Read Papantla Totonac Echonan di Apostel 14 Bible Online

Echonan di Apostel 14 - Papantla Totonac bible

Echonan di Apostel 14

¹I a sosode ku na Ikonio nan a bai huntu den snoa di e hudiunan i a papia di tal manera ku un gran multitut a kere, tantu di hudiu komo di griego.

²Ma e hudiunan ku no tabata kere tabata instiga i amarga alma di e paganonan kontra e rumannan.

³Pesei nan a keda ayanan pa basta tempu, papiando ku tur frankesa, ku konfiansa den Senor, Kende tabata duna testimonio na e palabra di Su grasia, permitiendo ku milagernan i maraviyanan tabata wordu hasi pa medio di nan man.

⁴Ma e multitut den e stat a keda dividi; i algun tabata na fabor di e hudiunan i algun na fabor di e apostelnan.

⁵I ora tantu e paganonan komo e hudiunan, huntu ku nan gobernantenan, a hasi un intento pa maltrata nan i pa tira nan ku piedra,

⁶nan a hana sa esei i a hui bai na e statnan di Likaonia, esta, Listra i Derbe, i na e region tur ront;

⁷i aya nan a sigui predika e evangelio.

⁸I na Listra tabatin un homber sinta, sin forsa den su pianan, lam for di den barika di su mama, i ku nunka no por a kana.

⁹E homber aki tabata skucha Pablo papia, kende, ora ku el a fiha su bista riba dje i a mira ku e tabatin fe pa wordu kura,

¹⁰a bisa na bos haltu: "Lanta para regt riba bo pia." I el a bula lanta i a kuminsa kana.

¹¹I ora ku e multitutnan a mira loke Pablo a hasi, nan a halsa nan bos i a bisa na lenga likaonika: "E diosnan a hana forma di hende i a baha bin serka nos."

¹²I nan a yama Barnabas Jupiter, i Pablo nan a yama Merkurio, pasobra e tabata esun ku ta hiba palabra.

¹³I e saserdote di Jupiter, kende su tempel tabata keda djis pafo di stat, a trese bueynan i koronanan di flor na e portanan di stat, i kier a hasi sakrifisio huntu ku e multitutnan.

¹⁴Ma ora ku e apostelnan Barnabas i Pablo a tende di esaki, nan a sker nan pana i a kore bai den e multitut, na gritu,

¹⁵bisando: "Hombernan, pakiko boso ta hasi e kosnan aki? Nos tambe ta hende di e mesun naturalesa ku boso, i ta predika evangelio na boso, pa boso laga e kosnan bano aki i komberti na e Dios bibu, Kende a traha shelu i tera i laman, i tur loke tin den nan.

¹⁶I den e generashonnan pasa El a permit! tur e nashonnan sigui nan mes kamindanan;

¹⁷i tog E no a laga Su mes sin testimonio, dor ku El a hasi bon i a manda awaseru for di shelu i tempu di bon kosecha pa boso, i a satisfase boso kurason ku kuminda i alegria."

¹⁸I ounke nan tabata papia asina, apenas nan por a stop e multitutnan di ofrese sakrifisio na nan.

¹⁹Ma a bin hudiunan for di Antiokia i Ikonio i nan a konvense e multitutnan i a piedra Pablo i a lastr'e sak'e for di stat, keriendo ku e tabata morto.

²⁰Ma ora ku e disipelnan a bin para ront di dje, el a lanta i a bai den stat. I e dia siguiente el a bai Derbe ku Barnabas.

²¹I despues ku nan a predika e evangelio na e stat ei i a hasi hopi hende bira disipel, nan a bolbe bai Listra i Ikonio i Antiokia,

²²fortifikando alma di e disipelnan, enkurashando nan pa permanese den fe, bisando: "Dor di hopi tribulashon nos mester drenta e reino di Dios."

²³I despues ku nan a nombra ansianonan pa nan den tur iglesia i a hasi orashon ku yunamentu, nan a enkomenda nan na Senor, den Kende nan a kere.

²⁴I nan a pasa dor di Pisidia i a yega Pamfilia.

²⁵I despues ku nan a predika e palabra na Perge, nan a bai Atalia.

²⁶I for di aya nan a nabega bai Antiokia, for di unda nan a wordu enkomenda na e grasia di Dios pa e trabou ku nan a kaba di kumpli kune.

²⁷I ora nan a yega i a yama e iglesia huntu, nan a konta tur loke Dios a hasi ku nan, i ku El a habri un porta di fe pa e paganonan.

²⁸I nan a keda basta tempu serka e disipelnan.