Read Papantla Totonac Evangelio Segun Juan 11 Bible Online

Evangelio Segun Juan 11 - Papantla Totonac bible

Evangelio Segun Juan 11

¹Awor tabatin un homber malu, Lazaro di Betania, di e pueblito di Maria i su ruman muhe Marta.

²I tabata e Maria ei ku a hunta pia di Senor ku perfume i a seka Su pianan ku su kabei, kende su ruman homber Lazaro tabata malu.

³Pesei e ruman muhenan a manda bis'E: "Senor, ata esun ku Bo ta stima ta malu."

⁴Ma ora Jesus a tende esaki, El a bisa: "E malesa aki no ta pa morto, ma pa e gloria di Dios, pa e Yu di Dios por wordu glorifika dor di dje."

⁵Awor Jesus tabata stima Marta i su ruman muhe i Lazaro.

⁶Anto ora ku El a tende ku Lazaro tabata malu, El a keda dos dia mas na e luga ku E tabata.

⁷Anto despues El a bisa Su disipelnan: "Laga nos bai Judea atrobe."

⁸E disipelnan a bis'E: "Rabi, poko dia pasa e hudiunan tabata buska pa piedraBo, i Bo ta bai ayanan atrobe?"

⁹Jesus a kontesta: "No ta diesdos ora e dia tin? Si un hende kana di dia, e no ta trompeka, pasobra e ta mira e lus di e mundu aki.

¹⁰Ma si un hende kana anochi, e ta trompeka, pasobra e lus no ta den dje."

¹¹Esaki El a papia i despues El a bisa nan: "Nos amigu Lazaro a pega sono, ma Ami ta bai pa Mi lant'e for di sono."

¹²Anto e disipelnan a bis'E: "Senor, si el a pega sono, e lo bira bon."

¹³Awor Jesus tabata papia di su morto, ma nan a kere ku E tabata papia di e sosiegu di sono.

¹⁴E ora ei Jesus a bisa nan bon kla: "Lazaro a muri,

¹⁵i pa boso motibu Mi ta kontentu ku Mi no tabata ayanan, pa boso por kere; ma laga nos bai serka dje."

¹⁶E ora ei Tomas, kende ta wordu yama Didimo, a bisa e otro disipelnan: "Laga nos tambe bai, pa nos muri huntu kuné."

¹⁷Pues, ora Jesus a yega El a hana ku Lazaro tabatin kuater dia kaba den tumba.

¹⁸Awor Betania tabata serka di Jerusalem, na mas o menos tres kilometer di distansia;

¹⁹i hopi di e hudiunan a bin serka Marta i Maria pa konsola nan enkuanto nan ruman homber.

²⁰Awor Marta, ora ku el a tende ku Jesus tabata biniendo, a sali kontr'E; ma Maria a keda sinta den kas.

²¹Anto Marta a bisa Jesus: "Senor, si Bo tabata akinan, mi ruman homber lo no a muri.

²²Awor mi sa tambe ku tur loke Bo pidi Dios, Dios lo dunaBo."

²³Jesus a bis'e: "Bo ruman homber lo lanta."

²⁴Marta a bis'E: "Mi sa ku e lo lanta den e resurekshon riba e ultimo dia."

²⁵Jesus a bis'e: "Ami ta e resurekshon i e bida; esun ku kere den Mi lo biba, maske e muri,

²⁶i tur esnan ku ta biba i ta kere den Mi lo no muri nunka. Bo ta kere esaki?"

²⁷El a bis'E: "Si, Senor, mi a kere ku Bo ta e Cristo, e Yu di Dios, Esun ku mester bin den mundu."

²⁸I ora ku Marta a kaba di bisa esaki, el a bai i a yama su ruman Maria, i a bis'e ketu-ketu: "E Maestro t'aki, i E ta yamabo."

²⁹I ora Maria a tende esaki, el a lanta mesora, i a bai serka djé.

³⁰Awor Jesus no a yega na e pueblito ainda, ma tabata na e luga ainda kaminda Marta a topa kuné.

³¹E ora ei e hudiunan ku tabata den kas serka Maria i ku tabata konsol'e, ora nan a mir'e bula lanta i sali bai, nan a siguie, keriendo ku e tabata bai na e tumba pa yora ayanan.

