Read Papantla Totonac Evangelio Segun Juan 4 Bible Online

Evangelio Segun Juan 4 - Papantla Totonac bible

Evangelio Segun Juan 4

¹Pesei ora Senor a hana sa ku e fariseonan a tende ku Jesus tabata hana i batisa mas disipel ku Juan

²(ounke ku Jesus mes no tabata batisa, sino Su disipelnan),

³El a sali for di Judea i a bolbe bai Galilea.

⁵Asina El a yega na un stat di Samaria ku yama Sikar, pega ku e pida tereno ku Jakob a duna su yu homber Jose;

⁶i ayanan e pos di Jakob tabata. Jesus anto, kansa di Su biahe, a kai sinta na e pos. I tabata mas o menos diesdos or di merdia.

⁷A bin un muhe samaritano pa saka awa. Jesus a bis'e: "DunaMi di bebe."

⁸Pasobra Su disipelnan a bai den stat pa kumpra kuminda.

⁹Anto e muhe samaritano a bis'E: "Kon por ta ku Abo, siendo un hudiu, ta pidi ami, un muhe samaritano, pa dunaBo di bebe?" (Pasobra hudiu no tin nada di aber ku samaritano.)

¹⁰Jesus a kontesta i a bis'e: "Si bo tabata konose e don di Dios i ta Ken ta Esun ku ta bisabo: 'DunaMi di bebe,' lo bo a pidié, i E lo a dunabo awa bibu."

¹¹E muhe a bis'E: "Senor, Bo no tin nada pa saka awa kune i e pos ta hundu; unda anto Bo ta hana e awa bibu ei?

¹²Akaso Bo ta mas grandi ku nos tata Jakob ku a duna nos e pos aki, i for di kual e mes i su yunan i su bestianan a bebe?"

¹³Jesus a kontesta i a bis'e: "Ken ku bebe di e awa aki lo bolbe hana set;

¹⁴ma ken ku bebe di e awa ku Ami lo dun'e lo no hana set nunka, ma e awa ku Ami lo dun'e lo bira den dje un fuente di awa ku ta brota pa bida eterno."

¹⁵E muhe a bis'E: "Senor, dunami e awa aki, pa mi no hana set i pa mi no tin mester di bin te akinan pa saka awa."

¹⁶Jesus a bis'e: "Bai, yama bo esposo i bin aki."

¹⁷E muhe a kontesta i a bisa: "Mi no tin esposo." Jesus a bis'e: "Bo a bisa bon: 'Mi no tin esposo';

¹⁸pasobra bo tabatin sinku esposo; i esun ku bo tin awor aki no ta bo esposo; den esaki bo a papia berdat."

¹⁹E muhe a bis'E: "Senor, mi ta ripara ku Bo ta un profeta.

²⁰Nos tatanan tabata adora riba e seru aki; i boso ta bisa ku ta na Jerusalem e luga ta, kaminda hende mester adora."

²¹Jesus a bis'e: "Muhe, kereMi, e ora lo yega ku ni riba e seru aki, ni na Jerusalem boso lo no adora e Tata.

²²Boso ta adora loke boso no konose; nos ta adora loke nos konose, pasobra salbashon ta bin for di e hudiunan.

²³Ma e ora lo yega, i ta awor, ku e adoradonan berdadero lo adora e Tata den spiritu i berdat; pasobra ta hendenan asina e Tata ta buska pa ador'E.

²⁴Dios ta Spiritu, i esnan ku ta ador'E mester adora den spiritu i berdat."

²⁵E muhe a bis'E: "Mi sa ku e Mesias ta bin (Esun ku ta wordu yama Cristo); ora Esun ei bin, E lo deklara nos tur kos."

²⁶Jesus a bis'e: "Ami ku ta papia ku bo t'E."

²⁷I na e momento aki Su disipelnan a yega i nan a keda strana ku E tabata papia ku un muhe; tog ni un no a bisa: "Kiko Bo ta buska?" of: "Pakiko Bo ta papia kune?"

