Read Papantla Totonac Evangelio Segun Juan 7 Bible Online

Evangelio Segun Juan 7 - Papantla Totonac bible

Evangelio Segun Juan 7

¹I despues di e kosnan aki Jesus tabata kana den Galilea; pasobra E no tabata kier a kana den Judea, komo ku e hudiunan tabata busk'E pa mata.

²Awor e fiesta di e hudiunan, e Fiesta di Tentnan, tabata serka.

³Pesei, Su rumannan a bis'E: "Sali for di akinan i bai Judea, pa Bo disipelnan tambe mira Bo obranan ku Bo ta hasi.

⁴Pasobra ni un hende no ta hasi nada na sekreto, mientras ku e mes ta buska publisidat. Si Bo ta hasi e kosnan aki, mustra Bo mes na mundu."

⁵Pasobra ni Su rumannan mes no tabata kere den djé.

⁶E ora ei Jesus a bisa nan: "Mi tempu no a yega ainda, ma boso tempu semper ta oportuno.

⁷Mundu no por odia boso; ma Ami si e ta odia, pasobra Mi ta testigua di dje, ku su obranan ta malu.

⁸Boso bai e Fiesta numa; Ami no ta bai e Fiesta aki ainda, pasobra Mi tempu no ta kumpli ainda."

⁹I despues di a bisa nan e kosnan aki El a keda na Galilea.

¹⁰Ma ora Su rumannan a bai e Fiesta, E mes tambe a bai, no publikamente, ma na sekreto.

¹¹Anto e hudiunan tabata busk'E na e Fiesta i nan tabata puntra: "Unda E ta?"

¹²I den e multitutnan tabatin hopi murmuramentu tokante di djé. Algun tabata bisa: "E ta un bon homber." Otronan tabata bisa: "No, alkontrario, E ta desvia e multitut."

¹³Ma ni un hende no tabata papia abiertamente di djé, pa miedu di e hudiunan.

¹⁴Ma awor meimei di e Fiesta Jesus a bai den tempel i a kuminsa sina e hendenan.

¹⁵Pesei, e hudiunan a keda strana, bisando: "Kon e Homber aki por a bira asina sabi, sin ku nunka El a hana sinansa?"

¹⁶E ora ei Jesus a kontesta nan i a bisa: "Mi sinansa no ta di Mi, ma di Esun ku a mandaMi.

¹⁷Si un hende kier hasi Su boluntat, e lo sa di e sinansa, si ta di Dios e ta, of si ta Mi mes ta papia.

¹⁸Esun ku ta papia di su mes ta buska su mes gloria; ma Esun ku ta buska e gloria di Esun ku a mand'E, Esei ta berdadero, i no tin inhustisia den djé.

¹⁹No ta Moises a duna boso e Lei? I tog ningun di boso no ta kumpli ku e Lei. Pakiko boso ta buskaMi pa mata?"

²⁰E multitut a kontesta: "Bo tin un demono! Ta ken ta buskaBo pa mata?"

²¹Jesus a kontesta i a bisa nan: "Mi a hasi un obra i boso tur ta keda strana.

²²Pasobra Moises a duna boso sirkumsishon (no pasobra ta di Moises e ta, sino di e tatanan), i riba dia di Sabat boso ta sirkumsida un homber.

²³Si un homber ta risibi sirkumsishon riba dia di Sabat pa e Lei di Moises no wordu kibra, boso ta rabia ku Mi, pasobra Mi a kura un hende kompletamente riba dia di Sabat?

²⁴No huzga segun aparensia, ma huzga ku huisio hustu."

²⁵Pesei algun di e hendenan di Jerusalem tabata bisa: "No ta esaki ta e homber ku nan ta buska pa mata?

²⁶I mira, E ta papia publikamente i nan no ta bis'E nada. Por ta ku di berdat e gobernantenan a hana sa ku ta esaki ta e Cristo?

