Read Papantla Totonac Deuteronomio 4 Bible Online

Deuteronomio 4 - Papantla Totonac bible

Deuteronomio 4

¹"Awor anto, O Israel, skucha e statutonan i huisionan ku mi ta sina boso pa boso kumpli ku nan, pa boso por biba i drenta i podera di e tera ku SENOR, e Dios di boso tatanan, ta bai duna boso.

²No anadi na e palabra ku mi ta ordena boso, ni kita for di dje, pa boso warda e mandamentunan di SENOR boso Dios ku mi ta ordena boso.

³"Boso wowonan a mira loke SENOR a hasi den e kaso di Baal-peor, pasobra tur homber ku tabata sigui Baal-peor, SENOR bo Dios a destrui nan for di meimei di boso.

⁴Ma boso ku a keda fiel na SENOR boso Dios ta na bida te awe, kada un di boso.

⁵"Mira, mi a sina boso statutonan i huisionan meskos ku SENOR mi Dios a ordenami, pa boso hasi asina na e tera ku boso ta bai drenta pa podera di dje.

⁶Asina anto, warda nan i kumpli ku nan, pasobra esei ta boso sabiduria i boso komprendementu den bista di e pueblonan ku lo tende tur e statutonan aki i bisa: 'Siguramente e nashon grandi aki ta un pueblo sabi i di komprendementu.'

⁷Pasobra ki gran nashon tin, ku tin un dios asina serka di dje, manera SENOR nos Dios ta ki ora ku nos yama na djé?

⁸Of ki gran nashon tin, ku tin statutonan i huisionan asina hustu, manera henter e lei aki ku mi ta pone boso dilanti awe?

⁹"Solamente, paga tino i warda bo alma ku tur diligensia, pa bo no lubida e kosnan ku bo wowo a mira, i pa nan no kita for di bo kurason tur e dianan di bo bida; ma sina nan na bo yunan i na bo nietunan.

¹⁰Korda e dia ku bo a para dilanti di SENOR bo Dios na Horeb, dia ku SENOR a bisami: 'Reuni e pueblo serka Mi, pa Mi laga nan tende Mi palabranan, pa nan sina di tin temor pa Mi tur e dianan ku nan ta biba riba tera, i pa nan sina nan yunan.'

¹¹I boso a hala serka i a para na pia di e seru, i e seru tabata kima ku kandela te meimei di e shelunan: skuridat, nubia i tiniebla.

¹²E ora ei SENOR a papia ku boso for di meimei di e kandela; boso a tende e zonidu di palabra, ma boso no a mira ningun figura, solamente un bos.

¹³Asina El a anunsia na boso Su aliansa ku El a ordena boso pa kumpli kune, esta, e dies mandamentunan; i El a skirbi nan riba dos tabla-di-piedra.

¹⁴I e tempu ei SENOR a ordenami pa sina boso statutonan i huisionan, pa boso kumpli ku nan na e tera kaminda boso ta bai pa podera di dje.

¹⁵"Pesei, boso tene bon kuidou, komo ku boso no a mira ningun figura riba e dia ku SENOR a papia ku boso na Horeb for di meimei di e kandela,

¹⁶pa boso no aktua na manera korupto i traha un imagen graba pa boso mes den forma di un figura, den semehansa di homber of muhe,

¹⁷den semehansa di un bestia ku tin riba tera, den semehansa di un parha ku hala ku ta bula den laira,

¹⁸den semehansa di un bestia ku ta lastra riba suela, den semehansa di un piska ku tin den e awa bou di tera.

¹⁹I tene kuidou pa boso no hisa wowo wak na shelu i mira solo, luna i streanan, henter e ehersito di shelu, i wordu tenta pa adora nan i sirbi nan, esnan ku SENOR bo Dios a duna na tur pueblo bou di henter shelu.

²⁰Ma SENOR a tuma boso i a saka boso for di e fornu di heru, for di Egipto, pa ta un pueblo pa Su mes erensia, manera ta awe.

²¹"Awor SENOR tabata rabia ku mi pa boso motibu, i a hura ku lo mi no krusa Jordan, i ku lo mi no drenta e bon tera ku SENOR bo Dios ta dunabo komo erensia.

²²Pasobra ami lo muri den e tera aki, ami lo no krusa Jordan, ma boso lo krusa i podera di e bon tera aki.

²³Pesei, boso tene bon kuidou pa boso no lubida e aliansa di SENOR boso Dios, ku El a sera ku boso, i traha pa boso mes un imagen graba den forma di un kos ku SENOR bo Dios a prohibibo.

²⁴Pasobra SENOR bo Dios ta un kandela konsumidor, un Dios yalurs.

