Read Papantla Totonac Evangelio Segun Juan 2 Bible Online

Evangelio Segun Juan 2 - Papantla Totonac bible

Evangelio Segun Juan 2

¹I riba e di tres dia tabatin un kasamentu na Kana di Galilea, i e mama di Jesus tabata einan;

²i Jesus ku Su disipelnan tambe tabata kombida pa e kasamentu.

³I ora bina a kaba, e mama di Jesus a bis'E: "Nan no tin mas bina."

⁴I Jesus a bis'e: "Muhe, kiko Mi tin di hasi ku bo? Mi ora no a yega ainda."

⁵Su mama a bisa e sirbidonan: "Kiko ku E bisa boso, hasie."

⁶Awor einan tabatin seis tinashi di piedra pa pone awa aden, segun e kustumber di purifikashon di e hudiunan, kada un ku un kontenido di binti pa trinta galon.

⁷Jesus a bisa nan: "Yena e tinashinan ku awa." I nan a yena nan te na rant.

⁸I El a bisa nan: "Awor saka poko afo i hib'e pa e botelier." I nan a hib'e p'e.

⁹I ora ku e botelier a purba e awa ku a bira bina, i no tabata sa for di unda esaki a bin (ma e sirbidonan ku a saka e awa si tabata sa), e botelier a yama e bruidehom,

¹⁰i a bis'e: "Tur hende ta sirbi e bon bina prome, i despues ku e hendenan a bebe basta, esun di kalidat inferior; ma abo a warda e bon bina te awor."

¹¹E prinsipio aki di Su milagernan Jesus a hasi na Kana di Galilea, i a manifesta Su gloria; i Su disipelnan a kere den djé.

¹²Despues di esaki El a bai Kapernaum, E i Su mama, Su ruman hombernan i Su disipelnan; i aya nan a keda algun dia.

¹³I e Pasku di e hudiunan tabata serka, i Jesus a bai Jerusalem.

¹⁴I El a hana sinta den tempel esnan ku tabata bende buey, karne i palomba, i e kambiadonan di plaka.

¹⁵I El a traha un zwip di kabuya i a saka nan tur for di tempel, huntu ku e karnenan i e bueynan; i El a basha e plaka di e kambiadonan abou i a bolter nan mesanan;

¹⁶i na esnan ku tabata bende palomba El a bisa: "Kita e kosnan aki for di einan; stop di hasi e kas di mi Tata un kas di negoshi."

¹⁷Su disipelnan a korda ku tabata para skirbi: "E zelo pa Bo kas lo kaba ku Mi."

¹⁸Pesei, e hudiunan a kontesta i a bis'E: "Ki senal Bo ta mustra nos, ku Bo mag hasi e kosnan aki?"

¹⁹Jesus a kontesta i a bisa nan: "Destrui e tempel aki i den tres dia lo Mi lant'e."

²⁰Pesei, e hudiunan a bisa: "A tuma kuarent'i seis ana pa traha e tempel aki, anto Abo lo lant'e den tres dia?"

²¹Ma E tabata papia di e tempel di Su kurpa.

²²Pesei ora ku El a wordu lanta for di e mortonan, Su disipelnan a korda ku El a bisa esaki; i nan a kere e Skritura i e palabra ku Jesus a papia.

²³Awor ora ku E tabata na Jerusalem durante di e Fiesta di Pasku, hopi hende a kere den Su nomber ora nan a mira Su milagernan ku E tabata hasi.

²⁴Ma Jesus, di Su parti, no tabata konfia Su mes na nan, pasobra E tabata konose tur hende,

²⁵i pasobra E no tabatin mester di ningun hende pa duna testimonio tokante di hende, komo ku E mes tabata sa kiko tabatin den hende.