Read Papantla Totonac Evangelio Segun Juan 6 Bible Online

Evangelio Segun Juan 6 - Papantla Totonac bible

Evangelio Segun Juan 6

¹Despues di e kosnan aki Jesus a bai na e otro banda di Laman di Galilea (of Tiberias).

²I un multitut grandi tabata siguié, pasobra nan tabata mira e milagernan ku E tabata hasi na esnan ku tabata malu.

³I Jesus a subi bai riba seru i ayanan El a sinta ku Su disipelnan.

⁴Awor Pasku, e fiesta di e hudiunan, tabata serka.

⁵Pesei, ora Jesus a hisa kara wak i a mira ku un multitut grandi tabata bin serka djé, El a bisa Felipe: "Unda nos lo kumpra pan pa esakinan por kome?"

⁶I esaki El a bisa pa pon'e na prueba; pasobra E mes tabata sa kiko E tabatin intenshon di hasi.

⁷Felipe a kontest'E: "Ni dos shen denario di pan no ta basta pa nan, pa kada un hana un pida."

⁸Un di Su disipelnan, Andres, ruman homber di Simon Pedro, a bis'E:

⁹"Tin un mucha homber akinan ku tin sinku pan di puspas i dos piska, ma kiko esakinan ta pa tantu hende asina?"

¹⁰Jesus a bisa: "Laga e hendenan bai sinta." I na e luga ei tabatin hopi yerba. Asina e hombernan a bai sinta, un kantidat di mas o menos sinku mil.

¹¹Jesus anto a kohe e pannan; i despues di a duna gradisimentu, El a parti nan pa esnan ku tabata sinta einan; di e mesun manera tambe e piskanan, kuantu ku nan tabata kier.

¹²I ora nan barika tabata yen, El a bisa Su disipelnan: "Rekohe e pida-pidanan ku a sobra, pa nada no bai perdi."

¹³I asina nan a rekohe nan i a yena diesdos makutu ku e pida-pidanan ku a sobra di e sinku pannan di puspas, ku e hendenan ku a kome a laga.

¹⁴Pesei, ora ku e hendenan a mira e milager ku Jesus a hasi, nan a bisa: "Esaki berdaderamente ta e Profeta ku mester a bin den mundu."

¹⁵Jesus anto, sabiendo ku nan tabatin intenshon di bin i gar'E pa hasié rei, a retira atrobe bai riba e seru, E so.

¹⁶Awor ora nochi a sera, Su disipelnan a baha bai laman,

¹⁷i nan a bai den un boto i a kuminsa krusa laman pa bai Kapernaum. Ya a bira skur kaba i ainda Jesus no a bin serka nan.

¹⁸I laman a bira brutu pa motibu di un bientu fuerte ku tabata supla.

¹⁹Ora nan a rema mas o menos sinku of seis kilometer, nan a mira Jesus ta kana riba laman i ta aserka e boto, i nan a spanta masha.

²⁰Ma El a bisa nan: "Ta Ami; no tene miedu."

²¹E ora ei ku gustu nan a tum'E den boto; i unbes e boto a yega na e luga ku nan tabata bai.

²²Su manise e multitut ku tabata para na e otro banda di e laman a mira ku tabatin solamente un boto chikitu einan, i ku Jesus no a bai ku Su disipelnan den e boto, ma ku Su disipelnan a bai nan so.

²³I otro botonan chikitu for di Tiberias a yega, pega ku e luga kaminda nan a kome pan despues ku Senor a duna gradisimentu.

²⁴Pesei ora ku e multitut a mira ku Jesus no tabata einan, ni Su disipelnan, nan tambe a bai den e botonan chikitu i a bin Kapernaum pa buska Jesus.

²⁵I ora nan a han'E na e otro banda di laman, nan a bis'E: "Rabi, ki ora Bo a yega akinan?"

²⁶Jesus a kontesta nan i a bisa: "Di berdat, di berdat, Mi ta bisa boso, boso ta buskaMi, no pasobra boso a mira milagernan, ma pasobra boso a kome di e pannan i a keda barika yen.

²⁷No traha pa e kuminda ku ta perese, ma pa e kuminda ku ta permanese pa bida eterno, lokual e Yu di Hende lo duna boso; pasobra ta riba djé e Tata, esta Dios, a pone Su seyo."

²⁸Anto nan a bis'E: "Kiko nos lo hasi pa nos por realisa e obranan di Dios?"

²⁹Jesus a kontesta i a bisa nan: "Esaki ta e obra di Dios, pa boso kere den Esun ku El a manda."

³⁰E ora ei nan a bis'E: "Ki senal Bo ta hasi anto pa nos por mira i kereBo? Ki obra Bo ta hasi?

³¹Nos tatanan a kome mana den desierto; manera ta para skirbi: 'Pan for di shelu El a duna nan kome.'"

³²E ora ei Jesus a bisa nan: "Di berdat, di berdat, Mi ta bisa boso, no ta Moises a duna boso e pan for di shelu, ma ta Mi Tata ta duna boso e pan berdadero for di shelu.

³³Pasobra e pan di Dios ta Esun ku ta baha for di shelu i ta duna bida na mundu."

³⁴E ora ei nan a bis'E: "Senor, duna nos semper e pan aki."

