Read Papantla Totonac Deuteronomio 8 Bible Online

Deuteronomio 8 - Papantla Totonac bible

Deuteronomio 8

¹"Boso perkura di kumpli ku tur e mandamentunan ku mi ta ordena boso awe, pa boso biba i multiplika, i drenta i podera di e tera ku SENOR a hura di duna boso tatanan.

²I korda henter e kaminda ku SENOR bo Dios a guiabo den desierto e kuarenta ananan aki, pa E umiyabo i ponebo na prueba, pa hana sa kiko tabatin den bo kurason, si lo bo a warda Su mandamentunan, si of no.

³I El a umiyabo i a lagabo pasa hamber, i a alimentabo ku mana ku bo no tabata konose, ni bo tatanan no tabata konose, pa E hasibo komprende ku hende no ta biba di pan so, ma ku hende ta biba di tur loke ta sali for di boka di SENOR.

⁴Bo pana no a gasta na bo kurpa, ni bo pia no a hincha durante di e kuarenta ananan aki.

⁵Asina bo mester sa den bo kurason ku SENOR bo Dios tabata disiplinabo meskos ku un homber ta disiplina su yu.

⁶"Pesei, warda e mandamentunan di SENOR bo Dios dor di kana den Su kamindanan i dor di tin temor p'E.

⁷Pasobra SENOR bo Dios ta tresebo den un bon tera, un tera yen di roi di awa, di fuentenan i awanan ku ta brota den e vayenan i serunan;

⁸un tera di trigo i puspas, di mata di wendruif i palu di figo i granatapel, un tera di zeta di oleifi i miel;

⁹un tera kaminda lo bo kome pan sin tin skarsedat, kaminda lo bo no tin falta di nada; un tera ku su piedranan ta heru, i ku for di su serunan bo por saka koper.

¹⁰"Ora bo a kome i a keda satisfecho, bendishona SENOR bo Dios pa e bon tera ku El a dunabo.

¹¹Tene kuidou pa bo no lubida SENOR bo Dios dor di keda sin warda Su mandamentunan, Su ordenansanan i Su statutonan ku mi ta ordenabo awe,

¹²pa ora bo a kome i a keda satisfecho i a traha bon kasnan i a biba den nan,

¹³i ora bo krianan di baka i bo tounan di bestia chikitu multiplika, i bo plata i oro multiplika, i tur loke bo tin multiplika,

¹⁴bo kurason no bira orguyoso i bo lubida SENOR bo Dios, Kende a sakabo for di tera di Egipto, for di e kas di sklabitut.

¹⁵El a guiabo dor di e desierto grandi i teribel, ku su kolebranan venenoso i skorpionnan i tera seku sin awa; El a saka awa pa bo for di e baranka di piedra duru.

¹⁶Den desierto El a alimentabo ku mana ku bo tatanan no tabata konose, pa E umiyabo i pa E ponebo na prueba, pa na final hasi loke ta bon pa bo.

¹⁷Sino bo por bisa den bo kurason: 'Ta mi poder i e forsa di mi man a gana e rikesa aki pa mi.'

¹⁸Ma korda SENOR bo Dios, pasobra ta E ta dunabo poder pa gana rikesa, pa E konfirma Su aliansa ku El a hura na bo tatanan, manera ta awe.

¹⁹"I lo sosode ku si algun dia bo lubida SENOR bo Dios, i bai tras di otro diosnan i sirbi nan i adora nan, mi ta duna testimonio kontra boso awe ku siguramente boso lo perese.

²⁰Manera e nashonnan ku SENOR ta hasi perese boso dilanti, asina boso lo perese; pasobra boso no kier a skucha e bos di SENOR boso Dios.