²⁷Sinembargo, nos sa for di unda e Homber aki ta bin; ma dia ku e Cristo bin, ni un hende lo no sa for di unda E ta."

²⁸E ora ei, mientras ku Jesus tabata sina e hendenan den tempel, El a bisa na bos haltu: "Boso konoseMi i boso sa for di unda Mi ta bin; i Mi no a bin di Mi mes, ma Esun ku a mandaMi ta berdadero, Kende boso no konose.

²⁹Ami konos'E, pasobra Mi ta bin for di djé, i El a mandaMi."

³⁰Pesei nan tabata buska pa gar'E; ma ningun hende no a pone man riba djé, pasobra Su ora no a yega ainda.

³¹Ma hopi di e multitut a kere den djé; i nan tabata bisa: "Ora ku e Cristo bin, lo E hasi mas milager ku esnan ku e Homber aki ta hasi?"

³²E fariseonan a tende e multitut ta murmura e kosnan aki di djé; i e saserdotenan prinsipal i e fariseonan a manda ofisialnan pa gar'E.

³³Anto Jesus a bisa nan: "Un poko tempu mas Mi ta serka boso i despues Mi ta bai serka Esun ku a mandaMi.

³⁴Boso lo buskaMi i lo no hanaMi; i kaminda Ami ta, boso no por bin."

³⁵E ora ei e hudiunan a bisa otro: "Unda e Homber aki tin intenshon di bai, ku nos lo no han'E? Ta intenshon E tin di bai serka esnan ku ta plama entre e griegonan, i sina e griegonan?

³⁶Ta kiko e palabranan aki ta ku El a bisa: 'Boso lo buskaMi i lo no hanaMi; i kaminda Ami ta boso no por bin'?"

³⁷Awor riba e ultimo dia, e gran dia di e Fiesta, Jesus a lanta para i a bisa na bos haltu: "Si un hende tin set, lagu'e bin serka Mi i bebe.

³⁸Esun ku kere den Mi, manera e Skritura a bisa: 'For di su paden lo kore riunan di awa bibu.'"

³⁹Ma esaki El a bisa di e Spiritu, Kende esnan ku a kere den djé tabata bai risibi; pasobra e Spiritu no a wordu duna ainda, pasobra Jesus no a wordu glorifika ainda.

⁴⁰Algun hende di e multitut anto, ora nan a tende e palabranan aki, tabata bisa: "Esaki di berdat ta e Profeta."

⁴¹Otronan tabata bisa: "Esaki ta e Cristo." Tambe otronan tabata bisa: "No ta for di Galilea e Cristo ta bin, tog?

⁴²Skritura no a bisa ku e Cristo ta bin di e desendensia di David, i for di Betlehem, e pueblito kaminda David tabata?"

⁴³Asina a bin un divishon den e multitut pa Su motibu.

⁴⁴I algun di nan kier a gar'E, ma ningun hende no a pone man riba djé.

⁴⁵E ora ei e ofisialnan a bin serka e saserdotenan prinsipal i e fariseonan, i esakinan a puntra nan: "Pakiko boso no a tres'E?"

⁴⁶E ofisialnan a kontesta: "Nunka un hende no a papia manera e Homber aki ta papia."

⁴⁷E ora ei e fariseonan a puntra nan: "Boso tambe a wordu gana?

⁴⁸Ni un di e gobernantenan of e fariseonan no a kere den djé, no t'asina?

⁴⁹Ma e multitut aki, ku no konose e Lei, ta maldishona."

⁵⁰Nikodemo (esun ku antes a bin serka Jesus, siendo un di nan) a bisa nan:

⁵¹"Akaso nos Lei ta huzga hende sin tend'e prome i sin sa kiko e ta hasi?"

⁵²Nan a kontesta i a puntr'e: "Abo tambe ta di Galilea? Buska i mira ku for di Galilea no ta lanta ningun profeta."

⁵³[I kada un a bai su kas.