Read Papantla Totonac Evangelio Segun Juan 5 Bible Online

Evangelio Segun Juan 5 - Papantla Totonac bible

Evangelio Segun Juan 5

¹Despues di e kosnan aki tabatin un fiesta di e hudiunan, i Jesus a bai Jerusalem.

²Awor na Jerusalem, na e porta di karne, tin un tanki di awa ku na hebreo yama Betesda, i ku tin sinku veranda di pilar.

³Den nan tabatin drumi un multitut di hende malu, siegu, lam, paralisa, [ku tabata spera riba moveshon di e awa;

⁴pasobra na sierto temporadanan un angel di Senor tabata baha den e tanki, i tabata hasi e awa move; anto esun ku drenta aden prome, despues di moveshon di e awa, tabata wordu kura di ki malesa ku e tabata sufri di dje.]

⁵I tabatin un homber einan ku pa trint'i ocho ana tabata malu.

⁶Ora Jesus a mir'e drumi einan i tabata sa ku e tabatin hopi tempu kaba den e kondishon ei, El a bis'e: "Bo kier bira bon?"

⁷E homber malu a kontest'E: "Senor, mi no tin hende pa ponemi den e tanki ora ku e awa wordu movi, i mientras ku mi ta na kaminda, un otro ta baha aden prome ku mi."

⁸Jesus a bis'e: "Lanta, kohe bo kama i kana."

⁹I mesora e homber a bira bon i a kohe su kama i a kuminsa kana. Awor e dia ei tabata Sabat.

¹⁰Pesei, e hudiunan a bisa esun ku a wordu kura: "Ta Sabat, i Lei no ta permiti pa bo karga bo kama."

¹¹Ma el a kontesta nan: "Esun ku a kurami ta Esun ku a bisami: 'Kohe bo kama i kana.'"

¹²Nan a puntr'e: "Ta ken ta e homber ku a bisabo: 'Kohe bo kama i kana'?"

¹³Ma esun ku a wordu kura no tabata sa ta ken, komo ku Jesus a retira, pasobra tabatin un multitut di hende na e luga ei.

¹⁴Despues Jesus a han'e den tempel i a bis'e: "Mira, bo a bira bon; no peka mas pa nada pio no sosode ku bo."

¹⁵E homber a bai i a bisa e hudiunan ku ta Jesus a kur'e.

¹⁶I pa e motibu aki e hudiunan tabata persigui Jesus, pasobra E tabata hasi e kosnan aki riba Sabat.

¹⁷Ma Jesus a kontesta nan: "Mi Tata ta traha te awor i Mi tambe ta traha."

¹⁸Pesei, pa e motibu aki e hudiunan mas ainda tabata busk'E pa mata, pasobra no solamente E tabata kibra Sabat, ma tambe E tabata yama Dios Su mes Tata, hasiendo Su mes igual ku Dios.

¹⁹Pesei, Jesus a kontesta i a bisa nan: "Di berdat, di berdat, Mi ta bisa boso, e Yu no por hasi nada di Su mes, si no ta algu ku E ta mira e Tata hasi; pasobra tur loke ku e Tata hasi, e Yu tambe ta hasi meskos.

²⁰Pasobra e Tata ta stima e Yu i ta mustr'E tur kos ku E mes ta hasi; i obranan mas grandi ku esakinan E lo mustr'E, pa boso keda asombra.

²¹Pasobra meskos ku e Tata ta lanta e mortonan i ta duna nan bida, asina e Yu tambe ta duna bida na esun ku E kier.

²²Pasobra e Tata mes no ta huzga ningun hende, ma El a duna tur huisio na e Yu,

²³pa tur por onra e Yu, meskos ku nan ta onra e Tata. Esun ku no ta onra e Yu, no ta onra e Tata ku a mand'E.

²⁴"Di berdat, di berdat, Mi ta bisa boso, esun ku tende Mi palabra i kere Esun ku a mandaMi, tin bida eterno, i no ta bin na huisio, ma a pasa for di morto pa bida.

²⁵Di berdat, di berdat, Mi ta bisa boso, e ora lo yega i ta awor, ku e mortonan lo tende e bos di e Yu di Dios, i esnan ku tende lo biba.

²⁶Pasobra meskos ku e Tata tin bida den Su mes, asina El a duna e Yu tambe pa tin bida den Su mes;

²⁷i El a dun'E outoridat pa ehekuta huisio, pasobra E ta e Yu di Hende.

²⁸"No strana boso di esaki, pasobra e ora lo yega den kual tur ku ta den graf lo tende Su bos,

²⁹i lo sali; esnan ku a hasi bon, pa un resurekshon di bida, esnan ku a komete maldat, pa un resurekshon di huisio.

³⁰Mi no por hasi nada di Mi mes. Manera Mi ta tende, Mi ta huzga; i Mi huzgamentu ta hustu, pasobra Mi no ta buska Mi mes boluntat, sino e boluntat di Esun ku a mandaMi.

³¹"Si ta Ami so ta duna testimonio di Mi mes, Mi testimonio no ta berdadero.

³²Tin un otro ku ta duna testimonio di Mi, i Mi sa ku e testimonio ku E ta duna di Mi ta berdadero.

³³"Boso a manda mensahero serka Juan, i el a duna testimonio di e berdat.

³⁴Ma e testimonio ku Mi ta risibi no ta di hende, ma Mi ta bisa e kosnan aki pa boso por wordu salba.

³⁵E tabata e lampi ku tabata send! i ku tabata lusa, i pa un tempu boso tabata kier regosiha den su lus.

³⁶"Ma e testimonio ku Mi tin ta mas grandi ku esun di Juan; pasobra e obranan ku e Tata a dunaMi pa kumpli kune, e mesun obranan ku Mi ta hasi, ta duna testimonio di Mi ku ta e Tata a mandaMi.

³⁷I e Tata ku a mandaMi, ta E a duna testimonio di Mi. Boso no a tende Su bos nunka, ni a mira Su forma.

³⁸I boso no tin Su palabra ta biba den boso, pasobra boso no ta kere Esun ku El a manda.

³⁹Boso ta skudrina e Skrituranan, pasobra boso ta kere ku ta den nan boso tin bida eterno; i ta esakinan ta duna testimonio di Mi;

⁴⁰i boso no kier bin serka Mi pa boso por tin bida.

⁴¹"Mi no ta risibi gloria for di hende,

⁴²ma Mi konose boso, ku boso no tin e amor di Dios den boso mes.

⁴³Mi a bin den e nomber di Mi Tata, i boso no ta risibiMi; si un otro bin den su mes nomber, boso lo risibie.

⁴⁴Ta kon boso por kere, boso ku ta risibi gloria un for di otro, i no ta buska e gloria ku ta bin for di e uniko Dios?

⁴⁵"No kere ku Ami lo akusa boso dilanti di e Tata; esun ku ta akusa boso ta Moises, den kende boso a pone boso speransa.

⁴⁶Pasobra si boso a kere Moises, boso lo a kereMi; pasobra el a skirbi di Mi.

⁴⁷Ma si boso no ta kere loke el a skirbi, kon boso lo kere Mi palabranan?"