Read Papantla Totonac Evangelio Segun Juan 20 Bible Online

Evangelio Segun Juan 20 - Papantla Totonac bible

Evangelio Segun Juan 20

¹Awor riba e prome dia di siman Maria Magdalena a bin tempran na e tumba, mientras ku tabata skur ainda, i a mira ku e piedra tabata kita for di e tumba.

²I asina el a kore bin serka Simon Pedro, i serka e otro disipel ku Jesus tabata stima, i a bisa nan: "Nan a saka Senor for di e tumba bai kuné, i nos no sa unda nan a pon'E."

³Anto Pedro a sali i tambe e otro disipel i nan a bai na e tumba.

⁴I nan dos tabata kore huntu; i e otro disipel a kore bai dilanti, mas lihe ku Pedro, i a yega prome na e tumba;

⁵i ora ku el a buk abou wak paden, el a mira e pananan di lino einan, ma e no a drenta.

⁶E ora ei Simon Pedro tambe a bin su tras i a bai den e tumba; i el a mira e pananan di lino einan,

⁷ma e lensu, ku tabata na Su kabes, no tabata huntu ku e pananan di lino, ma lora apart na su mes luga.

⁸E ora ei a drenta tambe e otro disipel ku a yega prome na e tumba, i el a mira i a kere.

⁹Pasobra ainda nan no tabata komprende Skritura, ku E mester lanta for di e mortonan.

¹⁰Asina e disipelnan a bai nan kas atrobe.

¹¹Ma Maria tabata para pafo di e tumba ta yora. I mientras ku e tabata yora el a buk wak den e tumba,

¹²i el a mira dos angel bisti na blanku, sinta, un na kabes i un na pia, kaminda e kurpa di Jesus a wordu poni.

¹³I nan a bis'e: "Muhe, pakiko bo ta yora?" El a kontesta nan: "Pasobra nan a bai ku mi Senor, i mi no sa unda nan a pon'E."

¹⁴Ora ku el a bisa esaki, el a drai wak i a mira Jesus para einan, ma e no tabata sa ku tabata Jesus.

¹⁵Jesus a bis'e: "Muhe, pakiko bo ta yora? Ta ken bo ta buska?" Keriendo ku E tabata e kuidado di hofi e muhe a bis'E: "Senor, si ta bo a kargu'E bai kuné, bisami unda bo a pon'E, i lo mi koh'E bai kuné."

¹⁶Jesus a bis'e: "Maria!" El a drai wak i a bis'E na hebreo: "Rabuni!" ku ta nifika: Maestro.

¹⁷Jesus a bis'e: "No teneMi, pasobra ainda Mi no a subi bai serka e Tata; ma bai serka Mi rumannan i bisa nan: 'Mi ta subi bai serka Mi Tata i boso Tata, serka Mi Dios i boso Dios.'"

¹⁸Maria Magdalena a bai i a konta e disipelnan ku el a mira Senor, i ku El a papia e kosnan aki kune.

¹⁹Anto ora nochi a sera riba e dia ei, e prome dia di siman, i ora ku e portanan tabata sera kaminda e disipelnan tabata, pa miedu di e hudiunan, Jesus a bin para meimei di nan i a bisa nan: "Pas sea ku boso."

²⁰I ora ku El a kaba di bisa esaki El a mustra nan Su mannan i Su kustia. I e disipelnan a bira kontentu ora nan a mira Senor.

²¹Anto Jesus a bolbe bisa nan: "Pas sea ku boso! Manera e Tata a mandaMi, Ami tambe ta manda boso."

²²I ora ku El a kaba di bisa esaki, El a supla riba nan i a bisa nan: "Risibi Spiritu Santu.

²³Esnan ku boso pordona nan pikanan, e pikanan ei ta wordu pordona na nan, i esnan ku boso no pordona nan pikanan, e pikanan ei nan ta keda ku nan."

²⁴Ma Tomas, un di e diesdosnan, kende ta wordu yama Didimo, no tabata huntu ku nan ora Jesus a bin.

²⁵E otro disipelnan anto a bis'e: "Nos a mira Senor!" Ma el a bisa nan: "Si mi no mira den Su mannan e marka di e klabunan i hinka mi dede den e luga di e klabunan i hinka mi man den Su kustia, mi no ta kere."

²⁶I ocho dia despues Su disipelnan tabata paden atrobe i Tomas huntu ku nan. I mientras ku e portanan tabata sera, Jesus a bin para meimei di nan i a bisa: "Pas sea ku boso."

²⁷Despues El a bisa Tomas: "Trese bo dede akinan i wak Mi mannan; i trese bo man i hink'e den Mi kustia; i no sea inkredulo, ma kere."

²⁸Tomas a kontesta i a bis'E: "Mi Senor i mi Dios!"

²⁹Jesus a bis'e: "Ta pasobra bo a miraMi, bo a kere? Bendishona ta esnan ku no a mira i tog a kere."

³⁰Tambe Jesus a hasi hopi otro senal den presensia di Su disipelnan, kualnan no ta para skirbi den e buki aki;

³¹ma esakinan a wordu skirbi pa boso kere ku Jesus ta e Cristo, e Yu di Dios; i pa, keriendo, boso por tin bida den Su nomber.