Read Papantla Totonac Evangelio Segun Juan 12 Bible Online

Evangelio Segun Juan 12 - Papantla Totonac bible

Evangelio Segun Juan 12

¹Jesus anto, seis dia prome ku Pasku, a bin Betania kaminda Lazaro tabata, kende Jesus a lanta for di e mortonan.

²Aya nan a prepara un sena p'E; i Marta tabata sirbi; i Lazaro tabata un di esnan ku tabata sinta na mesa huntu kuné.

³Anto Maria a kohe un liber di perfume di nardo puru di hopi balor, i a hunta pia di Jesus i a seka Su pianan ku su kabei. I e kas a yena ku e fragansia di e perfume.

⁴Ma Judas Iskariot, un di Su disipelnan, kende tabatin intenshon di traishon'E, a bisa:

⁵"Pakiko e perfume aki no a wordu bendi pa tres shen denario i duna na hende pober?"

⁶Awor el a bisa esaki, no pasobra hende pober tabata import'e, ma pasobra e tabata un ladron, i komo ku e tabatin e kaha di plaka, e tabatin kustumber di kohe di loke tabata wordu tira aden.

⁷Anto Jesus a bisa: "Lagu'e; el a warda esaki pa e dia di Mi deramentu.

⁸Pasobra e pobernan boso tin semper serka boso, ma Ami boso no tin semper."

⁹Anto e multitut grandi di e hudiunan a hana sa ku E tabata ayanan; i nan a bin, no solamente pa motibu di Jesus, ma pa nan por a mira Lazaro tambe, kende El a lanta for di e mortonan.

¹⁰Ma e saserdotenan prinsipal a konsulta ku otro pa mata Lazaro tambe,

¹¹pasobra pa su motibu hopi di e hudiunan tabata bai for di nan i tabata kere den Jesus.

¹²E dia siguiente, ora ku e multitut grandi ku a bin e Fiesta a tende ku Jesus tabata bin Jerusalem,

¹³nan a kohe ramanan di palma, i a sali bai kontr'E, i a kuminsa grita: "Hosana!" "Bendishona ta Esun ku ta bin den e nomber di SENOR, e Rei di Israel!"

¹⁴I Jesus a hana un buriku yon i a sinta riba dje, manera ta para skirbi:

¹⁵"No tene miedu, yu muhe di Sion; ata bo Rei ta bin, sinta riba un yu di buriku."

¹⁶E kosnan aki Su disipelnan no a komprende na prinsipio; ma ora Jesus a wordu glorifika, e ora ei nan a korda ku e kosnan aki tabata para skirbi tokante di djé, i ku nan a hasi e kosnan aki kuné.

¹⁷I asina e multitut, ku tabata huntu kuné ora ku El a yama Lazaro sali for di e tumba i a lant'e for di e mortonan, tabata duna testimonio di djé.

¹⁸Pa e motibu aki tambe e multitut a bai kontr'E, pasobra nan a tende ku El a hasi e milager aki.

¹⁹E fariseonan anto tabata bisa otro: "Boso ta mira ku boso no ta logra nada. Mira, mundu ta bai Su tras."

²⁰Awor tabatin algun griego entre esnan ku tabata bai pa adora na e Fiesta;

²¹esakinan anto a bin serka Felipe, kende tabata di Betsaida di Galilea, i a puntr'e, bisando: "Senor, nos kier mira Jesus."

²²Felipe a bin i a bisa Andres; Andres i Felipe a bin, i nan a bisa Jesus.

²³I Jesus a kontesta nan, bisando: "E ora a yega pa e Yu di Hende wordu glorifika.

²⁴Di berdat, di berdat, Mi ta bisa boso, si un pipita di trigo no kai den tera i muri, e ta keda su so; ma si e muri, e ta duna hopi fruta.

²⁵Esun ku stima su bida ta perd'e, i esun ku odia su bida den e mundu aki lo ward'e pa bida eterno.

