Read Papantla Totonac Echonan di Apostel 18 Bible Online

Echonan di Apostel 18 - Papantla Totonac bible

Echonan di Apostel 18

¹Despues di e kosnan aki Pablo a sali for di Atenas i a bai Korinto.

²I el a topa un hudiu ku yama Akila, nasi na Ponto, kende resientemente a bin di Italia ku su esposa Prisila, pasobra Claudio a ordena tur hudiu pa sali for di Roma. El a bin serka nan,

³i pasobra e tabatin e mesun ofishi, el a keda serka nan i nan tabata traha huntu; pasobra di ofishi nan tabata trahado di tent.

⁴I tur dia di Sabat e tabata rasona den snoa i tabata trata di konvense hudiu i griego.

⁵Ora Silas i Timoteo a bin for di Masedonia, Pablo a dedika su mes kompletamente na predikamentu di e palabra, dunando testimonio na e hudiunan ku Jesus tabata e Cristo.

⁶Ma ora nan a resisti i a blasfema, el a sakudi su pananan i a bisa nan: "Boso sanger sea riba boso mes kabes! Ami ta limpi. For di awor padilanti lo mi bai serka e paganonan."

⁷I el a sali for di einan i a bai kas di un homber ku yama Justu, un adorado di Dios, kende su kas tabata keda banda di snoa.

⁸I Crispo, e lider di snoa, a kere den Senor huntu ku tur e hendenan di su kas, i hopi di e korintionan, ora nan a tende, a kere i a wordu batisa.

⁹I Senor a bisa Pablo den anochi pa medio di un vishon: "No tene miedu mas, ma sigui papia i no keda ketu;

¹⁰pasobra Mi ta ku bo i ningun hende lo no pone man riba bo pa hasibo dano, pasobra Mi tin hopi hende den e stat aki."

¹¹I el a keda biba einan un ana i seis luna i tabata sina nan e palabra di Dios.

¹²Ma mientras ku Galion tabata prokonsul di Akaya, e hudiunan, di un akuerdo, a lanta kontra Pablo i a hib'e dilanti di tribunal,

¹³bisando: "E homber aki ta konvense hende pa adora Dios kontrario na lei."

¹⁴Ma ora Pablo tabata bai habri su boka, Galion a bisa e hudiunan: " Si tabata trata di un asunto di delito of krimen grave, O hudiunan, lo tabatin motibu pa mi a tolera boso;

¹⁵ma si ta kuestion di palabra i nomber i di boso mes lei, boso mes regla esaki; ami no kier ta hues den e asuntonan aki."

¹⁶I el a kore ku nan for di tribunal.

¹⁷E ora ei nan tur a gara Sostenes, e lider di snoa, i a kuminsa batie dilanti di tribunal. I Galion no a hasi kaso di ningun di e kosnan aki.

¹⁸I despues ku Pablo a keda basta dia mas, el a despedi di e rumannan i a nabega bai Siria, i Prisila i Akila tabata huntu kune. Na Senkrea el a laga korta su kabei, pasobra el a hasi un promesa.

¹⁹I nan a yega Efeso, i el a laga nan einan. Awor e mes a bai den snoa i tabata rasona ku e hudiunan.

²⁰I ora nan a pidie pa keda serka nan pa un temporada mas largu, e no a asepta,

²¹ma a despedi di nan, bisando: "Lo mi bolbe serka boso atrobe, si Dios kier." I el a nabega bai for di Efeso.

²²I ora ku el a yega Cesarea, el a bai kuminda e iglesia i a bai Antiokia.

²³I despues di a keda poko tempu ayanan, el a bai i a pasa konsekutivamente dor di e region di Galasia i dor di Frigia, i tabata fortifika tur e disipelnan.

²⁴Awor un hudiu ku yama Apolos, nasi na Alehandria, un homber elokuente, a bin Efeso; i e tabatin hopi bon konosementu di e Skrituranan.

²⁵E homber aki tabata bon instrui den e kaminda di Senor; i siendo ferviente den spiritu, e tabata papia i sina eksaktamente e kosnan tokante di Jesus, ounke ku e tabata konose solamente e boutismo di Juan;

²⁶i el a kuminsa papia ku tur frankesa den snoa. Ma ora Prisila i Akila a tend'e, nan a hal'e un banda i a splik'e e kaminda di Dios na un manera mas eksakto.

²⁷I ora ku e kier a krusa bai Akaya, e rumannan a enkurash'e i a skirbi e disipelnan pa risibie; i ora ku el a yega, e tabata di gran ayudo pa esnan ku a kere pa medio di grasia;

²⁸pasobra e tabata refuta e hudiunan fuertemente den publiko, mustrando pa medio di e Skrituranan ku Jesus tabata e Cristo.