Read Papantla Totonac Evangelio Segun Juan 10 Bible Online

Evangelio Segun Juan 10 - Papantla Totonac bible

Evangelio Segun Juan 10

¹"Di berdat, di berdat, Mi ta bisa boso, esun ku no drenta den e kura di karne dor di e porta, ma ta subi drenta pa un otro kaminda, esei ta un ladron i un hortado.

²Ma esun ku drenta dor di e porta ta un wardado di karne.

³Pa esaki e wardado di porta ta habri porta, i e karnenan ta tende su bos, i e ta yama su mes karnenan na nan nomber i ta saka nan hiba pafo.

⁴Ora ku e saka tur ku ta di dje hiba pafo, e ta bai nan dilanti, i e karnenan ta siguie, pasobra nan konose su bos.

⁵I un hende strano sigur nan lo no sigui, ma lo hui bai for di dje, pasobra nan no konose bos di hende strano."

⁶E komparashon aki Jesus a konta nan, ma nan no a komprende kiko e kosnan ei, ku E tabata papia ku nan, tabata.

⁷E ora ei Jesus a bolbe bisa nan: "Di berdat, di berdat, Mi ta bisa boso, Ami ta e porta di e karnenan.

⁸Tur ku a bin prome ku Mi ta ladron i hortado; ma e karnenan no a tende na nan.

⁹Ami ta e porta; si un hende drenta dor di Mi, e lo ta salba, i lo drenta i sali i hana yerba berde.

¹⁰E ladron ta bin solamente pa horta, pa mata i pa destrui; Ami a bin pa nan tin bida i pa nan tin e na abundansia.

¹¹"Ami ta e bon wardado; e bon wardado ta duna Su bida pa e karnenan.

¹²Esun ku ta un trahado kontrata i no un wardado, ku no ta dono di e karnenan, ta mira e lobo ta bin, i ta bandona e karnenan i ta hui, i e lobo ta ranka nan bai ku nan i ta plama nan.

¹³E ta hui, pasobra e ta un trahado kontrata i e karnenan mes no ta import'e.

¹⁴"Ami ta e bon wardado; i Mi konose esnan ku ta di Mi, i esnan ku ta di Mi, konoseMi,

¹⁵meskos ku e Tata konoseMi i Ami konose e Tata; i Mi ta duna Mi bida pa e karnenan.

¹⁶I Mi tin otro karnenan ku no ta di e kura aki; nan tambe Mi mester trese, i nan lo tende Mi bos; i nan lo bira un tou ku un wardado.

¹⁷Pa e motibu aki e Tata ta stimaMi, pasobra Mi ta duna Mi bida pa Mi bolbe tum'e.

¹⁸Ni un hende no ta kit'e for di Mi, ma di Mi mes Mi ta entregu'e. Mi tin outoridat pa dun'e i Mi tin outoridat pa bolbe tum'e. E mandamentu aki Mi a risibi di Mi Tata."

¹⁹A bolbe bin divishon entre e hudiunan pa motibu di e palabranan aki.

²⁰I hopi di nan tabata bisa: "E tin un demono i E ta loko. Pakiko boso ta skuch'E?"

²¹Otronan tabata bisa: "Esakinan no ta palabranan di un hende posei pa demono. Un demono por habri wowo di hende siegu anto?"

²²Na e tempu ei e Fiesta di Dedikashon a tuma luga na Jerusalem;

²³tabata wenter, i Jesus tabata kana den tempel, den e veranda-di-pilar di Salomon.

²⁴E hudiunan anto a bin para ront di djé i tabata puntr'E: "Kuantu tempu mas Bo ta tene nos na duda? Si Bo ta e Cristo, bisa nos frankamente."

²⁵Jesus a kontesta nan: "Mi a bisa boso, i boso no ta kere; e obranan ku Mi ta hasi den e nomber di Mi Tata, ta esakinan ta duna testimonio di Mi.

²⁶Ma boso no ta kere, pasobra boso no ta pertenese na Mi karnenan.

²⁷Mi karnenan ta tende Mi bos, i Mi konose nan, i nan ta siguiMi;

²⁸i Mi ta duna nan bida eterno, i nan lo no perese nunka; i ni un hende lo no ranka nan for di Mi man.

²⁹Mi Tata, Kende a dunaMi nan, ta mas grandi ku tur; i ni un hende no por ranka nan for di man di Mi Tata.

³⁰Ami i e Tata ta un."

³¹E hudiunan a bolbe kohe piedra pa piedr'E.

³²Jesus a kontesta nan: "Mi a mustra boso hopi bon obra di Mi Tata; pa kual di nan boso ta piedraMi?"

³³E hudiunan a kontest'E: "Pa un bon obra nos no ta piedraBo, ma pa blasfemia; i pasobra Abo, siendo hende, ta hasi Bo mes Dios."

³⁴Jesus a kontesta nan: "No a wordu skirbi den boso Lei: 'Mi a bisa: Boso ta diosnan'?

³⁵Si el a yama nan 'diosnan', na kendenan e palabra di Dios a bin (i e Skritura no por wordu kibra),

³⁶boso ta bisa di Esun, Kende e Tata a santifika i a manda den mundu: 'Bo ta blasfema,' pasobra Mi a bisa: 'Ami ta e Yu di Dios'?

³⁷Si Mi no ta hasi e obranan di Mi Tata, no kereMi;

³⁸ma si Mi ta hasi nan, maske boso no ta kereMi, kere e obranan, pa boso por sa i komprende ku e Tata ta den Mi i Ami den e Tata."

³⁹E ora ei nan a bolbe buska pa gar'E, ma El a skapa for di nan man.

⁴⁰I El a bai atrobe na e otro banda di Jordan, na e luga kaminda ku Juan tabata batisa prome, i El a keda ayanan.

⁴¹I hopi a bin serka djé i a bisa: "Juan no a hasi ningun milager, ma tur e kosnan ku Juan a bisa di e Homber aki tabata berdat."

⁴²I einan hopi a kere den djé.