Read Papantla Totonac Echonan di Apostel 16 Bible Online

Echonan di Apostel 16 - Papantla Totonac bible

Echonan di Apostel 16

¹I el a bai Derbe i Listra tambe. I mira, tabatin un disipel ayanan ku yama Timoteo, yu homber di un muhe hudiu ku tabata un kreyente, ma su tata tabata un griego,

²i e rumannan ku tabata na Listra i Ikonio tabata duna bon testimonio di dje.

³Pablo tabata kier pa e homber aki bai kune; i el a tum'e serka dje i a sirkumsid'e pa motibu di e hudiunan ku tabata na e luganan ei, pasobra nan tur tabata sa ku su tata tabata griego.

⁴Awor segun ku nan tabata pasa dor di e statnan, nan tabata duna nan e reglanan ku a wordu dekreta dor di e apostelnan i e ansianonan ku tabata na Jerusalem, pa nan kumpli ku nan.

⁵Asina e iglesianan tabata wordu fortifika den fe, i tabata bira kada dia mas hopi.

⁶I siendo prohibi dor di Spiritu Santu di papia e palabra na Asia, nan a pasa dor di e region di Frigia i Galasia;

⁷i ora nan a yega Misia, nan a trata di bai Bitinia, ma e Spiritu di Jesus no a permiti nan;

⁸i pasando Misia, nan a baha bai Troas.

⁹I den anochi Pablo a hana un vishon: un homber di Masedonia tabata para su dilanti i tabata rogu'e, bisando: "Bin Masedonia i yuda nos."

¹⁰I ora ku el a mira e vishon, mesora nos a trata di bai Masedonia, pasobra nos a bin na e konklushon ku Dios a yama nos pa predika evangelio na nan.

¹¹Pesei, nabegando for di Troas, nos a bai largu Samotrasia i su siguiente dia Neapolis;

¹²i for di einan pa Filipos, kual ta e stat prinsipal di e distrikto di Masedonia, un kolonia romano; i nos a keda algun dia den e stat aki.

¹³I riba dia di Sabat nos a sali pafo di e porta di stat bai banda di un riu, kaminda nos a supone ku tabatin un luga pa hasi orashon; i nos a kai sinta i a kuminsa papia ku e muhenan ku a reurn.

¹⁴I un muhe ku yama Lidia, di e stat Tiatira, un bendedo di tela purpura, un adorado di Dios, tabata skucha; i Senor a habri su kurason pa paga atenshon na e kosnan ku Pablo tabata bisa.

¹⁵I ora ku e i e hendenan di su kas a wordu batisa, el a roga nos, bisando: "Si boso a huzga ku mi ta fiel na Senor, bin mi kas i keda serka mi." I el a konvense nos.

¹⁶I a sosode ku ora nos tabata bai na e luga di hasi orashon a bin topa nos un mucha muhe esklabu ku tabatin un spiritu di adivinashon, kende tabata duna su shonnan hopi ganashi ku miramentu di destino.

¹⁷E tabata sigui Pablo i nos, i tabata grita, bisando: "E hombernan aki ta sirbidonan di e Dios Haltisimo, kendenan ta proklama na boso e kaminda di salbashon."

¹⁸I el a sigui hasi esaki hopi dia largu. Ma Pablo, fada di esei, a bira bisa e spiritu: "Mi ta ordenabo den e nomber di Jesu-Cristo pa sali for di dje!" I mesora el a sali.

¹⁹Ma ora su shonnan a mira ku nan speransa di ganashi a kaba, nan a gara Pablo i Silas i a lastra nan hiba na e plasa dilanti di e outoridatnan,

²⁰i ora nan a hiba nan serka e magistradonan, nan a bisa: "E hombernan aki, siendo hudiu, ta pone nos stat arib'abou,

²¹i ta proklama kustumbernan ku lei no ta permiti nos asepta ni warda, siendo romano."

²²I e multitut a lanta tur huntu kontra nan, i e magistradonan a sker Pablo i Silas nan pana kita for di nan kurpa i a duna ordu pa suta nan ku bara.

²³I despues di a duna nan hopi golpi, nan a tira nan den prizon i a duna e wardado di prizon ordu pa warda nan bon warda;

²⁴i esaki, despues di a risibl un ordu asina, a tira nan den e prizon di mas paden i a sera nan pia na sepa.

²⁵Ma banda di mei anochi Pablo i Silas tabata hasi orashon i tabata kanta himno di alabansa na Dios, i e prezonan tabata skucha nan;

²⁶i direpiente a bin un temblor fuerte, asina ku e fundeshinan di e prizon a wordu sakudi; i mesora tur e portanan a habri i e kadenanan di nan tur a los.

²⁷I ora ku e wardado di prizon a lanta for di sono i a mira e portanan di prizon habri, el a saka su spada i tabata kla pa mata su kurpa, keriendo ku e prezonan a hui.

²⁸Ma Pablo a grita duru, bisando: "No hasi bo mes dano, pasobra nos tur t'aki!"

²⁹I el a pidi pa trese lus i a kore bai paden i, temblando di miedu, el a tira su kurpa abou dilanti di Pablo i Silas,

³⁰i despues ku el a hiba nan pafo, el a bisa: "Senornan, kiko mi mester hasi pa ta salba?"

³¹I nan a bisa: "Kere den Senor Jesus i lo bo ta salba, abo i e hendenan di bo kas."

³²I nan a papia e palabra di Senor kune, i ku tur e hendenan ku tabata den su kas.

³³I na e mesun ora di anochi ei el a bai ku nan pa laba nan heridanan, i el a wordu batisa mesora, e i tur e hendenan di su kas.

³⁴I el a hiba nan su kas i a pone mesa pa nan, i e tabata regosiha grandemente ku e i tur e hendenan di su kas a kere den Dios.

³⁵I ora dia a habri e magistradonan a manda nan polisnan, bisando: "Pone e hombernan ei den libertat."

³⁶I e wardado di prizon a hiba e mensahe aki pa Pablo, bisando: "E magistradonan a duna ordu pa pone boso den libertat. Asina, sali awor i bai na pas."

³⁷Ma Pablo a bisa nan: "Nan a suta nos publikamente sin ningun sorto di sentensia, nos ku ta hombernan romano, i a tira nos den prizon; i awor nan kier saka nos na sekreto? Esei si ku no! Laga nan mes bin saka nos."

³⁸I e polisnan a anunsia e palabranan aki na e magistradonan. I nan a hana miedu ora nan a tende ku nan tabata romano;

³⁹i nan a bin i a roga nan, i ora nan a saka nan afo, nan a keda roga nan pa sali for di e stat.

⁴⁰I nan a sali for di prizon bai kas di Lidia, i ora nan a mira e rumannan, nan a enkurasha nan i a bai.