Read Papantla Totonac Echonan di Apostel 12 Bible Online

Echonan di Apostel 12 - Papantla Totonac bible

Echonan di Apostel 12

¹Mas o menos na e tempu ei rei Herodes a tira man riba algun hende di iglesia pa maltrata nan.

²I el a laga mata Santiago, ruman di Juan, ku spada.

³I ora ku el a mira ku esaki tabata agrada e hudiunan, el a sigui i a aresta Pedro tambe. Awor tabata e dianan di e Fiesta di Pan Sin Zurdeg.

⁴I ora ku el a gar'e, el a ser'e den prizon, i a entregu'e na kuater grupo di kuater solda kada un pa tene warda riba dje, ku e intenshon di tres'e dilanti di e pueblo despues di Pasku.

⁵Asina Pedro a keda sera den prizon, ma e iglesia fervientemente tabata hasi orashon na Dios p'e.

⁶I riba e mesun anochi ku Herodes tabata kier a tres'e dilanti, Pedro tabata drumi na sono meimei di dos solda, mara ku dos kadena. I guardianan dilanti di porta tabata warda e prizon.

⁷I mira, direpiente un angel di Senor a presenta i un lus a ilumina e sel. I el a stot Pedro na su kustia i a lant'e for di sono, bisando: "Lanta lihe." I e kadenanan a kai for di su mannan.

⁸I e angel a bis'e: "Faha bo mes i bisti bo sandalia." I asina Pedro a hasi. I e angel a bis'e: "Lora bo mantel ront di bo kurpa i siguimi."

⁹I el a sali bai pafo i a keda siguie, i e no tabata sa ku loke e angel tabata hasi tabata realidat, ma el a kere ku ta un vishon e tabata mira.

¹⁰I ora nan a pasa e prome i e di dos guardia, nan a yega na e porta di heru ku hende mester pasa pa bai den stat, i esei a habri di mes pa nan. I nan a sali bai pafo i a pasa un kaya, i mesora e angel a bai lagu'e.

¹¹I ora Pedro a bin bei, el a bisa: "Awor mi sa sigur ku Senor a manda Su angel i a reskatami for di man di Herodes i for di tur loke e pueblo hudiu tabata spera."

¹²I ora ku el a realisa kiko a pasa, el a bai kas di Maria, mama di Juan, kende tambe tabata wordu yama Marko, kaminda hopi hende a bin huntu i tabata hasi orashon.

¹³I ora ku el a bati na e porta di pafo, un sirbiente ku yama Rode a bin wak ken t'ei.

¹⁴I ora ku el a rekonose bos di Pedro, di alegria e no a habri e porta di pafo, ma a kore bai paden i a anunsia ku Pedro tabata para na porta.

¹⁵I nan a bis'e: "Bo kabes no ta bon!" Ma el a keda insisti ku t'asina. I nan a keda bisa: "Ta su angel."

¹⁶I Pedro a sigui bati i ora nan a habri porta, nan a mir'e i a keda asombra.

¹⁷Ma el a hasi sena ku su man pa nan keda ketu i a splika nan kon Senor a sak'e for di prizon. I el a bisa: "Bisa Santiago i e rumannan e kosnan aki." I el a sali bai un otro luga.

¹⁸I ora dia a habri, no ta poko beheit tabatin entre e soldanan tokante di kiko por a pasa Pedro.

¹⁹I ora Herodes a busk'e i no a han'e, el a interoga e guardianan i a duna ordu pa laga mata nan. I el a sali di Judea bai Cesarea i a pasa algun tempu ayanan.

²⁰Awor Herodes tabata masha rabia ku e hendenan di Tiro i Sidon. I di un akuerdo nan a bin serka dje, i dor ku ya kaba nan a gana amistat di Blasto, e kamarero di rei, nan tabata pidi pas, pasobra nan tabata depende di rei su pais pa nan kuminda.

²¹I riba un dia stipula Herodes, bisti na su pana di rei, a bai sinta riba su trono i a kuminsa tene un diskurso pa nan.

²²I e hendenan tabata grita: "Ta bos di un dios i no di un hende!"

²³I mesora un angel di Senor a dal e, pasobra e no a duna Dios e gloria, i bichi a kom'e i el a muri.

²⁴I e palabra di Dios a sigui krese i a multiplika.

²⁵I Barnabas i Saulo a bolbe for di Jerusalem despues ku nan a kaba di kumpli ku nan ministerio, i nan a hiba Juan, kende tambe tabata wordu yama Marko, huntu ku nan.