Read Papantla Totonac Deuteronomio 6 Bible Online

Deuteronomio 6 - Papantla Totonac bible

Deuteronomio 6

¹"Awor esaki ta e mandamentu, e statutonan i e huisionan ku SENOR boso Dios a ordenami pa sina boso, pa boso por hasi nan na e tera ku boso ta bai pa podera di dje,

²pa asina abo, bo yu homber i bo nietu teme SENOR bo Dios, pa warda tur Su statutonan i Su mandamentunan ku mi ta ordenabo tur e dianan di bo bida, i pa bo dianan wordu prolonga.

³O Israel, bo mester skucha i perkura di hasie, pa bai bon ku bo i pa bo multiplika grandemente, manera SENOR, e Dios di bo tatanan, a primintibo, na un tera ku tin lechi i miel na abundansia.

⁴"Tende, O Israel! SENOR ta nos Dios, SENOR ta un!

⁵I stima SENOR bo Dios ku henter bo kurason, ku henter bo alma i ku tur bo forsa.

⁶E palabranan aki, ku mi ta ordenabo awe, mester ta riba bo kurason.

⁷Sina nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.

⁸Mara nan komo un senal na bo man i komo un banchi na bo frenta.

⁹Skirbi nan riba e koseinnan-di-porta di bo kas i riba bo portanan di kura.

¹⁰"E ora ei lo sosode ku ora SENOR bo Dios tresebo den e tera ku El a hura na bo tatanan, Abraham, Isaak i Jakob, pa dunabo, statnan grandi i bon ku bo no a traha,

¹¹i kasnan yen di tur kos bon ku bo no a yena nan kune, posnan koba ku bo no a koba, kunukunan di wendruif i palunan di oleifi ku bo no a planta, i bo kome i keda satisfecho,

¹²e ora ei tene kuidou pa bo no lubida SENOR, Kende a sakabo for di tera di Egipto, for di e kas di sklabitut.

¹³"Teme solamente SENOR bo Dios, i sirbié i hura den Su nomber.

¹⁴No bai tras di otro dios, ningun di e diosnan di e pueblonan ku ta ront di boso,

¹⁵(pasobra SENOR bo Dios, Kende ta meimei di boso, ta un Dios yalurs), pa e rabia di SENOR bo Dios no sende kontra bo i E destruibo for di riba tera.

¹⁶No tenta SENOR boso Dios, manera boso a tent'E na Masa.

¹⁷Warda ku tur diligensia e mandamentunan di SENOR boso Dios i Su testimonionan i Su statutonan ku El a ordenabo.

¹⁸Hasi loke ta korekto i bon den bista di SENOR, pa bai bon ku bo i pa bo drenta i podera di e bon tera ku SENOR a hura di duna bo tatanan,

¹⁹dor di kore ku tur bo enemigunan for di bo dilanti, manera SENOR a bisa.

²⁰"Manan, ora bo yu homber puntrabo: 'Kiko e testimonionan, e statutonan i e huisionan ku SENOR a ordena boso ta nifika?'

²¹e ora ei bo mester bisa bo yu homber: 'Nos tabata esklabu di Farao na Egipto i SENOR a saka nos for di Egipto ku un man poderoso.

²²Ademas, SENOR a mustra senalnan i maraviyanan grandi i desastroso dilanti di nos bista kontra Egipto, Farao i henter su kas;

²³i El a saka nos for di ayanan pa trese nos na e tera, pa duna nos e tera ku El a hura di duna nos tatanan.'

²⁴Asina SENOR a ordena nos pa kumpli ku tur e statutonan aki, pa semper teme SENOR nos Dios pa nos mes bon, i pa nos sobrebibi, manera ta awe.

²⁵I lo ta hustisia pa nos si nos perkura di kumpli ku henter e mandamentu aki dilanti di SENOR nos Dios, manera El a ordena nos.