Read Papantla Totonac Evangelio Segun Juan 9 Bible Online

Evangelio Segun Juan 9 - Papantla Totonac bible

Evangelio Segun Juan 9

¹I ora ku E tabata pasa, El a mira un homber ku tabata siegu for di su nasementu.

²I Su disipelnan a puntr'E, bisando: "Rabi, ta ken a peka, e homber aki of su mayornan, ku el a nase siegu?"

³Jesus a kontesta: "Ni e homber aki ni su mayornan no a peka; ma esaki tabata pa e obranan di Dios wordu manifesta den dje.

⁴Nos mester hasi e obranan di Esun ku a mandaMi, tanten ku ta di dia; nochi ta yegando, ora ku ningun hende no por traha.

⁵Mientras ku Mi ta den mundu, Mi ta e lus di mundu."

⁶Ora ku El a kaba di bisa esaki, El a skupi abou i a traha lodo ku e skupi, i a hunta e lodo na su wowonan,

⁷i a bis'e: "Bai, laba bo mes den e tanki di Siloam" (ku tradusi ta nifika: Manda). I asina el a bai i a laba su mes, i a bin ta mira.

⁸E ora ei e bisinanan, i esnan ku prome a mir'e komo un pidido di limosna, tabata bisa: "No ta esaki ta esun ku sa sinta pidi limosna?"

⁹Otronan tabata bisa: "Esaki t'e." I tambe otronan tabata bisa: "No, ma e pars'e." El a keda bisa: "T'ami mes."

¹⁰Pesei nan tabata bis'e: "Kon bo wowonan a wordu habri anto?"

¹¹El a kontesta: "E Homber ku ta wordu yama Jesus a traha lodo i a hunta mi wowonan kune i a bisami: 'Bai Siloam i laba bo mes'; asina mi a bai i a laba mi mes, i mi a hana mi bista."

¹²I nan a bis'e: "Na unda E ta?" El a kontesta: "Mi no sa."

¹³Nan a hiba esun ku prome tabata siegu serka e fariseonan.

¹⁴Awor e dia ku Jesus a traha lodo i a habri su wowonan tabata un Sabat.

¹⁵Pesei, e fariseonan tambe a bolbe puntr'e kon el a hana su bista. I el a bisa nan: "El a pone lodo na mi wowonan, i mi a laba mi mes, i mi ta mira."

¹⁶Pesei algun di e fariseonan tabata bisa: "E Homber aki no ta di Dios, pasobra E no ta warda Sabat." Ma otronan tabata bisa: "Kon un hende, ku ta un pekado, por hasi milagernan asina?" I tabatin divishon entre nan.

¹⁷Asina nan a bolbe bisa e homber siegu: "Kiko abo ta bisa di djé, komo ku ta E a habri bo wowonan?" I el a kontesta: "E ta un profeta."

¹⁸Ma e hudiunan no a ker'e ku e tabata siegu i ku el a hana su bista, te ora nan a yama e mayornan di esun ku a hana su bista,

¹⁹i a puntra nan, bisando: "Ta boso yu esaki, ku boso ta bisa a nase siegu? Di kon anto e ta mira awor?"

²⁰Su mayornan a kontesta nan i a bisa: "Nos sa ku esaki ta nos yu, i ku el a nase siegu;

²¹ma kon e ta mira awor, nos no sa; of ken a habri su wowonan, nos no sa. Puntra e mes; e ta grandi kaba; e lo papia pa su mes."

²²Su mayornan a bisa esaki pasobra nan tabatin miedu di e hudiunan; pasobra ya e hudiunan a kumbini ku, si un hende konfesa ku E ta e Cristo, e lo wordu saka for di snoa.

²³Pesei, su mayornan a bisa: "E ta grandi kaba; puntra e mes."

²⁴Asina pa di dos biaha nan a yama e homber ku tabata siegu, i a bis'e: "Duna gloria na Dios; nos sa ku e Homber aki ta un pekado."

²⁵E ora ei el a kontesta: "Si ta un pekado E ta, mi no sa; un kos mi sa, ku mi tabata siegu, i ku awor mi ta mira."

²⁶Anto nan a bis'e: "Kiko El a hasi ku bo? Kon El a habri bo wowonan?"

²⁷El a kontesta nan: "Mi a bisa boso kaba, i boso no a skucha; pakiko boso kier tende atrobe? Akaso boso tambe kier bira Su disipel?"

²⁸I nan a insult'e i a bisa: "Abo ta Su disipel, ma nos ta disipel di Moises.

²⁹Nos sa ku Dios a papia ku Moises, ma pa loke ta e homber aki, nos no sa di unda El a bin."

³⁰E homber a kontesta i a bisa nan: "Wel, esaki si ta un kos strano, ku boso no sa di unda E ta, ma tog ta E a habri mi wowonan.

³¹Nos sa ku Dios no ta skucha pekado; ma si un hende teme Dios i hasi Su boluntat, E ta skuch'e.

³²For di prinsipio di tempu nunka hende no a tende ku un hende a habri wowo di un persona ku a nase siegu.

³³Si e Homber aki no tabata di Dios, E lo no por a hasi nada."

³⁴Nan a kontesta i a bis'e: "Bo a nase kompletamente den pika, i abo kier bin sina nos?" I nan a sak'e afo.

³⁵Jesus a tende ku nan a sak'e afo i ora ku El a topa kune, El a puntr'e: "Bo ta kere den e Yu di Hende?"

³⁶El a kontesta i a bisa: "I ta ken E ta, Senor, pa mi por kere den djé?"

³⁷Jesus a bis'e: "Bo a mir'E i E ta Esun ku ta papiando ku bo."

³⁸I el a bisa: "Senor, mi ta kere." I el a ador'E.

³⁹I Jesus a bisa: "Pa huisio Mi a bin den e mundu aki, pa esnan ku no ta mira, por mira, i pa esnan ku ta mira, bira siegu."

⁴⁰Algun di e fariseonan ku tabata huntu kuné a tende e kosnan aki, i a puntr'E: "Akaso nos tambe ta siegu?"

⁴¹Jesus a bisa nan: "Si boso tabata siegu, boso lo no tabatin pika, ma awor ku boso ta bisa: 'Nos ta mira', boso pika ta keda.