Read Papantla Totonac Echonan di Apostel 1 Bible Online

Echonan di Apostel 1 - Papantla Totonac bible

Echonan di Apostel 1

¹E prome relato mi a skirbi, O Teofilo, tokante di tur loke Jesus a kuminsa hasi i sina,

²te na e dia ku El a wordu tuma den shelu, despues ku pa medio di Spiritu Santu El a duna ordu na e apostelnan ku El a skohe.

³Na esakinan El a presenta Su mes tambe bibu, despues di Su sufrimentu, pa medio di hopi prueba konvinsente, i a parese na nan durante kuarenta dia, papiando tokante di e kosnan di e reino di Dios.

⁴I ora ku E tabata huntu ku nan, El a duna nan e ordu aki: "No bai for di Jerusalem, ma spera riba e promesa di e Tata, ku boso a tendeMi papia di dje;

⁵pasobra Juan tabata batisa ku awa, ma boso lo wordu batisa ku Spiritu Santu no muchu dia despues di e dia aki."

⁶Pesei, ora nan a bin huntu, nan tabata hasié pregunta, bisando: "Senor, ta na e tempu aki Bo ta bai restora e reino pa Israel?"

⁷El a bisa nan: "No ta toka boso pa sa e tempu ni e epoka ku e Tata a fiha pa medio di Su mes outoridat,

⁸ma boso lo risibi poder ora Spiritu Santu bin riba boso, i boso lo ta Mi testigunan na Jerusalem i na henter Judea i Samaria, i te na e parti mas aleha di mundu."

⁹I ora ku El a kaba di bisa e kosnan aki, El a wordu tuma na shelu, mientras ku nan tabata para mira, i un nubia a kit'E for di nan bista.

¹⁰I mientras ku nan tabata fiha nan bista na shelu segun ku E tabata subi bai, ata dos homber bisti na blanku a bin para banda di nan,

¹¹kendenan tambe a bisa: "Hombernan di Galilea, pakiko boso ta para wak na shelu? E Jesus aki, Kende a wordu tuma for di boso na shelu, lo bolbe di e mesun manera ku boso a mir'E ta bai shelu."

¹²E ora ei nan a bolbe bai Jerusalem for di e seru ku ta wordu yama Seru di Oleifi, ku ta keda pega ku Jerusalem, na un distansia ku ta permiti pa kana riba dia di Sabat.

¹³I ora nan a drenta stat, nan a subi bai na e sala ariba, kaminda nan tabata keda; esta, Pedro i Juan, Santiago i Andres, Felipe i Tomas, Bartolomeo i Mateo, Santiago, yu homber di Alfeo, i Simon e Zelote i Judas, yu homber di Santiago.

¹⁴Esakinan tur, di un akuerdo, a keda persevera den orashon, huntu ku e muhenan i Maria, mama di Jesus, i huntu ku Su ruman hombernan.

¹⁵I den e dianan ei Pedro a lanta para meimei di e rumannan (tabatin un grupo di mas o menos shent'i binti persona huntu einan), i a bisa:

¹⁶"Rumannan, e Skritura mester a wordu kumpli, kual Spiritu Santu a papia di antemano pa medio di boka di David tokante di Judas, kende a bira un guiado di esnan ku a aresta Jesus.

¹⁷Pasobra el a wordu konta huntu ku nos i a risibi su parti den e ministerio aki."

¹⁸(Awor e homber aki a atkiri pida tereno ku e pago di su maldat; i el a kai di kabes i a rementa habri na dos, i tur su shirishirinan a bash'afo.

¹⁹I tur esnan ku tabata biba na Jerusalem a hana sa esaki, asina ku e pida tereno ei, den nan mes idioma, a wordu yama Akeldama, esta, Tereno di Sanger.)

²⁰"Pasobra ta para skirbi den e buki di Salmonan: 'Laga su luga di biba bira desola, i no laga ningun hende biba den dje'; i: 'Laga un otro hende tuma su puesto.'

²¹Pesei ta nesesario ku di e hombernan aki ku tabata huntu ku nos tur e tempu ku Senor Jesus tabata drenta i sali serka nos--

²²kuminsando for di e boutismo di Juan te na e dia ku El a wordu tuma for di nos--un di nan bira testigu huntu ku nos di Su resurekshon."

²³I nan a propone dos homber: Jose, kende tabata wordu yama Barsabas, kende tambe tabata wordu yama Justu, i Matias.

²⁴I nan a hasi orashon i a bisa: "Abo, Senor, Kende konose kurason di tur hende, mustra kual di e dosnan aki Abo a skohe

²⁵pa okupa e ministerio i apostolado aki ku Judas a laga pa bai na su mes luga."

²⁶Nan a tira lot pa nan, i lot a kai pa Matias; i el a wordu konta huntu ku e diesun apostelnan.