Read Papantla Totonac Echonan di Apostel 11 Bible Online

Echonan di Apostel 11 - Papantla Totonac bible

Echonan di Apostel 11

¹Awor e apostelnan i e rumannan ku tabata na tur parti di Judea a tende ku e paganonan tambe a risibi e palabra di Dios.

²I ora Pedro a yega Jerusalem, esnan ku tabata sirkumsida a diskuti kune,

³bisando: "Bo a bai serka hombernan insirkumsida i a kome huntu ku nan."

⁴Ma Pedro a kuminsa papia i a splika nan tur kos presis manera esaki a sosode, bisando:

⁵"Mi tabata den e stat Jope ta hasi orashon; i den un trans mi a mira un vishon, un opheto manera un laken grandi ta wordu baha for di shelu na su kuater puntanan; i esaki a baha bin te serka mi,

⁶i ora mi a fiha mi bista riba dje i tabata opserv'e, mi a mira bestianan terestre di kuater pia, bestianan di mondi i bestianan ku ta lastra i parhanan di shelu.

⁷I tambe mi a tende un bos ta bisami: 'Pedro, lanta, mata i kome.'

⁸"Ma mi a bisa: 'Di ningun manera, Senor, pasobra nunka nada profano ni impuru no a drenta mi boka.'

⁹"Ma un bos for di shelu a kontesta pa di dos biaha: 'Loke Dios a hasi limpi, no konsidera esei profano.'

¹⁰I esaki a sosode tres biaha, i tur kos a wordu tuma bek den shelu.

¹¹"I mira, na e momento ei tres homber, ku a wordu manda serka mi for di Cesarea, a presenta dilanti di e kas kaminda nos tabata keda.

¹²I e Spiritu a bisami pa bai ku nan sin duda ni un momento. I e seis rumannan aki tambe a bai ku mi i nos a drenta e homber su kas.

¹³I el a konta nos kon el a mira e angel para den su kas, kende a bis'e: 'Manda hende na Jope pa buska Simon, kende tambe ta wordu yama Pedro, i tres'e akinan;

¹⁴i e lo papia palabranan ku bo pa medio di kualnan lo bo ta salba, abo i tur hende di bo kas.'

¹⁵"I ora mi a kuminsa papia, Spiritu Santu a baha riba nan, meskos ku El a baha riba nos den prinsipio.

¹⁶I mi a korda e palabra di Senor, kon El a bisa: 'Juan tabata batisa ku awa, ma boso lo wordu batisa ku Spiritu Santu.'

¹⁷Si Dios anto a duna nan e mesun don ku El a duna nos tambe despues di a kere den Senor Jesu-Cristo, ta ken mi tabata pa por a stroba Dios?"

¹⁸I ora nan a tende esaki, nan a kalma i a glorifika Dios, bisando: "Asina anto, Dios a duna e paganonan tambe e repentimentu ku ta guia na bida."

¹⁹Asina anto, esnan ku a wordu plama pa motibu di e persekushon ku a surgi en konekshon ku Esteban, a sigui bai te na Fenisia, Cyprus i Antiokia, i no tabata papia e palabra ku ningun hende, sino ku e hudiunan so.

²⁰Ma tabatin algun di nan, hombernan di Cyprus i Sirene, kendenan a bin Antiokia i a kuminsa papia ku e griegonan tambe, predikando Senor Jesus.

²¹I man di Senor tabata ku nan, i un gran kantidat ku a kere a komberti na Senor.

²²I e notisia tokante di nan a yega na oido di e iglesia na Jerusalem i nan a manda Barnabas bai Antiokia.

²³I ora ku el a yega i a mira e grasia di Dios, el a regosiha i a kuminsa enkurasha nan tur pa propone den nan kurason pa keda fiel na Senor;

²⁴pasobra e tabata un bon homber, yen di Spiritu Santu i di fe. I multitutnan grandi a wordu agrega na Senor.

²⁵I Barnabas a bai Tarso pa buska Saulo;

²⁶i ora ku el a han'e, el a tres'e Antiokia. I a sosode ku pa henter un ana nan tabata reuni ku e iglesia i tabata sina multitutnan grandi. I na Antiokia e disipelnan a wordu yama Cristian pa prome biaha.

²⁷Awor den e dianan ei algun profeta a baha bin Antiokia for di Jerusalem.

²⁸I un di nan, ku yama Agabo, a lanta para i a partisipa pa medio di e Spiritu ku siguramente lo a bin un hamber grandi den henter mundu. I esaki a tuma luga durante di e reinado di Claudio.

²⁹I e disipelnan a determina ku, segun alkanse, kada un di nan lo a manda un kontribushon komo un sosten pa e rumannan ku tabata biba na Judea.

³⁰I esaki nan a hasi i a mand'e pa medio di Barnabas i Saulo pa e ansianonan.