Read Papantla Totonac Evangelio Segun Juan 3 Bible Online

Evangelio Segun Juan 3 - Papantla Totonac bible

Evangelio Segun Juan 3

¹Awor tabatin un homber di e fariseonan, kende tabata yama Nikodemo, un gobernante di e hudiunan;

²e homber aki a bin serka Jesus den anochi i a bis'E: "Rabi, nos sa ku Bo a bin di Dios komo un maestro, pasobra ni un hende no por hasi e milagernan aki ku Abo ta hasi si Dios no ta kune."

³Jesus a kontesta i a bis'e: "Di berdat, di berdat, Mi ta bisabo, si un hende no nase di nobo, e no por mira e reino di Dios."

⁴Nikodemo a bis'E: "Kon un hende por nase ora ku e ta bieu? Akaso e por drenta den barika di su mama pa di dos biaha i nase?"

⁵Jesus a kontesta: "Di berdat, di berdat, Mi ta bisabo, si un hende no nase di awa i di e Spiritu, e no por drenta e reino di Dios.

⁶Loke ta nasi di karni, ta karni, i loke ta nasi di e Spiritu, ta spiritu.

⁷No keda strana ku Mi a bisabo: 'Bo mester nase di nobo.'

⁸Bientu ta supla unda ku e kier i bo ta tende su zonidu, ma bo no sa di unda e ta bin ni na unda e ta bai; asina ta tur esnan ku nase di e Spiritu."

⁹Nikodemo a kontesta i a bis'E: "Kon e kosnan aki por ta?"

¹⁰Jesus a kontesta i a bis'e: "Abo ta e maestro di Israel, i bo no ta komprende e kosnan aki?

¹¹Di berdat, di berdat, Mi ta bisabo, nos ta papia loke nos sa, i ta duna testimonio di loke nos a mira; i boso no ta risibi nos testimonio.

¹²Si Mi a konta boso kosnan terenal i boso no ta kere, kon boso lo kere si Mi konta boso kosnan selestial?

¹³I ni un hende no a subi na shelu, sino Esun ku a baha for di shelu, esta, e Yu di Hende.

¹⁴I meskos ku Moises a halsa e kolebra den desierto, asina tambe e Yu di Hende mester wordu halsa,

¹⁵pa ken ku kere den djé por tin bida eterno.

¹⁶"Pasobra Dios a stima mundu asina tantu, ku El a duna Su Yu unigenito, pa ken ku kere den djé no bai perdi, ma tin bida eterno.

¹⁷Pasobra Dios no a manda e Yu den mundu pa kondena mundu, ma pa mundu wordu salba dor di djé.

¹⁸Esun ku kere den djé no ta kondena; esun ku no ta kere ta kondena kaba, pasobra e no a kere den e nomber di e Yu unigenito di Dios.

¹⁹I esaki ta e kondenashon, ku e lus a bin den mundu, i hende tabata stima e skuridat mas ku e lus; pasobra nan echonan tabata malu.

²⁰Pasobra esun ku ta hasi maldat ta odia e lus, i no ta bin na e lus, pa su echonan no wordu eksponi.

²¹Ma esun ku ta praktika berdat ta bin na e lus, pa por wordu manifesta ku su echonan ta wordu hasi den Dios."

²²Despues di e kosnan aki Jesus i Su disipelnan a bin na tera di Judea, i ayanan El a pasa un tempu huntu ku nan i tabata batisa.

²³I Juan tambe tabata batisa na Enon pega ku Salim, pasobra ayanan tabatin hopi awa; i e hendenan tabata bin i tabata wordu batisa.

²⁴Pasobra Juan no a wordu tira den prizon ainda.

²⁵E ora ei a surgi un diskushon entre e disipelnan di Juan i un hudiu tokante di purifikashon.

²⁶I nan a bin serka Juan i a bis'e: "Rabi, Esun ku tabata serka bo na e otro banda di Jordan, di Kende bo a duna testimonio, mira, E ta batisa i tur hende ta bin serka djé."

²⁷Juan a kontesta i a bisa: "Un hende no por risibi nada, si esei no a wordu duna na dje for di shelu.

²⁸Boso mes ta mi testigu ku mi a bisa: 'Ami no ta e Cristo,' ma: 'Mi a wordu manda Su dilanti.'

²⁹Esun ku tin e bruit ta e bruidehom, ma e amigu di e bruidehom, ku ta para serka i ta tend'e, ta regosiha grandemente pa motibu di e bos di e bruidehom. I asina e goso aki di mi a keda kumpli.

³⁰E mester oumenta, ma ami mester bira menos.

³¹"Esun ku ta bin for di ariba ta riba tur; esun ku ta di mundu, di mundu e ta i ta papia di mundu. Esun ku ta bin for di shelu ta riba tur.

³²Loke ku El a mira i tende, di esei E ta duna testimonio, i ningun hende no ta risibi Su testimonio.

³³Esun ku a risibi Su testimonio a konfirma ku Dios ta berdadero.

³⁴Pasobra Esun ku Dios a manda ta papia e palabranan di Dios, pasobra Dios ta duna e Spiritu sin midi.

³⁵E Tata ta stima e Yu, i a entrega tur kos den Su man.

³⁶Esun ku kere den e Yu tin bida eterno; ma esun ku no obedese e Yu lo no mira bida, ma e furia di Dios ta keda riba dje."