Read Papantla Totonac Evangelio Segun Juan 15 Bible Online

Evangelio Segun Juan 15 - Papantla Totonac bible

Evangelio Segun Juan 15

¹"Ami ta e berdadero mata di wendruif, i Mi Tata ta e kunukero.

²Tur rama den Mi ku no ta karga fruta, E ta kita, i tur rama ku ta karga fruta, E ta snui, pa esaki duna mas fruta.

³Boso ta limpi kaba pa motibu di e palabra ku Mi a papia ku boso.

⁴Keda den Mi, i Ami den boso. Meskos ku e rama no por karga fruta di su mes, si e no keda den e mata di wendruif, asina boso tampoko, si boso no keda den Mi.

⁵"Ami ta e mata di wendruif, boso ta e ramanan; esun ku keda den Mi, i Ami den dje, esei ta duna hopi fruta, pasobra separa di Mi boso no por hasi nada.

⁶Si un hende no keda den Mi, e ta wordu tira afo manera un rama i ta seka; i hende ta rekohe nan i ta tira nan den kandela, i nan ta wordu kima.

⁷Si boso keda den Mi, i Mi palabranan keda den boso, pidi tur loke boso kier, i esaki lo wordu hasi pa boso.

⁸Den esaki Mi Tata ta wordu glorifika, ku boso ta karga hopi fruta i asina ta demostra di ta Mi disipelnan.

⁹"Meskos ku e Tata a stimaMi, Ami tambe a stima boso; keda den Mi amor.

¹⁰Si boso warda Mi mandamentunan, boso lo keda den Mi amor; meskos ku Mi a warda e mandamentunan di Mi Tata, i ta keda den Su amor.

¹¹E kosnan aki Mi a papia ku boso, pa Mi goso por ta den boso, i boso goso por ta kompleto.

¹²Esaki ta Mi mandamentu, ku boso stima otro meskos ku Ami a stima boso.

¹³Ni un hende no tin amor mas grandi ku esaki, ku un hende ta duna su bida pa su amigunan.

¹⁴Boso ta Mi amigu, si boso hasi loke Mi ta ordena boso.

¹⁵Mi no ta yama boso esklabu mas, pasobra e esklabu no sa kiko su shon ta hasi; ma Mi a yama boso amigu, pasobra tur kos ku Mi a tende di Mi Tata, Mi a partisipa na boso.

¹⁶Boso no a skoheMi, ma Ami a skohe boso i a nombra boso, pa boso bai i duna fruta, i ku boso fruta lo keda, pa tur loke boso pidi e Tata den Mi nomber, E duna boso.

¹⁷Esaki Mi ta ordena boso, pa boso stima otro.

¹⁸"Si mundu odia boso, sa anto ku el a odia Ami prome ku boso.

¹⁹Si boso tabata di mundu, mundu lo a stima loke ta di dje; ma pasobra boso no ta di mundu, ma Ami a skohe boso for di den mundu, pesei mundu ta odia boso.

²⁰Korda riba e palabra ku Mi a bisa boso: 'Un esklabu no ta mas ku su shon.' Si nan a persiguiMi, boso tambe nan lo persigui; si nan a warda Mi palabra, nan lo warda di boso tambe.

²¹Ma tur e kosnan aki nan lo hasi ku boso pa kousa di Mi nomber, pasobra nan no konose Esun ku a mandaMi.

²²Si Mi no a bin i a papia ku nan, nan lo no tabatin pika, ma awor nan no tin diskulpa pa nan pika.

²³Esun ku ta odiaMi, ta odia Mi Tata tambe.

²⁴Si Mi no a hasi den nan e obranan ku ningun otro hende a hasi, nan lo no tabatin pika; ma awor nan a mira i a odia tantu Ami komo Mi Tata.

²⁵Ma nan a hasi esaki, pa e palabra ku ta para skirbi den nan Lei keda kumpli: 'Sin motibu nan a odiaMi.'

²⁶"Ora ku e Konsolador bin, Kende lo Mi manda serka boso for di e Tata, es desir e Spiritu di berdat, Kende ta sali for di e Tata, E lo duna testimonio di Mi,

²⁷i boso lo duna testimonio tambe, pasobra for di prinsipio boso tabata ku Mi.