Read Papantla Totonac Evangelio Segun Juan 19 Bible Online

Evangelio Segun Juan 19 - Papantla Totonac bible

Evangelio Segun Juan 19

¹E ora ei Pilato a tuma Jesus i a laga sut'E.

²I e soldanan a flegt un korona di sumpina i a pon'e riba Su kabes, i a bistié un mantel purpura;

³i nan a aserk'E i a bisa: "Saludo, Rei di e hudiunan!" I nan tabata dal E den Su kara.

⁴I Pilato a sali pafo atrobe, i a bisa nan: "Mira, mi ta tres'E pa boso, pa boso sa ku ami no ta hana ningun kulpa den djé."

⁵Jesus anto a sali pafo, bisti ku e korona di sumpina i e mantel purpura. I Pilato a bisa nan: "Ata e Homber!"

⁶Anto ora ku e saserdotenan prinsipal i e ofisialnan a mir'E, nan a grita, bisando: "Krusifik'E, krusifik'E!" Pilato a bisa nan: "Boso mes tum'E i krusifik'E, pasobra ami no ta hana ningun kulpa den djé."

⁷E hudiunan a kontest'e: "Nos tin un Lei, i segun e Lei ei E mester muri, pasobra El a pretende di ta e Yu di Dios."

⁸Ora Pilato a tende e palabranan aki, el a hana mas miedu ainda;

⁹i el a bolbe bai den e Pretorio i a bisa Jesus: "Di unda Bo ta?" Ma Jesus no a dun'e kontesta.

¹⁰E ora ei Pilato a bis'E: "Bo no ta papia ku mi? Bo no sa ku mi tin outoridat pa dunaBo libertat, i ku mi tin outoridat pa krusifikaBo?"

¹¹Jesus a kontesta: "Lo bo no tabatin ningun outoridat riba Mi, si esei no a wordu duna na bo for di ariba; pesei, esun ku a entregaMi na bo tin pika mas grandi."

¹²For di e momento ei Pilato tabata buska pa dun'E libertat, ma e hudiunan tabata grita, bisando: "Si bo duna e Homber aki libertat, bo no ta amigu di Cesar; ken ku hasi su mes rei ta kontra Cesar."

¹³Ora Pilato a tende e palabranan aki, el a hiba Jesus pafo, i a bai sinta riba e stul di hues, na un luga ku yama Litostrotos, of na hebreo Gabata.

¹⁴Awor tabata e dia di preparashon pa Pasku, i tabata mas o menos diesdos or di merdia. I el a bisa e hudiunan: "Ata boso Rei!"

¹⁵E ora ei nan a grita: "Deshasi di djé, deshasi di djé, krusifik'E!" Pilato a puntra nan: "Mi mester krusifika boso Rei?" E saserdotenan prinsipal a kontesta: "Nos no tin otro rei, sino solamente Cesar."

¹⁶Asina anto el a entregu'E na nan pa wordu krusifika.

¹⁷Anto nan a bai ku Jesus, i E, kargando Su krus, a sali bai na e luga ku yama Luga di Kalpachi, ku na hebreo ta wordu yama Golgota.

¹⁸Ayanan nan a krusifik'E, i huntu kuné dos otro homber, un na kada banda, i Jesus meimei.

¹⁹I Pilato a skirbi un inskripshon tambe i a pone esei na e krus. I riba dje tabatin skirbi: "JESUS DI NAZARET, E REI DI E HUDIUNAN."

²⁰Anto hopi di e hudiunan a lesa e inskripshon aki, pasobra e luga kaminda Jesus a wordu krusifika tabata keda pega ku stat; i e tabata skirbi na hebreo, latin i griego.

²¹I pesei, e saserdotenan prinsipal di e hudiunan a bisa Pilato: "No skirbi: 'E Rei di e hudiunan'; ma ku El a bisa: 'Ami ta e Rei di e hudiunan.'"

²²Pilato a kontesta: "Loke mi a skirbi, mi a skirbi."

²³E soldanan anto, ora nan a krusifika Jesus, a kohe Su pananan i a parti nan na kuater, pa kada solda un parti, i e tunika tambe. Awor e tunika tabata sin nat, gewef na un solo pida.

²⁴Nan a bisa otro anto: "Laga nos no sker esaki, ma tira lot riba dje, pa disidi di ken e lo ta." Pa e Skritura por a keda kumpli: "Nan a parti Mi pananan entre nan, i nan a tira lot riba Mi pana."

²⁵E kosnan aki anto e soldanan a hasi. Ma banda di e krus di Jesus tabata para Su mama, i ruman muhe di Su mama (Maria, esposa di Klopas), i Maria Magdalena.

²⁶I ora Jesus a mira Su mama, i e disipel ku E tabata stima, para einan El a bisa Su mama: "Muhe, ata bo yu!"

²⁷Despues El a bisa e disipel: "Ata bo mama!" I for di e ora ei e disipel a tum'e serka dje den kas.

²⁸Despues di esaki, Jesus, sabiendo ku tur kos a keda kumpli kaba, pa e Skritura por wordu kumpli, a bisa: "Mi tin set."

²⁹I tabatin un butishi yen di binager poni einan; i nan a hinka un spons, papa ku binager, riba un richi di hisop i a pone esaki na Su boka.

³⁰Ora Jesus a tuma e binager, El a bisa: "Ta kumpli!" I El a baha Su kabes i a entrega Su spiritu.

³¹E ora ei e hudiunan, komo ku tabata dia di preparashon, asina ku e kurpanan no tabatin mag di keda na krus riba Sabat--pasobra e Sabat ei tabata un gran dia--a pidi Pilato pa por kibra nan pianan i pa nan wordu kita for di einan.

³²E soldanan anto a bin i a kibra e pianan di e prome homber, i di e otro homber ku a wordu krusifika huntu kuné;

³³ma ora nan a yega serka Jesus i a mira ku El a muri kaba, nan no a kibra Su pianan;

³⁴ma un di e soldanan a traspasa Su kustia ku un lansa i mesora a sali sanger i awa.

³⁵I esun ku a mira a duna testimonio, i su testimonio ta berdadero; i e sa ku e ta papia e berdat, pa boso tambe por kere.

³⁶Pasobra e kosnan aki a sosode pa e Skritura por wordu kumpli: "Ni un wesu di djé lo no wordu kibra."

³⁷I tambe un otro Skritura ta bisa: "Nan lo mira riba Esun ku nan a traspasa."

³⁸I despues di e kosnan aki Jose di Arimatea, siendo un disipel di Jesus, ma na sekreto pa miedu di e hudiunan, a pidi Pilato pa e por hiba e kurpa di Jesus; i Pilato a duna permit. El a bin anto i a hiba e kurpa di Jesus.

³⁹I Nikodemo tambe a bin, kende na prinsipio a bin serka djé den anochi; el a trese un meskla di mirra i aloe, komo shen liber.

⁴⁰I asina nan a tuma e kurpa di Jesus i a lor'e den tela di lino ku e spesereinan, segun e kustumber di deramentu di e hudiunan.

⁴¹Awor na e luga kaminda El a wordu krusifika tabatin un hofi; i den e hofi tabatin un tumba nobo, den kual nunka ainda un hende no a wordu poni.

⁴²Anto ayanan nan a pone Jesus pa motibu di e dia di preparashon di e hudiunan, komo ku e tumba tabata keda serka.