Read Papantla Totonac Evangelio Segun Juan 13 Bible Online

Evangelio Segun Juan 13 - Papantla Totonac bible

Evangelio Segun Juan 13

¹Awor prome ku e Fiesta di Pasku, Jesus, sabiendo ku Su ora a yega ku E mester a laga e mundu aki i bai serka e Tata, a mustra esnan di djé ku tabata den mundu ku El a stima nan te na fin.

²I durante di e sena, ora diabel ya kaba a hinka den kurason di Judas Iskariot, yu homber di Simon, pa traishon'E,

³Jesus, sabiendo ku e Tata a dun'E tur kos den Su man, i ku El a bin for di Dios, i tabata bai bek serka Dios,

⁴a lanta for di sena, i a pone Su pana djariba un banda, i a kohe un serbete i a mar'e na Su sintura.

⁵Despues El a basha awa den un punchero, i a kuminsa laba pia di Su disipelnan, i seka nan ku e serbete ku E tabatin mara na Su sintura.

⁶Asina El a yega serka Simon Pedro. I Pedro a bis'E: "Senor, Abo ta laba mi pia?"

⁷Jesus a kontesta i a bis'e: "Loke Mi ta hasi bo no ta komprende awor, ma despues lo bo komprende."

⁸Pedro a bis'E: "Hamas lo Bo no laba mi pia!" Jesus a kontest'e: "Si Mi no lababo, bo no tin parti ku Mi."

⁹Simon Pedro a bis'E: "Senor, no mi pianan so, ma tambe mi mannan i mi kabes!"

¹⁰Jesus a bis'e: "Esun ku a bana mester laba su pia so, pasobra e ta kompletamente limpi; i boso ta limpi, ounke no tur."

¹¹Pasobra E tabata sa ta ken tabata bai traishon'E; pa e motibu aki El a bisa: "No ta boso tur ta limpi."

¹²I asina, ora ku El a kaba di laba nan pia i a bisti Su pana, i a bolbe sinta na mesa, El a bisa nan: "Boso sa kiko Mi a hasi ku boso?

¹³Boso ta yamaMi Maestro i Senor; i boso tin rason, pasobra esei Mi ta.

¹⁴Si Ami anto, e Senor i Maestro, a laba boso pia, boso tambe mester laba pia di otro.

¹⁵Pasobra Mi a duna boso un ehempel, pa boso tambe hasi manera Ami a hasi ku boso.

¹⁶Di berdat, di berdat, Mi ta bisa boso, un esklabu no ta mas ku su shon; ni esun ku a wordu manda no ta mas ku esun ku a mand'e.

¹⁷Si boso sa e kosnan aki, boso ta bendishona si boso hasi nan.

¹⁸"Mi no ta papia di boso tur. Mi konose esnan ku Mi a skohe; ma ta pa e Skritura wordu kumpli: 'Esun ku ta kome Mi pan a lanta su hilchi kontra Mi.'

¹⁹"For di awor kaba Mi ta bisa boso prome ku e sosode, pa ora ku e sosode, boso por kere ku ta Ami t'E.

²⁰Di berdat, di berdat, Mi ta bisa boso, ken ku risibi esun ku Mi manda, ta Ami e ta risibl; i ken ku risibiMi ta risibi Esun ku a mandaMi."

²¹Despues ku Jesus a kaba di bisa esaki, El a bira intrankil den spiritu i a duna testimonio, bisando: "Di berdat, di berdat, Mi ta bisa boso, ku un di boso lo traishonaMi."

²²E disipelnan a kuminsa wak otro, sin por a sak'afo ta di kual di nan E tabata papia.

²³Anto un di Su disipelnan, esun ku Jesus tabata stima, tabata len na Jesus Su pechu.

²⁴Pesei Simon Pedro a hasi sena kune i a bis'e: "Bisa nos ta ken t'esun ku E ta papia di dje."

²⁵Esaki a bolbe len na Jesus Su pechu i a puntr'E: "Senor, ta ken e ta?"

²⁶E ora ei Jesus a kontesta: "Esun ku Mi duna e pida pan ku Mi dop, esei t'e." Asina anto, ora ku El a dop e pida pan, El a koh'e duna Judas, yu homber di Simon Iskariot.

²⁷I despues ku Judas a tuma e pida pan, Satanas a drenta den dje. Anto Jesus a bis'e: "Loke bo tin di hasi, hasie lihe."

²⁸Ma ni un di esnan sinta na mesa no a komprende pakiko El a bis'e esei.

²⁹Pasobra algun di nan tabata supone ku ta pasobra Judas tabatin e kaha di plaka, Jesus a bis'e: "Kumpra loke nos tin mester pa e Fiesta", of ku e mester a duna algu na e pobernan.

³⁰I asina, despues di a tuma e pida pan, el a sali bai mesora; i tabata nochi.

³¹Anto ora ku el a sali, Jesus a bisa: "Awor e Yu di Hende ta glorifika, i Dios ta glorifika den djé;

³²si Dios ta glorifika den djé, Dios tambe lo glorifik'E den Su mes, i lo glorifik'E mesora.

³³"Mucha chikitunan, un poko tempu mas Mi ta serka boso. Boso lo buskaMi; i manera Mi a bisa e hudiunan, Mi ta bisa boso awor tambe: 'Kaminda Ami ta bai, boso no por bin.'

³⁴"Un mandamentu nobo Mi ta duna boso, pa boso stima otro, i meskos ku Ami a stima boso, pa boso tambe stima otro.

³⁵Na esaki tur hende lo sa ku boso ta Mi disipel, si boso tin amor un pa otro."

³⁶Simon Pedro a bis'E: "Senor, unda Bo ta bai?" Jesus a kontesta: "Kaminda Ami ta bai, bo no por siguiMi awor; ma lo bo sigui despues."

³⁷Pedro a puntr'E: "Senor, pakiko mi no por siguiBo awor aki mes? Lo mi duna mi bida pa Bo."

³⁸Jesus a kontesta: "Lo bo duna bo bida pa Mi? Di berdat, di berdat, Mi ta bisabo, gai lo no kanta prome ku bo a nengaMi tres biaha.