³²Ora Maria a yega kaminda Jesus tabata, i a mir'E, el a tira su kurpa abou na Su pia i a bis'E: "Senor, si Bo tabata akinan, mi ruman homber lo no a muri."

³³Anto ora Jesus a mir'e ta yora, i e hudiunan ku a bin huntu kune tambe ta yora, El a bira profundamente konmovi den spiritu i masha emoshona,

³⁴i a bisa: "Unda boso a pon'e?" Nan a bis'E: "Senor, bin mira."

³⁵Jesus a yora.

³⁶I pesei e hudiunan tabata bisa: "Mira kon E tabata stim'e!"

³⁷Ma algun di nan a bisa: "E Homber aki ku a habri wowo di esun ku tabata siegu, no por a hasi tambe ku e homber aki no a muri?"

³⁸E ora ei Jesus, profundamente konmovi atrobe, a yega na e tumba. Awor esaki tabata un kueba i tabatin un piedra poni na su entrada.

³⁹Jesus a bisa: "Kita e piedra." Marta, ruman muhe di esun ku a muri, a bis'E: "Senor, ya e mester ta hole malu kaba, pasobra e tin kuater dia morto."

⁴⁰Jesus a bis'e: "Mi no a bisabo, si bo kere, lo bo mira e gloria di Dios?"

⁴¹Anto nan a kita e piedra. I Jesus a hisa kara wak ariba i a bisa: "Tata, Mi ta gradisiBo ku Bo a tendeMi.

⁴²I Mi tabata sa ku Bo ta tendeMi semper; ma pa motibu di e pueblo ku ta para ront di Mi, Mi a bisa esaki, pa nan kere ku ta Abo a mandaMi."

⁴³I despues ku El a bisa e kosnan aki, El a yama na bos haltu: "Lazaro, bin pafo!"

⁴⁴I esun ku a muri a bin pafo, ku su mannan i pianan lora den pana di graf, i tabatin un lensu lora ront di su kara. Jesus a bisa nan: "Los e i lagu'e bai."

⁴⁵Pesei hopi di e hudiunan, ku a bin serka Maria i ku a mira loke El a hasi, a kere den djé.

⁴⁶Ma algun di nan a bai serka e fariseonan i a konta nan e kosnan ku Jesus a hasi.

⁴⁷Pesei, e saserdotenan prinsipal i e fariseonan a konvoka un konsilio, i tabata bisa: "Kiko nos ta hasi? Pasobra e homber aki ta hasi hopi milager.

⁴⁸Si nos lagu'E sigui asina, tur hende lo kere den djé, i e romanonan lo bin i kita tantu nos luga komo nos nashon."

⁴⁹Ma un di nan, Kaifas, kende tabata sumosaserdote e ana ei, a bisa nan: "Boso no sa nada,

⁵⁰ni boso no ta realisa ku ta kumbini boso pa un hende muri pa e pueblo, i no ku henter e nashon perese."

⁵¹Ma esaki e no a bisa di su mes, ma siendo sumosaserdote e ana ei, el a profetisa ku Jesus tabata bai muri pa e nashon,

⁵²i no pa e nashon so, ma tambe pa E por reuni e yunan di Dios ku ta plama tur parti, hasi nan un.

⁵³Pesei for di e dia ei nan tabata plania huntu pa mat'E.

⁵⁴Jesus anto no a kana publikamente mas meimei di e hudiunan, ma a bai for di einan na e region pega ku e desierto, na un stat ku yama Efrain; i El a keda ayanan ku e disipelnan.

⁵⁵Awor Pasku di e hudiunan tabata serka, i hopi hende di e pais a bai Jerusalem prome ku Pasku, pa purifika nan mes.

⁵⁶Anto nan tabata buska Jesus i, para den tempel, nan tabata bisa otro: "Kiko boso ta pensa? E lo bin e Fiesta, si of no?"

⁵⁷Awor e saserdotenan prinsipal i e fariseonan a duna ordu ku si tin un hende ku sa unda E tabata, e mester reporta esaki, pa nan por gar'E.