Read Papantla Totonac Evangelio Segun Juan 18 Bible Online

Evangelio Segun Juan 18 - Papantla Totonac bible

Evangelio Segun Juan 18

¹Despues ku Jesus a kaba di papia e palabranan aki, El a sali bai ku Su disipelnan pa e otro banda di Roi Kedron, kaminda tabatin un hofi den kual El a drenta ku Su disipelnan.

²Awor Judas tambe, kende a traishon'E, tabata sa di e luga ei, pasobra hopi biaha Jesus a reuni ayanan ku Su disipelnan.

³Judas anto, kompana pa un batayon romano i ofisialnan di e saserdotenan prinsipal i e fariseonan, a bin ayanan ku lanterna, flambeu i arma.

⁴E ora ei Jesus, sabiendo tur kos ku tabata bai pasa kuné, a sali bai pafo i a bisa nan: "Ta ken boso ta buska?"

⁵Nan a kontest'E: "Jesus di Nazaret." El a bisa nan: "Ta Ami t'E." I Judas tambe, kende a traishon'E, tabata para huntu ku nan.

⁶I ora ku El a bisa nan: "Ta Ami t'E," nan a hal'atras i a kai abou na suela.

⁷Anto El a bolbe puntra nan: "Ta ken boso ta buska?" I nan a bisa: "Jesus di Nazaret."

⁸Jesus a kontesta: "Mi a bisa boso ku ta Ami t'E; pesei, si ta Ami boso ta buska, laga esakinan bai,"

⁹pa e palabra ku El a papia keda kumpli: "Di esnan ku Bo a dunaMi, Mi no a perde ni un."

¹⁰E ora ei Simon Pedro, kende tabatin un spada, a sak'e i a dal e sumosaserdote su esklabu kap su orea drechi kit'afo; i nomber di e esklabu tabata Malko.

¹¹E ora ei Jesus a bisa Pedro: "Hinka e spada den balina; e kopa ku Mi Tata a dunaMi, lo Mi no beb'e?"

¹²Anto e batayon romano i e komandante i e ofisialnan di e hudiunan a aresta Jesus, a mar'E

¹³i a hib'E prome serka Anas; pasobra Anas tabata suegro di Kaifas, kende tabata sumosaserdote e ana ei.

¹⁴Awor Kaifas tabata esun ku a duna e hudiunan e konseho ku tabata kumbini pa un hende muri pa e pueblo.

¹⁵I Simon Pedro tabata sigui Jesus, i un otro disipel tambe. Awor e disipel ei tabata un konosi di e sumosaserdote i el a drenta huntu ku Jesus bai den e plenchi di e sumosaserdote,

¹⁶ma Pedro tabata para pafo na porta. Anto e otro disipel, kende tabata un konosi di e sumosaserdote, a bai pafo i a papia ku e wardado di porta, i a trese Pedro paden.

¹⁷Anto e mucha muhe esklabu ku tabata tene warda na porta a bisa Pedro: "Abo tambe no ta un di e disipelnan di e Homber ei?" Pedro a kontesta: "Ami no."

¹⁸Awor e esklabunan i e ofisialnan tabata para einan ta keinta nan kurpa na un kandela di karbon ku nan a sende, pasobra tabata hasi friu; i Pedro tambe tabata para huntu ku nan ta keinta kurpa.

¹⁹E ora ei e sumosaserdote a hasi Jesus pregunta tokante di Su disipelnan i tokante di Su sinansa.

²⁰Jesus a kontest'e: "Mi a papia abiertamente ku mundu; semper Mi tabata sina e hendenan den snoa i den tempel, kaminda tur e hudiunan ta reuni, i Mi no a papia nada na sekreto.

²¹Pakiko bo ta hasiMi pregunta? Puntra esnan ku a tende kiko Mi a papia ku nan; mira, esakinan sa kiko Mi a bisa."

²²I ora ku El a kaba di bisa esaki, un di e ofisialnan ku tabata para einan a dal Jesus un bofta, bisando: "T'asina Bo ta kontesta e sumosaserdote?"

²³Jesus a kontest'e: "Si Mi a bisa algu malu, splika kiko tabata malu, ma si loke Mi a bisa tabata bon, pakiko bo ta dal Mi?"

²⁴Anas anto a mand'E mara serka e sumosaserdote Kaifas.

²⁵Awor Simon Pedro tabata para einan ta keinta kurpa. E ora ei nan a bis'e: "Abo tambe no ta un di Su disipelnan?" El a nenga i a bisa: "Ami no."

²⁶Un di e esklabunan di e sumosaserdote, siendo famia di esun ku Pedro a kita su orea afo, a bisa: "Mi no a mirabo huntu kuné den e hofi?"

²⁷Anto Pedro a nenga atrobe i mesora un gai a kanta.

²⁸I nan a hiba Jesus for di kas di Kaifas pa e Pretorio, i tabata mainta tempran. I nan mes no a bai den e Pretorio, pa nan no wordu kontamina, ma pa nan por kome e Pasku.

²⁹E ora ei Pilato a sali pafo serka nan i a bisa: "Ki akusashon boso ta trese kontra e Homber aki?"

³⁰Nan a kontesta i a bis'e: "Si e Homber aki no tabata un malbado, nos lo no a entregu'E na bo."

³¹E ora ei Pilato a bisa nan: "Boso mes bai kuné i huzgu'E segun boso Lei." I e hudiunan a bis'e: "Lei no ta permiti nos mata ningun hende,"

³²pa e palabra di Jesus por keda kumpli, ku El a papia, indikando ki sorto di morto E lo a bai muri.

³³Anto Pilato a bolbe bai den e Pretorio, i a yama Jesus i a bis'E: "Ta Abo ta e Rei di e hudiunan?"

³⁴Jesus a kontesta: "Bo ta bisa esaki di bo mes of ta otronan a kontabo di Mi?"

³⁵Pilato a kontesta: "Ami ta hudiu anto? Bo mes pueblo i e saserdotenan prinsipal a entregaBo na mi; kiko Bo a hasi?"

³⁶Jesus a kontesta: "Mi reino no ta di e mundu aki. Si Mi reino tabata di e mundu aki, Mi sirbidonan lo a bringa, pa Mi no wordu entrega na e hudiunan; ma t'asina ku Mi reino no ta di e mundu aki."

³⁷Pesei, Pilato a puntr'E: "Abo ta un rei anto?" Jesus a kontesta: "Bo ta bisa ku Mi ta rei. Pa esaki Mi a nase i pa esaki Mi a bin den mundu, pa duna testimonio di e berdat. Tur esnan ku ta di e berdat ta tende Mi bos."

³⁸Pilato a puntr'E: "Kiko ta berdat?" I ora ku el a kaba di bisa esaki, el a bolbe bai pafo serka e hudiunan i a bisa nan: "Mi no ta hana ningun kulpa den djé.

³⁹Ma boso tin un kustumber, ku riba dia di Pasku mi ta duna libertat na un hende pa boso; boso kier anto pa mi duna e Rei di e hudiunan libertat pa boso?"

⁴⁰I nan a bolbe grita, bisando: "No e Homber aki, ma Barabas!" Awor Barabas tabata un ladron.