Read Papantla Totonac Deuteronomio 7 Bible Online

Deuteronomio 7 - Papantla Totonac bible

Deuteronomio 7

¹"Ora SENOR bo Dios hibabo na e tera ku bo ta bai drenta pa podera di dje, i E kore ku hopi nashon for di bo dilanti, e heteonan, e gergeseonan, e amoreonan, e kananeonan, e ferezeonan, e heveonan i e jebuseonan, shete nashon mas grandi i mas poderoso ku bo,

²i ora SENOR bo Dios entrega nan na bo i bo derota nan, e ora ei bo mester destrui nan kompletamente. No sera aliansa ku nan ni tene miserikordia di nan.

³No emparenta ku nan; no duna bo yu muhe na nan yu homber, ni tuma nan yu muhe pa bo yu homber.

⁴Pasobra nan lo kita bo yu homber di siguiMi pa sirbi otro diosnan; e ora ei e rabia di SENOR lo sende kontra bo, i E lo destruibo mesora.

⁵Ma asina boso mester hasi ku nan: basha nan altarnan abou, kibra nan pilarnan sagrado na pida-pida, kap nan imagennan di Asera bent'abou i kima nan imagennan graba ku kandela.

⁶Pasobra bo ta un pueblo santu pa SENOR bo Dios; SENOR bo Dios a skohebo, for di tur e pueblonan ku tin riba superfisio di tera, pa ta un pueblo spesial pa Su mes.

⁷"SENOR no a stima boso ni skohe boso, pasobra boso tabata mas hopi ku kualke otro pueblo, pasobra boso tabata esun di mas poko di tur pueblo,

⁸ma pasobra SENOR tabata stima boso i a warda e huramentu ku El a hura na boso tatanan, pesei SENOR a saka boso pa medio di un man poderoso i a redimi boso for di e kas di sklabitut, for di man di Farao, rei di Egipto.

⁹Pesei, sabi ku SENOR bo Dios, E ta Dios, e Dios fiel, Kende ta warda Su aliansa i Su miserikordia pa ku esnan ku ta stim'E i ta warda Su mandamentunan te na e di mil generashon;

¹⁰ma esnan ku ta odi'E, E ta paga bek en persona, pa destrui nan; E no ta tarda pa paga esun ku ta odi'E, E lo pagu'e bek en persona.

¹¹Pesei bo mester warda e mandamentu i e statutonan i e huisionan ku mi ta ordenabo awe pa kumpli ku nan.

¹²"E ora ei lo sosode ku, pasobra bo ta skucha na e huisionan aki i ta warda i ta kumpli ku nan, SENOR bo Dios lo warda Su aliansa i Su miserikordia pa ku bo, manera El a hura na bo tatanan.

¹³I E lo stimabo, bendishonabo i multiplikabo; tambe E lo bendishona e fruta di bo barika i e fruta di bo suela, bo mainshi, bo bina nobo i bo zeta, e oumento di bo kria di baka i e lamchinan di bo tou di bestia chikitu, na e tera ku El a hura na bo tatanan di dunabo.

¹⁴Lo bo ta bendishona riba tur pueblo; lo no tin ni homber ni muhe steril meimei di bo, ni meimei di bo bestianan.

¹⁵I SENOR lo kita tur malesa for di bo; i E lo no afligibo ku ningun di e malesanan teribel di Egipto ku bo a konose, ma E lo pone nan riba tur esnan ku ta odiabo.

¹⁶I bo mester kaba ku tur e pueblonan ku SENOR bo Dios ta bai entrega na bo; no wak nan ku duele, ni sirbi nan diosnan, pasobra esei lo ta un trampa pa bo.

¹⁷"Si akaso bo bisa den bo kurason: 'E nashonnan aki ta mas grandi ku mi. Kon mi ta hasi kore ku nan?'

¹⁸no tene miedu di nan; korda bon kiko SENOR bo Dios a hasi ku Farao i ku henter Egipto:

¹⁹e pruebanan grandi ku bo wowo a mira i e senalnan, e maraviyanan, e man poderoso i e brasa ekstendi pa medio di kual SENOR bo Dios a sakabo afo. Asina SENOR bo Dios lo hasi ku tur e pueblonan ku bo tin miedu di nan.

²⁰Ademas, SENOR bo Dios lo manda e maribomba riba nan, te ora ku esnan ku a keda i ku ta skonde nan mes pa bo, perese.

²¹No spanta pa nan, pasobra SENOR bo Dios ta meimei di bo, un Dios grandi i temibel.

²²I na poko-poko SENOR bo Dios lo saka e nashonnan aki for di bo dilanti; lo bo no por kaba ku nan mesora, pa bestia di mondi no bira muchu hopi kontra bo.

²³Ma SENOR bo Dios lo entrega nan na bo i lo trese nan den konfushon grandi, te ora nan keda destrui.

²⁴I E lo entrega nan reinan den bo man, i lo bo kita nan nomber for di bou di shelu; ningun hende lo no por keda para bo dilanti te ora bo a destrui nan.

²⁵E imagennan graba di nan diosnan bo mester kima ku kandela. No kudisha e plata ni e oro ku tin riba nan, ni tuma esaki pa bo mes, pa e no bira un trampa pa bo, pasobra e ta un abominashon pa SENOR bo Dios.

²⁶No trese un abominashon den bo kas, pa bo no bin bou di maldishon meskos kune; odi'e di henter bo kurason i abores'e di henter bo kurason, pasobra e ta un kos maldishona.