³⁵Jesus a bisa nan: "Ami ta e pan di bida; esun ku bin serka Mi lo no hana hamber, i esun ku kere den Mi lo no hana set nunka.

³⁶Ma Mi a bisa boso ku boso a miraMi i tog no ta kere.

³⁷Tur loke e Tata dunaMi lo bin serka Mi, i esun ku bin serka Mi, sigur-sigur lo Mi no tir'afo.

³⁸Pasobra Mi a baha for di shelu, no pa hasi Mi mes boluntat, sino e boluntat di Esun ku a mandaMi.

³⁹I esaki ta e boluntat di Esun ku a mandaMi, ku di tur loke El a dunaMi Mi no perde nada, ma pa Mi lant'e den e ultimo dia.

⁴⁰Pasobra esaki ta e boluntat di Mi Tata, ku tur ku mira e Yu, i a kere den djé, tin bida eterno; i Ami mes lo lant'e den e ultimo dia."

⁴¹E hudiunan anto tabata murmura kontra djé, pasobra El a bisa: "Ami ta e pan ku a baha for di shelu."

⁴²I nan tabata bisa: "E Jesus aki no ta yu di Jose, kende su tata i mama nos konose? Kon E ta bisa awor: 'Mi a baha for di shelu'?"

⁴³Jesus a kontesta i a bisa nan: "Boso no murmura un ku otro.

⁴⁴Ni un hende no por bin serka Mi, si no ta e Tata ku a mandaMi a hal'e; i Ami lo lant'e den e ultimo dia.

⁴⁵Ta para skirbi den e profetanan: 'I nan tur lo wordu sina dor di Dios.' Tur hende ku a tende i a sina di e Tata ta bin serka Mi.

⁴⁶No ku un hende a yega di mira e Tata; solamente Esun ku ta di Dios, Esei a mira e Tata.

⁴⁷Di berdat, di berdat, Mi ta bisa boso, esun ku kere tin bida eterno.

⁴⁸Ami ta e pan di bida.

⁴⁹Boso tatanan a kome mana den desierto i nan a muri.

⁵⁰Esaki ta e pan ku ta baha for di shelu, pa un hende por kome di dje i no muri.

⁵¹Ami ta e pan bibu ku a baha for di shelu; si un hende kome di e pan aki, e lo biba pa semper; i e pan ku lo Mi duna pa bida di e mundu ta Mi karni."

⁵²E ora ei e hudiunan a kuminsa diskuti ku otro, bisando: "Kon e homber aki por duna nos Su karni pa kome?"

⁵³E ora ei Jesus a bisa nan: "Di berdat, di berdat, Mi ta bisa boso, si boso no kome e karni di e Yu di Hende i bebe Su sanger, boso no tin bida den boso.

⁵⁴Esun ku kome Mi karni i bebe Mi sanger tin bida eterno, i lo Mi lant'e den e ultimo dia.

⁵⁵Pasobra Mi karni ta kuminda berdadero, i Mi sanger ta bibida berdadero.

⁵⁶Esun ku kome Mi karni i bebe Mi sanger ta permanese den Mi, i Ami den dje.

⁵⁷Meskos ku e Tata ku ta biba a mandaMi, i Ami ta biba dor di e Tata, asina esun ku komeMi tambe lo biba dor di Mi.

⁵⁸Esaki ta e pan ku a baha for di shelu; no manera e tatanan a kome mana i a muri; esun ku kome e pan aki lo biba pa semper."

⁵⁹E kosnan aki El a bisa den snoa ora ku E tabata sina e hendenan na Kapernaum.

⁶⁰E ora ei hopi di Su disipelnan, ora nan a tende esaki, a bisa: "E palabra aki ta difisil; ken por komprende esaki!"

⁶¹Ma Jesus, konsiente ku Su disipelnan tabata murmura kontra esaki, a bisa nan: "Esaki ta hasi boso trompeka?

⁶²Kiko anto, si boso lo a mira e Yu di Hende subi bai kaminda E tabata prome?

⁶³Ta e Spiritu ta Esun ku ta duna bida; e karni no bal nada; e palabranan ku Mi a papia ku boso ta spiritu i ta bida.

⁶⁴Ma tin algun di boso ku no ta kere." Pasobra for di prinsipio Jesus tabata sa ta ken tabata esnan ku no tabata kere, i ta ken tabata esun ku lo a traishon'E.

⁶⁵I El a bisa: "Pa e motibu aki Mi a bisa boso ku ni un hende no por bin serka Mi, si esaki no ta duna na dje di e Tata."

⁶⁶Komo resultado di esaki hopi di Su disipelnan a retira i no tabata kana kuné mas.

⁶⁷Jesus anto a bisa e diesdosnan: "Boso tambe kier bai anto?"

⁶⁸Simon Pedro a kontest'E: "Senor, serka ken nos lo bai? Abo tin e palabranan di bida eterno.

⁶⁹I nos a kere i a hana sa ku Abo ta Esun Santu di Dios."

⁷⁰Jesus a kontesta nan: "No ta Ami mes a skohe boso, e diesdosnan? I tog un di boso ta un diabel."

⁷¹Awor E tabata kier men Judas, yu homber di Simon Iskariot, pasobra esaki, un di e diesdosnan, tabata bai traishon'E.