²⁶Si un hende ta sirbiMi, lagu'e siguiMi; i kaminda Ami ta, einan Mi sirbido tambe lo ta; si un hende ta sirbiMi, e Tata lo onr'e.

²⁷"Awor Mi alma a bira intrankil, i kiko lo Mi bisa: 'Tata, libraMi di e ora aki'? Ma ta pa e proposito aki Mi a bin na e ora aki.

²⁸Tata, glorifika Bo nomber." E ora ei a bin un bos for di shelu, bisando: "Ya Mi a glorifik'e, i lo Mi bolbe glorifik'e."

²⁹Awor e multitut, ku tabata para einan i a tende esei, a bisa ku ta strena a zona; otronan a bisa: "Un angel a papia kuné."

³⁰Jesus a kontesta i a bisa: "No ta pa Mi motibu e bos aki a bin, sino pa boso motibu.

³¹Awor ta bin huisio riba e mundu aki; awor e prens di e mundu aki lo wordu tira pafo.

³²I Ami, si Mi wordu halsa for di tera, lo Mi hala tur hende serka Mi."

³³I ta pa indika e sorto di morto ku E tabata bai muri E tabata bisa esaki.

³⁴Anto e multitut a kontest'E: "For di e Lei nos a tende ku e Cristo lo permanese pa semper; kon anto Bo por bisa: 'E Yu di Hende mester wordu halsa'? Ta ken e Yu di Hende aki ta?"

³⁵E ora ei Jesus a kontesta nan: "Pa un poko tempu mas e lus ta meimei di boso. Kana mientras ku boso tin e lus, pa skuridat no sorprende boso; esun ku ta kana den skuridat no sa unda e ta bai.

³⁶Mientras ku boso tin e lus, kere den e lus, pa boso por bira yunan di lus." E kosnan aki Jesus a papia i El a bai i a skonde Su mes pa nan.

³⁷Ma apesar ku El a hasi asina tantu milager nan dilanti, tog nan no tabata kere den djé,

³⁸pa e palabra di profeta Isaias por a keda kumpli, ku el a papia: "SENOR, ken a kere nos mensahe? I na ken e brasa di SENOR a wordu revela?"

³⁹Pa e motibu aki nan no por a kere, pasobra Isaias a bisa tambe:

⁴⁰"El a siega nan wowo i a hasi nan kurason duru, pa nan no mira ku nan wowo, komprende ku nan kurason, repenti, i Ami kura nan."

⁴¹E kosnan aki Isaias a bisa, pasobra el a mira Su gloria, i el a papia di djé.

⁴²Sinembargo, asta di e gobernantenan hopi a kere den djé, ma pa motibu di e fariseonan nan no tabata konfesa esaki, pa nan no wordu saka for di snoa;

⁴³pasobra nan tabata gusta e aprobashon di hende mas ku e aprobashon di Dios.

⁴⁴I Jesus a bisa na bos haltu: "Esun ku kere den Mi, no ta den Mi e ta kere, sino den Esun ku a mandaMi.

⁴⁵I esun ku miraMi ta mira Esun ku a mandaMi.

⁴⁶Mi a bin komo lus den mundu, pa tur esnan ku kere den Mi no keda den skuridat.

⁴⁷"I si un hende tende Mi palabranan i no kumpli ku nan, Mi no ta huzgu'e, pasobra Mi no a bin pa huzga mundu, ma pa salba mundu.

⁴⁸Esun ku rechasaMi i no risibi Mi palabranan, tin un ku ta huzgu'e; e palabra ku Mi a papia, esei lo huzgu'e den e ultimo dia.

⁴⁹Pasobra no ta ku Mi mes outoridat Mi a papia, ma e Tata ku a mandaMi a dunaMi mandamentu, kiko pa bisa i kiko pa papia.

⁵⁰I Mi sa ku Su mandamentu ta bida eterno; pesei e kosnan ku Mi ta papia, Mi ta papia presis manera e Tata a bisaMi."