirbidonan, ora ku E mira ku nan forsa a kaba, i ku no a keda ningun hende, ni katibu, ni liber.

³⁷I E lo bisa: 'Unda nan diosnan ta, e baranka den kual nan a buska refugio?

³⁸Ken a kome e vet di nan sakrifisionan, i a bebe e bina di nan ofrenda di bibida? Laga nan lanta yudabo, laga nan ta bo luga di skonde!

³⁹'Mira awor ku ta Ami, Ami ta E, i no tin ningun dios fuera di Mi; ta Ami ta mata i ta duna bida. Ta Ami a herida i ta Ami ta Esun ku ta kura; i no tin ningun hende ku por libra for di Mi man.

⁴⁰Di berdat, Mi ta halsa Mi man na shelu, i ta bisa: Manera Mi ta biba pa semper,

⁴¹si Mi sleip Mi spada ku ta briya manera lamper, i Mi tene huisio den Mi man, lo Mi tuma vengansa riba Mi atversarionan, i lo Mi paga bek esnan ku ta odiaMi.

⁴²Lo Mi hasi Mi flechanan burachi ku sanger, i Mi spada lo devora karni, ku e sanger di esnan mata i di e katibunan, di e kabesnan ku kabei largu di e enemigu.'

⁴³"Regosiha, O nashonnan, huntu ku Su pueblo; pasobra E lo venga e sanger di Su sirbidonan, i lo tuma vengansa riba Su atversarionan, i lo hasi ekspiashon pa Su tera i pa Su pueblo."

⁴⁴E ora ei Moises a bin i a resita tur e palabranan di e kantika aki pa e pueblo tende, e, huntu ku Josue, yu homber di Nun.

⁴⁵Ora Moises a kaba di resita tur e palabranan pa henter Israel,

⁴⁶el a bisa nan: "Paga bon tino na tur e palabranan ku mi ta spierta boso kune awe, ku boso lo ordena boso yunan pa perkura di kumpli ku nan, tur e palabranan di e lei aki.

⁴⁷Pasobra esaki no ta un palabra bashi pa boso; di berdat, esaki ta boso bida. I pa medio di e palabra aki boso lo prolonga boso dianan na e tera ku boso ta bai krusa Jordan pa podera di dje."

⁴⁸I SENOR a papia ku Moises riba e mesun dia ei, bisando:

⁴⁹"Subi bai riba e seru di Abarim aki, riba Seru Nebo, ku ta keda na tera di Moab, enfrente di Jeriko, i wak e tera di Kanaan, ku Mi ta duna e yunan di Israel komo propiedat,

⁵⁰i muri riba e seru ku bo ta subi, i wordu reuni ku bo pueblo, meskos ku Aaron, bo ruman, a muri riba Seru Hor i a wordu reuni ku su pueblo,

⁵¹pasobra boso a peka kontra Mi meimei di e yunan di Israel banda di e awanan di Meriba di Kades, den e desierto di Zin, pasobra boso no a santifikaMi meimei di e yunan di Israel.

⁵²Pasobra lo bo mira e tera na un distansia, ma lo bo no bai ayanan, den e tera ku Mi ta duna e yunan di Israel."