Read Papantla Totonac Evangelio Segun Juan 21 Bible Online

Evangelio Segun Juan 21 - Papantla Totonac bible

Evangelio Segun Juan 21

¹Despues di e kosnan aki Jesus a bolbe parese na Su disipelnan na laman di Tiberias, i di e manera aki El a parese na nan.

²Tabata huntu: Simon Pedro, Tomas, kende ta wordu yama Didimo, Natanael di Kana di Galilea, e yu hombernan di Zebedeo i dos mas di Su disipelnan.

³Simon Pedro a bisa nan: "Mi ta bai piska." Nan a bis'e: "Nos tambe ta bai ku bo." Nan a sali bai den boto; i e anochi ei nan no a kohe nada.

⁴Ma ora dia a kuminsa habri, Jesus tabata para kantu di laman; ma e disipelnan no tabata sa ku tabata Jesus.

⁵Anto Jesus a bisa nan: "Yunan, boso tin algun piska?" Nan a kontest'E: "No."

⁶I El a bisa nan: "Tira reda na banda drechi di e boto i boso lo hana algu." E ora ei nan a tira reda i nan no tabata por a hal'e pa motibu di e kantidat grandi di piska.

⁷Anto e disipel ei ku Jesus tabata stima a bisa Pedro: "Ta Senor." I ora Simon Pedro a tende ku tabata Senor, el a bisti su pana djariba, pasobra e tabata sunu, i a tira su mes den laman.

⁸Ma e otro disipelnan a bin den e boto chikitu, pasobra nan no tabata leu for di tera, solamente nobenta meter, i nan tabata hala e reda yen-yen di piska.

⁹I ora nan a yega tera, nan a mira un kandela di karbon tur prepara, ku piska poni riba dje, i pan.

¹⁰Jesus a bisa nan: "Trese algun di e piskanan ku boso a kaba di kohe."

¹¹Simon Pedro a bai den boto i a hala e reda trese riba tera, yen di piska grandi, komo shent'i sinkuent'i tres; i apesar ku nan tabata asina hopi, tog e reda no a kibra.

¹²Jesus a bisa nan: "Bin desayuna." Ningun di e disipelnan no a tribi puntr'E: "Ta Ken Bo ta?" sabiendo ku tabata Senor.

¹³Jesus a bin i a kohe e pan i a duna nan, i e piska tambe.

¹⁴Awor esaki ta di tres biaha ku Jesus a manifesta Su mes na Su disipelnan, despues ku El a wordu lanta for di e mortonan.

¹⁵Anto despues ku nan a kaba di desayuna, Jesus a bisa Simon Pedro: "Simon, yu di Jonas, bo ta stimaMi mas ku esakinan?" El a kontest'E: "Si, Senor; Bo sa ku mi ta stimaBo." El a bis'e: "Kuida Mi lamchinan."

¹⁶El a bolbe bis'e pa di dos biaha: "Simon, yu di Jonas, bo ta stimaMi?" El a kontest'E: "Si, Senor, Bo sa ku mi ta stimaBo." El a bis'e: "Pastoria Mi karnenan."

¹⁷El a bis'e pa di tres biaha: "Simon, yu di Jonas, bo ta stimaMi?" Pedro a bira tristu, pasobra pa di tres biaha El a bis'e: "Bo ta stimaMi?" I el a kontest'E: "Senor, Bo sa tur kos; Bo sa ku mi ta stimaBo." Jesus a bis'e: "Kuida Mi karnenan.

¹⁸Di berdat, di berdat, Mi ta bisabo, tempu ku bo tabata mas hoben, bo tabata faha bo mes i kana kaminda ku bo tabata kier; ma dia bo bira bieu lo bo saka bo mannan, i un otro lo fahabo i hibabo kaminda bo no kier bai."

¹⁹Awor esaki El a bisa, indikando ku ki sorto di morto e lo a glorifika Dios. I ora ku El a kaba di bisa esaki, El a bis'e: "SiguiMi!"

²⁰I Pedro a drai wak, i a mira e disipel ku Jesus tabata stima ta sigui nan, esun ku na e sena tabata len tambe na Su pechu i ku a bisa: "Senor, ta ken ta esun ku ta traishonaBo?"

²¹Ora Pedro a mir'e, el a bisa Jesus: "Senor, i kiko lo ta di e homber aki?"

²²Jesus a bis'e: "Si Mi kier pa e keda te ora Mi bin, ta bo asunto esei? Abo siguiMi!"

²³Asina e palabra aki a plama den e rumannan, ku e disipel ei lo no muri; ma Jesus no a bis'e ku e lo no muri, ma solamente: "Si Mi kier pa e keda te ora Mi bin, ta bo asunto esei?"

²⁴Esaki ta e disipel ku ta duna testimonio di e kosnan aki i ku a skirbi e kosnan aki; i nos sa ku su testimonio ta berdadero.

²⁵I tambe tin hopi kos mas ku Jesus a hasi, ku si nan a wordu skirbi un pa un, mi ta supone ku ni mundu henter lo no por a kontene e bukinan ku lo a wordu skirbi. Amen.