²⁵"Ora boso engendra yu i nietu i keda pa hopi tempu na e tera, i boso aktua na manera korupto, i traha un idolo den forma di un kos i hasi loke ta malu den bista di SENOR boso Dios, pa probok'E na rabia,

²⁶mi ta yama shelu i tera pa testifika kontra boso awe, pa siguramente boso perese pronto for di e tera kaminda boso ta bai na e otro banda di Jordan pa podera di dje. Boso lo no biba largu riba dje ayanan, ma lo keda kompletamente destrui.

²⁷I SENOR lo plama boso entre e pueblonan, i boso lo keda poko den kantidat entre e nashonnan kaminda SENOR lo hiba boso.

²⁸I ayanan boso lo sirbi diosnan, e obra di man di hende, palu i piedra, kualnan no ta mira ni tende ni kome ni hole.

²⁹Ma for di ayanan lo bo buska SENOR bo Dios, i lo bo han'E si bo busk'E ku henter bo kurason i ku henter bo alma.

³⁰Ora bo ta den angustia i tur e kosnan aki bin riba bo, den e ultimo dianan, lo bo bolbe serka SENOR bo Dios i skucha Su bos.

³¹Pasobra SENOR bo Dios ta un Dios di kompashon; E lo no fayabo ni destruibo, ni lubida e aliansa ku bo tatanan ku El a hura na nan.

³²"Di berdat, puntra awor tokante di e tempunan pasa ku tabata prome ku bo, for di e dia ku Dios a krea hende riba tera, i puntra for di esun banda di e shelunan te na e otro banda, si algu igual ku e kos grandi aki a wordu hasi, of si a yega di tende algu igual ku esaki.

³³Akaso kualke otro pueblo a yega di tende e bos di Dios ta papia for di meimei di kandela, manera abo a tende, i a sobrebibi?

³⁴Of un dios a yega di purba saka un nashon pa su mes for di meimei di un otro nashon pa medio di pruebanan, senalnan i maraviyanan i pa medio di guera, pa medio di un man poderoso i un brasa ekstendi, i pa medio di terornan grandi, manera SENOR boso Dios a hasi pa boso na Egipto dilanti di boso wowo?

³⁵"Na bo esaki a wordu mustra pa bo por sa ku SENOR, E ta Dios; no tin ningun otro fuera di djé.

³⁶For di e shelunan El a lagabo tende Su bos pa disiplinabo; i riba tera El a lagabo mira Su kandela grandi, i bo a tende Su palabranan for di meimei di e kandela.

³⁷Pasobra E tabata stima bo tatanan, pesei El a skohe nan desendientenan despues di nan. I personalmente El a sakabo for di Egipto pa medio di Su gran poder,

³⁸i a kore ku nashonnan mas grandi i mas poderoso ku bo for di bo dilanti, pa hibabo na nan tera i pa dunabo nan tera komo erensia, manera ta awe.

³⁹"Sabi anto awe, i konsidera den bo kurason, ku SENOR, E ta Dios ariba den shelu i abou riba tera; no tin ni un otro.

⁴⁰Pesei bo mester warda Su statutonan i Su mandamentunan ku mi ta dunabo awe, pa bai bon ku bo i ku bo yunan despues di bo, i pa bo tin bida largu riba e tera ku SENOR bo Dios ta dunabo pa semper."

⁴¹E ora ei Moises a aparta tres stat na e otro banda di Jordan, parti pariba,

⁴²pa un matado ku a mata su prohimo no intenshonalmente, sin ku nunka antes e tabatin enemistat kune, por hui bai ayanan; i dor di hui bai na un di e statnan aki e por keda na bida:

⁴³Beser den desierto, den yanura, pa e rubenitanan, Ramot na Galaad pa e gaditanan, i Golan na Basan pa e manasitanan.

⁴⁴Awor esaki ta e lei ku Moises a pone dilanti di e yunan di Israel;

⁴⁵esakinan ta e testimonionan, e statutonan i e ordenansanan ku Moises a papia ku e yunan di Israel, ora nan a sali for di Egipto,

⁴⁶na e otro banda di Jordan, den e vaye enfrente di Bet-peor, na e tera di Sehon, rei di e amoreonan, kende tabata biba na Hesbon, kende Moises i e yunan di Israel a derota ora nan a sali for di Egipto.

⁴⁷I nan a podera di su tera i di e tera di Og, rei di Basan, e dos reinan di e amoreonan ku tabata na e otro banda di Jordan, parti pariba,

⁴⁸for di Aroer, ku ta keda na rant di e vaye di Arnon, te na Seru Sion, (esta, Hermon),

⁴⁹ku henter Araba na e otro banda di Jordan, parti pariba, te na e laman di Araba, na pia di e bahadanan di Pisga.