Read Papantla Totonac Evangelio Segun Juan 8 Bible Online

Evangelio Segun Juan 8 - Papantla Totonac bible

Evangelio Segun Juan 8

²I mainta bon tempran El a bolbe bin den tempel i henter e pueblo tabata bin serka djé; i El a sinta i a kuminsa sina nan.

³I e eskribanan i e fariseonan a trese un muhe ku a wordu hana ta komete adulterio, i ora nan a pon'e para meimei

⁴nan a bis'E: "Maestro, e muhe aki a wordu hana ta komete adulterio.

⁵Awor den e Lei Moises a ordena nos pa piedra muhenan asina; anto kiko Abo ta bisa?"

⁶I nan tabata bisa esaki pa pon'E na prueba, pa nan por a hana un motibu pa akus'E. Ma Jesus a buk abou i a skirbi ku Su dede riba suela.

⁷Ma ora nan a keda puntr'E, El a lanta para i a bisa nan: "Esun di boso ku ta sin pika, lagu'e ta esun di prome ku ta tira un piedra riba dje."

⁸I El a buk abou atrobe i a skirbi riba suela.

⁹I ora nan a tende esaki, nan a kuminsa sali un pa un, kuminsando ku esnan di mas bieu, i Jesus so a keda, i e muhe ku tabata para meimei.

¹⁰Ora Jesus a lanta para, El a bis'e: "Muhe, unda nan ta? Ni un hende no a kondenabo?"

¹¹I el a bisa: "Ni un, Senor." I Jesus a bisa: "Ami tampoko no ta kondenabo; bai, i di awor padilanti no peka mas."]

¹²E ora ei Jesus a bolbe papia ku nan, bisando: "Ami ta e lus di mundu; esun ku siguiMi lo no kana den skuridat, ma lo tin e lus di bida."

¹³E ora ei e fariseonan a bis'E: "Bo ta duna testimonio di Bo mes; Bo testimonio no ta berdadero."

¹⁴Jesus a kontesta i a bisa nan: "Maske Mi ta duna testimonio di Mi mes, Mi testimonio ta berdadero, pasobra Mi sa di unda Mi a bin i na unda Mi ta bai; ma boso no sa di unda Mi ta bin, ni na unda Mi ta bai.

¹⁵Boso ta huzga segun karni; Ami no ta huzga ningun hende.

¹⁶Ma maske Mi huzga, Mi huisio ta berdadero; pasobra Ami no ta Mi so den esaki, ma Ami i e Tata ku a mandaMi.

¹⁷Asta den boso Lei a wordu skirbi ku e testimonio di dos hende ta berdadero.

¹⁸Ami ta Esun ku ta duna testimonio di Mi mes, i e Tata ku a mandaMi ta duna testimonio di Mi."

¹⁹Anto nan a bis'E: "Unda Bo Tata ta?" Jesus a kontesta: "Boso no konose ni Ami ni Mi Tata; si boso tabata konoseMi, boso lo tabata konose Mi Tata tambe."

²⁰E palabranan aki Jesus a papia den e luga-di-warda-tesoro, ora ku E tabata sina e hendenan den tempel; i ni un hende no a gar'E, pasobra Su ora no a yega ainda.

²¹Pesei Jesus a bolbe bisa nan: "Mi ta bai, i boso lo buskaMi, i lo muri den boso pika; kaminda Ami ta bai, boso no por bin."

²²E ora ei e hudiunan a bisa: "No ta mata E ta bai mata Su kurpa no, ku E ta bisa: 'Kaminda Ami ta bai, boso no por bin?'"

²³I El a bisa nan: "Boso ta di aki bou, Ami ta di ariba; boso ta di e mundu aki, Ami no ta di e mundu aki.

²⁴Pesei Mi a bisa boso ku boso lo muri den boso pikanan; pasobra si boso no kere ku ta Ami t'E, boso lo muri den boso pikanan."

²⁵E ora ei nan a bis'E: "Ken Bo ta?" Jesus a bisa nan: "Kiko Mi a bisa boso for di prinsipio?

²⁶Hopi kos Mi tin di papia i di huzga tokante di boso, ma Esun ku a mandaMi ta berdadero; i e kosnan ku Mi a tende for di djé, esakinan Mi ta papia ku e mundu."

²⁷Nan no a realisa ku E tabata papia ku nan tokante di e Tata.

²⁸Pesei, Jesus a bisa: "Ora boso halsa e Yu di Hende, e ora ei boso lo sa ku ta Ami t'E, i ku Ami no ta hasi nada di Mi mes, ma ku Mi ta papia e kosnan aki manera e Tata a sinaMi.

²⁹I Esun ku a mandaMi ta ku Mi; E no a lagaMi Mi so, pasobra semper Mi ta hasi e kosnan ku ta agrad'E."

