Read Papantla Totonac Deuteronomio 33 Bible Online

Deuteronomio 33 - Papantla Totonac bible

Deuteronomio 33

¹Awor esaki ta e bendishon ku Moises, e homber di Dios, a bendishona e yunan di Israel kune prome ku el a muri.

²I el a bisa: "SENOR a bin for di Sinai, i for di Seir El a sali riba nan manera solo; El a resplandese for di Seru Paran, i El a bin for di meimei di dies mil santu; for di Su man drechi a sali un lei di kandela pa nan.

³Di berdat, E ta stima e pueblo; tur Bo santunan ta den Bo man, i nan a sigui den Bo pasonan; kada un ta risibi di Bo palabranan.

⁴Moises a ordena nos un lei, un erensia pa e asamblea di Jakob.

⁵I E tabata rei na Jesurun, tempu ku e kabesantenan di e pueblo a reuni, e tribunan di Israel tur huntu.

⁶"Ku Ruben biba i no muri, i ku su hombernan no sea poko."

⁷I esaki el a bisa tokante di Juda: "Tende, O SENOR, e bos di Juda, i hib'e serka su pueblo. Ku su man el a defende su kousa; i ku Abo sea un ayudo kontra su atversarionan."

⁸I di Levi el a bisa: "Ku Bo Tumim i Bo Urim keda pa Bo homber piadoso, kende Bo a pone na prueba na Masa, ku kende Bo a lucha banda di e awanan di Meriba;

⁹kende a bisa di su tata i di su mama: 'Mi no a tene kuenta ku nan'; i e no a rekonose su ruman hombernan, ni a asepta su mes yunan, pasobra nan a kumpli ku Bo palabra i a warda Bo aliansa.

¹⁰Nan lo sina Jakob Bo ordenansanan, i Israel Bo lei. Nan lo pone sensia Bo dilanti, i ofrendanan ku mester wordu kima hente riba Bo altar.

¹¹O SENOR, bendishona su forsa, i asepta e trabou di su mannan; aplasta lomo di esnan ku ta lanta kontra dje, i esnan ku ta odi'e, pa nan no lanta mas."

¹²Di Benj amin el a bisa: "Ku e stima di SENOR biba den siguridat serka djé, Kende ta proteh'e henter dia, i e ta biba meimei di Su skoudernan."

¹³I di Jose el a bisa: "Ku su tera sea bendishona di SENOR, ku e miho kosnan di shelu, ku serena, i for di e profundidat ku ta keda aya bou,

¹⁴i ku e miho frutanan di solo, i ku e miho kosecha di e lunanan,

¹⁵i ku e miho kosnan di e serunan antiguo, i ku e miho kosnan di e serunan eterno,

¹⁶i ku e miho kosnan di e tera i su plenitut, i e grasia di Esun ku tabata biba den e mata. Laga esaki bin riba kabes di Jose, i riba korona di kabes di esun distingui entre su rumannan.

¹⁷Manera e primogenito di su buey, asina su gloria ta, i su kachunan ta kachu di bufalo; ku esakinan e lo kacha e pueblonan, tur huntu, te na e finnan di mundu, i eseinan ta e dies milnan di Efrain, i eseinan ta e milnan di Manases."

¹⁸I di Zabulon el a bisa: "Regosiha, Zabulon, ora bo ta sali, i Isakar, den bo tentnan.

¹⁹Nan lo yama pueblonan na e seru; aya nan lo ofrese sakrifisionan di hustisia; pasobra nan lo saka e abundansia di e lamannan, i e tesoronan skondi di e santu."

²⁰I di Gad el a bisa: "Bendishona ta esun ku ta hasi Gad mas grandi; e ta kai drumi manera leon, i ta sker brasa for di otro, tambe korona di kabes.

²¹E ora ei el a skohe e miho parti pa su mes, pasobra ayanan e porshon di e gobernante tabata reserva; i el a bin huntu ku e kabesantenan di e pueblo; el a ehekuta hustisia di SENOR i Su ordenansanan ku Israel."

²²I di Dan el a bisa: "Dan ta un yu di leon, ku ta bula sali for di Basan."

²³I di Neftali el a bisa: "O Neftali, sasia ku grasia, i yen di bendishon di SENOR, podera di e laman i di suit."

²⁴I di Aser el a bisa: "Aser ta mas bendishona ku yu hombernan; ku e risibi grasia serka su ruman hombernan, i ku e dop su pia den zeta.

²⁵Bo grendelnan lo ta heru i brons, i konforme bo dianan, asina bo forsa lo ta.

²⁶"No tin ningun manera e Dios di Jesurun, Kende ta kabalga dor di e shelunan pa yudabo, i riba e nubianan den Su mahestat.

²⁷E Dios eterno ta un refugio, i abou e brasanan eterno ta; i El a kore ku e enemigu for di bo dilanti, i a bisa: 'Destrui!'

²⁸Asina Israel ta biba den siguridat, e fuente di Jakob, solitario, na un tera di mainshi i bina nobo; tambe Su shelunan ta laga serena kai.

²⁹Bendishona bo ta, O Israel; ken ta manera bo, un pueblo salba pa SENOR, Kende ta e eskudo di bo yudansa i e spada di bo mahestat! Asina bo enemigunan lo kremp di miedu bo dilanti, i lo bo trapa riba nan luganan haltu."