Read Papantla Totonac Evangelio Segun Juan 16 Bible Online

Evangelio Segun Juan 16 - Papantla Totonac bible

Evangelio Segun Juan 16

¹"E kosnan aki Mi a papia ku boso, pa boso no trompeka.

²Nan lo saka boso for di snoa, ma e ora ta bin ku ken ku mata boso lo kere ku e ta ofrese sirbishi na Dios.

³I e kosnan aki nan lo hasi, pasobra nan no a konose e Tata, ni Ami.

⁴Ma e kosnan aki Mi a papia ku boso, pa ora e tempu yega, boso korda ku Mi a bisa boso tokante di nan. I e kosnan aki Mi no a bisa boso for di prinsipio, pasobra Mi tabata serka boso.

⁵"Ma awor Mi ta bai serka Esun ku a mandaMi; i ningun di boso no ta puntraMi: 'Unda Bo ta bai?'

⁶Ma pasobra Mi a papia e kosnan aki ku boso, tristesa a yena boso kurason.

⁷Ma Mi ta bisa boso e berdat, ta kumbini boso ku Mi ta bai; pasobra si Mi no bai, e Konsolador lo no bin serka boso; ma si Mi bai, lo Mi mand'E serka boso.

⁸I E, ora ku E bin, lo konbense mundu di pika, i di hustisia i di huisio;

⁹di pika, pasobra nan no ta kere den Mi;

¹⁰di hustisia, pasobra Mi ta bai serka e Tata, i boso no ta miraMi mas;

¹¹i di huisio, pasobra e prens di e mundu aki a wordu huzga.

¹²"Ainda Mi tin hopi kos mas di bisa boso, ma boso no por soporta nan awor.

¹³Ma ora ku E, e Spiritu di berdat, bin, E lo guia boso den tur berdat; pasobra E lo no papia di Su mes, ma tur loke E tende, E lo papia; i loke tin di bin, E lo revela na boso.

¹⁴E lo glorifikaMi, pasobra E lo tuma for di loke ta di Mi, i lo revela esaki na boso.

¹⁵Tur loke e Tata tin ta di Mi; pesei Mi a bisa ku E lo tuma for di loke ta di Mi i lo revela esaki na boso.

¹⁶"Un poko tempu mas i boso lo no miraMi mas, i atrobe un poko tempu i boso lo miraMi."

¹⁷Pesei algun di Su disipelnan tabata bisa otro: "Kiko e kos aki ta ku E ta bisa nos: 'Un poko tempu mas i boso lo no miraMi, i atrobe un poko tempu i boso lo miraMi'; i, 'pasobra Mi ta bai serka e Tata'?"

¹⁸I asina nan tabata bisa: "Kiko esaki ta ku E ta bisa: 'Un poko tempu mas'? Nos no sa di kiko E ta papia."

¹⁹Jesus tabata sa ku nan kier a hasié pregunta, i El a bisa nan: "Ta delibera boso ta delibera ku otro tokante di loke Mi a bisa: 'Un poko tempu mas i boso lo no miraMi, i atrobe un poko tempu i boso lo miraMi'?

²⁰Di berdat, di berdat, Mi ta bisa boso, ku boso lo yora i lamenta, ma mundu lo regosiha; i boso lo ta tristu, ma boso tristesa lo bira goso.

²¹Ki ora ku un muhe ta den dolo di parto, e tin tristesa, pasobra su ora a yega; ma despues ku el a duna lus na e yu, e no ta korda riba e ansha mas, di goso ku un yu a bin na mundu.

²²Pesei boso tambe tin tristesa awor; ma lo Mi mira boso atrobe, i boso kurason lo regosiha, i ni un hende lo no kita boso goso for di boso.

²³I riba e dia ei boso lo no hasiMi ningun pregunta. Di berdat, di berdat, Mi ta bisa boso, kiko ku boso pidi e Tata, E lo duna boso den Mi nomber.

²⁴Te ainda boso no a pidi nada den Mi nomber; pidi, i boso lo risibi, pa boso goso por ta kompleto.

²⁵"E kosnan aki Mi a papia ku boso den komparashon; ma e ora ta bin ku lo Mi no papia mas ku boso den komparashon, ma lo Mi papia bon kla ku boso tokante di e Tata.

²⁶Den e dia ei boso lo pidi den Mi nomber, i Mi no ta bisa boso ku lo Mi pidi e Tata pa boso;

²⁷komo ku e Tata mes ta stima boso, pasobra boso a stimaMi i a kere ku Mi a sali for di e Tata.

²⁸Mi a sali for di e Tata i a bin den mundu; Mi ta sali for di mundu atrobe i ta bai serka e Tata."

²⁹Su disipelnan a bisa: "Mira, awor Bo ta papia bon kla, sin uza komparashon.

³⁰Awor nos sa ku Bo sa tur kos i no tin mester pa ningun hende hasiBo pregunta; pesei nos ta kere ku Bo a bin for di Dios."

³¹Jesus a kontesta nan: "Boso ta kere awor?

³²Ata e ora ta bin i a yega kaba, ku boso lo wordu plama, kada un pa su mes kas, i lo lagaMi so. I tog Mi no ta so, pasobra e Tata ta ku Mi.

³³"E kosnan aki Mi a papia ku boso, pa den Mi boso por tin pas. Den mundu boso tin tribulashon, ma tene kurashi, Mi a vense mundu."