Read Papantla Totonac Deuteronomio 5 Bible Online

Deuteronomio 5 - Papantla Totonac bible

Deuteronomio 5

¹E ora ei Moises a manda yama henter Israel i a bisa nan: "Tende, O Israel, e statutonan i e ordenansanan ku mi ta papia awe pa boso tende, pa boso sina nan i warda nan ku tur diligensia.

²SENOR nos Dios a sera un aliansa ku nos na Horeb.

³SENOR no a sera e aliansa aki ku nos tatanan, ma ku nos, ku tur di nos aki ku ta na bida awe.

⁴SENOR a papia ku boso kara-kara riba e seru for di meimei di e kandela,

⁵mientras ku e tempu ei mi tabata para entre SENOR i boso, pa partisipa na boso e palabra di SENOR; pasobra boso tabatin miedu pa motibu di e kandela i boso no a subi bai riba e seru. El a bisa:

⁶'Ami ta SENOR bo Dios, Kende a sakabo for di tera di Egipto, for di e kas di sklabitut.

⁷'Bo no mester tin otro dios Mi dilanti.

⁸'No traha ningun imagen graba pa bo mes, ni nada semehante na loke tin ariba den shelu, ni abou riba tera, ni den e awa bou di tera.

⁹No adora nan ni sirbi nan, pasobra Ami, SENOR bo Dios, ta un Dios yalurs, Kende ta bishita inikidat di e tatanan riba e yunan, i riba e di tres i e di kuater generashon di esnan ku ta odiaMi,

¹⁰ma Kende ta mustra miserikordia na milnan, na esnan ku ta stimaMi i ta warda Mi mandamentunan.

¹¹'No uza nomber di SENOR bo Dios en bano, pasobra SENOR no ta keda sin kastiga esun ku uza Su nomber en bano.

¹²'Warda dia di sabat, pa santifik'e, manera SENOR bo Dios a ordenabo.

¹³Seis dia bo mag traha i hasi tur bo trabou,

¹⁴ma e di shete dia ta un sabat di SENOR bo Dios; riba e dia ei bo no mag hasi ningun trabou, ni abo, ni bo yu homber, ni bo yu muhe, ni bo sirbido homber, ni bo sirbido muhe, ni bo buey, ni bo buriku, ni ningun di bo bakanan, ni esun ku ta keda biba pa un tempu serka bo, pa bo sirbido homber i bo sirbido muhe por sosega meskos ku bo.

¹⁵I korda ku bo tabata esklabu na tera di Egipto i ku SENOR bo Dios a sakabo for di ayanan pa medio di un man poderoso i un brasa ekstendi; pesei SENOR bo Dios a ordenabo pa warda dia di sabat.

¹⁶'Onra bo tata i bo mama, manera SENOR bo Dios a ordenabo, pa bo dianan wordu prolonga i pa bai bon ku bo den e tera ku SENOR bo Dios ta dunabo.

¹⁸'No komete adulterio.

¹⁹'No horta.

²⁰'No lanta testimonio falsu kontra bo prohimo.

²¹'No kudisha esposa di bo prohimo i no desea kas di bo prohimo, ni su kunuku, ni su esklabu homber ni su esklabu muhe, ni su buey, ni su buriku, ni nada ku ta pertenese na bo prohimo.'

²²"E palabranan aki SENOR a papia ku henter boso asamblea riba e seru for di meimei di e kandela, di e nubia i di e tiniebla, ku gran bos, i E no a anadi nada mas. I El a skirbi nan riba dos tabla-di-piedra i a dunami nan.

²³"I a sosode ku ora boso a tende e bos for di meimei di e skuridat, mientras ku e seru tabata kima ku kandela, boso a bin serka mi, tur e kabesantenan di boso tribunan i boso ansianonan.

²⁴I boso a bisa: 'Mira, SENOR nos Dios a mustra nos Su gloria i Su grandesa, i nos a tende Su bos for di meimei di e kandela; nos a mira awe ku Dios ta papia ku hende, i tog e ta keda na bida.

²⁵Awor anto, pakiko nos mester muri? Pasobra e kandela grandi aki lo kaba ku nos; si nos tende e bos di SENOR nos Dios pa mas tempu, e ora ei nos lo muri.

²⁶Pasobra ta kiko hende ta, pa tende e bos di e Dios bibu papia for di meimei di kandela, manera nos a tende, i keda na bida?

²⁷Hala serka i tende tur loke SENOR nos Dios ta bisa; e ora ei papia ku nos tur loke SENOR nos Dios papia ku bo, i nos lo tende i hasie.'

²⁸"I SENOR a tende e bos di boso palabranan ora boso a papia ku mi, i SENOR a bisami: 'Mi a tende e bos di e palabranan di e pueblo aki, ku nan a papia ku bo. Tur loke nan a papia ta bon.

²⁹O ku nan tabatin tal kurason den nan, ku nan lo tabatin temor pa Mi, i semper warda tur Mi mandamentunan, pa bai bon ku nan i ku nan yunan pa semper!

³⁰'Bai, bisa nan: "Bolbe na boso tentnan."

³¹Ma pa loke t'abo, para aki serka Mi, pa Mi dunabo tur e mandamentunan, e statutonan i e huisionan ku bo mester sina nan, pa nan kumpli ku nan na e tera ku Mi ta duna nan pa nan podera di dje.'

³²"Asina, mira pa boso hasi meskos ku SENOR boso Dios a ordena boso; no bira bai na man drechi ni na man robes.

³³Kana den henter e kaminda ku SENOR boso Dios a ordena boso, pa boso keda na bida i pa bai bon ku boso, i pa boso prolonga boso dianan den e tera ku boso lo podera di dje.