Read Papantla Totonac Deuteronomio 9 Bible Online

Deuteronomio 9 - Papantla Totonac bible

Deuteronomio 9

¹"Tende, O Israel! Awe bo ta bai krusa Jordan pa drenta i kore ku nashonnan mas grandi i mas poderoso ku bo, statnan grandi ku ta fortifika te na shelu,

²un pueblo grandi i haltu, e yu hombernan di e anakeonan ku bo konose, i di kendenan bo a tende bisa: 'Ken por keda para dilanti di e yu hombernan di Anak?'

³Sabi awe anto ku ta SENOR bo Dios ta Esun ku ta krusa bo dilanti manera un kandela konsumidor. E lo destrui nan i E lo somete nan bo dilanti, pa bo kore ku nan i destrui nan mesora, meskos ku SENOR a bisabo.

⁴"No bisa den bo kurason ora SENOR bo Dios a kore ku nan for di bo dilanti: 'Ta pa motibu di mi hustisia SENOR a tresemi pa podera di e tera aki,' ma ta pa motibu di e maldat di e nashonnan aki SENOR ta kore ku nan for di bo dilanti.

⁵No ta pa motibu di bo hustisia, ni pa motibu di e rektitut di bo kurason bo ta bai podera di nan tera, ma ta pa motibu di e maldat di e nashonnan aki SENOR bo Dios ta kore ku nan for di bo dilanti, pa konfirma e palabra ku SENOR a hura na bo tatanan, na Abraham, Isaak i Jakob.

⁶Sabi anto ku no ta pa motibu di bo hustisia SENOR bo Dios ta dunabo e bon tera aki pa podera di dje, pasobra bo ta un pueblo kabesura.

⁷"Korda bon i no lubida nunka kon bo a proboka SENOR bo Dios na rabia den desierto; for di dia ku bo a sali for di tera di Egipto te ora boso a yega na e luga aki, boso tabata rebelde kontra SENOR.

⁸Na Horeb boso a proboka SENOR na rabia, i SENOR tabata asina rabia ku boso ku E kier a destrui boso.

⁹Ora mi a subi bai riba e seru pa risibi e tablanan di piedra, e tablanan di e aliansa ku SENOR a sera ku boso, mi a keda kuarenta dia i kuarenta nochi riba e seru; mi no a kome pan ni bebe awa.

¹⁰I SENOR a dunami e dos tablanan-di-piedra, skirbi ku e dede di Dios; i riba nan tabatin tur e palabranan ku SENOR a papia ku boso riba e seru for di meimei di e kandela, riba e dia di asamblea.

¹¹"I a sosode ku na fin di kuarenta dia i kuarenta nochi SENOR a dunami e dos tablanan-di-piedra, e tablanan di e aliansa.

¹²E ora ei SENOR a bisami: 'Lanta, baha bai for di aki lihe, pasobra bo pueblo, ku bo a saka for di Egipto, a aktua na un manera korupto. Masha lihe nan a bira bai for di e kaminda ku Mi a ordena nan; i nan a traha un imagen basha pa nan mes.'

¹³"SENOR a sigui papia ku mi, bisando: 'Mi a mira e pueblo aki, i di berdat, e ta un pueblo kabesura.

¹⁴LagaMi pa Mi destrui nan i kita nan nomber for di bou di shelu; i di bo lo Mi laga sali un nashon mas poderoso i mas grandi ku nan.'

¹⁵"Asina mi a bira baha for di e seru, mientras ku e seru tabata kima ku kandela, i e dos tablanan di e aliansa tabata den mi dos mannan.

¹⁶I mi a mira ku di berdat boso a peka kontra SENOR boso Dios. Boso a traha un bishe basha pa boso mes. Masha lihe boso a bira bai for di e kaminda ku SENOR a ordena boso.

¹⁷I mi a kohe e dos tablanan i a tira nan for di mi dos mannan, i a dal nan kibra dilanti di boso bista.

¹⁸"I mi a tira mi kurpa abou na suela dilanti di SENOR, manera e prome biaha, kuarenta dia i kuarenta nochi; mi no a kome pan ni bebe awa, pa motibu di tur boso pika ku boso a komete dor di hasi loke ta malu den bista di SENOR, pa probok'E na rabia.

¹⁹Pasobra mi tabatin miedu di e rabia i e furia ku kual SENOR tabata rabia ku boso, pa destrui boso, ma SENOR a skuchami e biaha aki tambe.

²⁰I SENOR tabata asina rabia ku Aaron, ku E kier a destruie; pesei na e mesun tempu mi a hasi orashon pa Aaron tambe.

²¹I mi a kohe e opheto di boso pika, e bishe ku boso a traha, i a kim'e ku kandela, a plech'e, garn'e masha fini, te ora ku el a keda fini-fini manera stof; i mi a tira e stof di e bishe den e roi ku tabata kore for di e seru.

²²"Tambe na Tabera, na Masa i na Kibrot-hataava boso a proboka SENOR na rabia.

²³"I ora SENOR a manda boso for di Kades-barnea, bisando: 'Bai podera di e tera ku Mi a duna boso,' e ora ei boso a rebeldia kontra e ordu di SENOR boso Dios; boso no a ker'E ni a skucha Su bos.

²⁴Boso tabata rebelde kontra SENOR for di dia ku mi a konose boso.

²⁵"Asina mi a tira mi kurpa abou na suela dilanti di SENOR--kuarenta dia i kuarenta nochi--lokual mi a hasi pasobra SENOR a bisa ku E lo destrui boso.

²⁶I mi a hasi orashon na SENOR, i a bisa: 'O Senor DIOS, no destrui Bo pueblo, Bo erensia ku Bo a redimi pa medio di Bo grandesa, ku Bo a saka for di Egipto ku un man poderoso.

²⁷Korda Bo sirbidonan, Abraham, Isaak i Jakob; no wak e kapricho di e pueblo aki, ni nan maldat ni nan pika,

²⁸pa e tera for di unda Bo a saka nos no bisa: "Pasobra SENOR no por a trese nan den e tera ku El a priminti nan, i pasobra E tabata odia nan, El a saka nan afo pa mata nan den desierto."

²⁹Sinembargo, ta Bo pueblo nan ta, Bo erensia ku Bo a saka pa medio di Bo gran poder i Bo brasa ekstendi.'