²⁸Asina e muhe a laga su purun para i a bai den stat, i a bisa e hendenan:

²⁹"Bin mira un homber ku a bisami tur kos ku mi a hasi; no ta esaki lo ta e Cristo?"

³⁰Nan a sali for di stat i a bin serka djé.

³¹Mientras tantu e disipelnan tabata rogu'E, bisando: "Kome, Rabi!"

³²Ma El a bisa nan: "Mi tin kuminda pa kome ku boso no sa di dje."

³³Pesei, e disipelnan tabata bisa otro: "Por ta ku un hende a trese algu di kome p'E?"

³⁴Jesus a bisa nan: "Mi kuminda ta pa hasi e boluntat di Esun ku a mandaMi, i pa kumpli ku Su trabou.

³⁵Boso no ta bisa: 'Falta kuater luna pa tempu di kosecha yega'? Mira, Mi ta bisa boso, hisa boso kara wak i mira e kunukunan, pasobra nan ta blanku pa wordu kosecha.

³⁶Ya kaba esun ku ta kosecha ta risibl pago i ta rekohe fruta pa bida eterno, pa esun ku ta sembra i esun ku ta kosecha por regosiha huntu.

³⁷Pasobra den e kaso aki e dicho ta berdat: 'Un ta sembra i otro ta kosecha.'

³⁸Mi a manda boso kosecha lokual boso no a traha p'e; otronan a traha i boso a benefisia di nan trabou."

³⁹I hopi samaritano for di e stat ei a kere den djé pa motibu di e palabra di e muhe ku a duna testimonio: "El a bisami tur kos ku mi a hasi."

⁴⁰Asina ta ku ora ku e samaritanonan a bin serka djé, nan a pidié pa keda serka nan; i El a keda dos dia einan.

⁴¹I hopi mas a kere pa motibu di Su palabra.

⁴²I nan a bisa e muhe: "Awor nos no ta kere mas pa motibu di loke abo a bisa, pasobra nos mes a tende i nos sa ku Esun aki di berdat ta e Salbador di mundu."

⁴³I despues di e dos dianan ei El a sali for di einan i a bai Galilea.

⁴⁴Pasobra Jesus mes a duna testimonio ku un profeta no tin onor den su mes tera.

⁴⁵Ora ku El a yega Galilea, e galileonan a risibié, pasobra nan a mira tur kos ku El a hasi na Jerusalem na e Fiesta di Pasku; pasobra nan mes tambe a bai e Fiesta.

⁴⁶Asina El a bin atrobe na Kana di Galilea, kaminda El a hasi awa bira bina. I tabatin un ofisial di rei, kende su yu homber tabata malu na Kapernaum.

⁴⁷Ora ku el a tende ku Jesus a sali di Judea bin Galilea, el a bai serka djé i a rogu'E pa bin kura su yu homber; pasobra e tabata muriendo.

⁴⁸Anto Jesus a bis'e: "Si boso no mira senal i milager, boso lo no kere."

⁴⁹E ofisial di rei a bis'E: "Senor, bin prome ku mi yu muri."

⁵⁰Jesus a bis'e: "Bai numa; bo yu ta bibu." E homber a kere e palabra ku Jesus a papia kune, i el a bai.

⁵¹I mientras ku e tabata na kaminda ainda, su esklabunan a bin kontr'e, i a bis'e ku su yu ta bibu.

⁵²Anto el a puntra nan ki ora el a kuminsa mehora. I nan a bis'e: "Ayera pa un or di merdia e keintura a lagu'e."

⁵³Anto e tata a korda ku tabata na e ora ei ku Jesus a bis'e: "Bo yu ta bibu"; i e mes a kere i tur e hendenan di su kas.

⁵⁴Esaki anto ta e di dos milager ku Jesus a hasi ora ku El a sali di Judea bin Galilea.