³⁰Ora ku E tabata papia e kosnan aki, hopi hende a kere den djé.

³¹Pesei, Jesus a bisa e hudiunan ei ku tabata kere den djé: "Si boso keda den Mi palabra, boso ta berdaderamente disipelnan di Mi,

³²i boso lo konose e berdat, i e berdat lo hasi boso liber."

³³Nan a kontest'E: "Nos ta di e desendensia di Abraham, i nunka ainda nos no a bira esklabu di ningun hende; kon Bo ta bisa anto: 'Boso lo bira liber'?"

³⁴Jesus a kontesta nan: "Di berdat, di berdat, Mi ta bisa boso, ken ku komete pika ta esklabu di pika.

³⁵I e esklabu no ta keda den e kas pa semper; e yu si ta keda pa semper.

³⁶Pesei si e Yu hasi boso liber, di berdat boso lo ta liber.

³⁷Mi sa ku boso ta desendiente di Abraham; sinembargo, boso ta buskaMi pa mata, pasobra Mi palabra no ta hana luga den boso.

³⁸Mi ta papia e kosnan ku Mi a mira serka Mi Tata; asina boso tambe ta hasi e kosnan ku boso a tende di boso tata."

³⁹Nan a kontesta i a bis'E: "Ta Abraham ta nos tata." Jesus a bisa nan: "Si boso ta yunan di Abraham, hasi e obranan di Abraham.

⁴⁰Ma awor boso ta buskaMi pa mata, un Homber ku a bisa boso e berdat ku Mi a tende di Dios; esaki Abraham no a hasi.

⁴¹Boso ta hasi e obranan di boso tata." Nan a bis'E: "Nos no a nase di fornikashon; nos tin un Tata, esta Dios."

⁴²Jesus a bisa nan: "Si Dios tabata boso Tata, boso lo a stimaMi, pasobra Mi a sali i a bin for di Dios, pasobra Mi no a bin di Mi mes, ma ta El a mandaMi.

⁴³Pakiko boso no ta komprende loke Mi ta bisa? Ta pasobra boso no por tende Mi palabra.

⁴⁴Boso ta di boso tata e diabel, i boso kier hasi e deseonan di boso tata. E tabata un matado for di prinsipio, i no ta para den e berdat, pasobra no tin berdat den dje. Ki ora ku e papia un mentira, e ta papia for di su mes naturalesa, pasobra e ta un ganado i e tata di mentira.

⁴⁵Ma pasobra Mi ta papia e berdat, boso no ta kereMi.

⁴⁶Kual di boso ta konvenseMi di pika? Si Mi ta papia berdat, pakiko boso no ta kereMi?

⁴⁷Esun ku ta di Dios ta tende e palabranan di Dios; pa e motibu aki boso no ta tende nan, pasobra boso no ta di Dios."

⁴⁸E hudiunan a kontesta i a bis'E: "No ta ku rason nos ta bisa ku Bo ta un samaritano i ku bo tin un demono?"

⁴⁹Jesus a kontesta: "Ami no tin demono; ma Mi ta onra Mi Tata, i boso ta desonraMi.

⁵⁰Ma Mi no ta buska Mi gloria; tin Un ku ta buska esei i ta huzga.

⁵¹Di berdat, di berdat, Mi ta bisa boso, si un hende warda Mi palabra, e lo no mira morto nunka."

⁵²E hudiunan a bis'E: "Awor nos sa ku Bo tin un demono. Abraham a muri i e profetanan tambe; i Abo ta bisa: 'Si un hende warda Mi palabra, e lo no eksperensia morto nunka.'

⁵³Akaso Bo ta mas ku nos tata Abraham ku a muri? E profetanan tambe a muri. Ta ken Bo ta pretende di ta?"

⁵⁴Jesus a kontesta: "Si Mi glorifika Mi mes, Mi gloria no bal nada; ta Mi Tata ta Esun ku ta glorifikaMi, di Kende boso ta bisa: 'E ta nos Dios';

⁵⁵sinembargo, boso no konos'E, ma Ami konos'E; i si Mi bisa ku Mi no konos'E, lo Mi ta un ganado meskos ku boso, ma Ami konos'E i ta warda Su palabra.

⁵⁶Boso tata Abraham tabata regosiha pa mira Mi dia; i el a mir'e i a keda kontentu."

⁵⁷Pesei, e hudiunan a bis'E: "Bo no tin ni sinkuenta ana ainda, i Bo a mira Abraham?"

⁵⁸Jesus a bisa nan: "Di berdat, di berdat, Mi ta bisa boso, prome ku Abraham a nase, AMI TA."

⁵⁹E ora ei nan a kohe piedra pa tir'E kune; ma Jesus a skonde Su mes i a sali bai for di tempel.