Read Papantla Totonac Echonan di Apostel 19 Bible Online

Echonan di Apostel 19 - Papantla Totonac bible

Echonan di Apostel 19

¹I a sosode ku mientras Apolos tabata na Korinto, Pablo, despues di su biahe den interior, a yega Efeso, i a kontra ku algun disipel,

²i el a bisa nan: "Boso a risibi Spiritu Santu ora boso a kere?" I nan a bis'e: "No, ni tende nos no a tende ku tin un Spiritu Santu."

³I el a bisa: "Den kiko boso a wordu batisa anto?" I nan a bisa: "Den e boutismo di Juan."

⁴I Pablo a bisa: "Juan tabata batisa ku e boutismo di repentimentu, bisando e pueblo pa kere den Esun ku lo a bin despues di dje, esta, den Jesus."

⁵I ora nan a tende esaki, nan a wordu batisa den e nomber di Senor Jesus.

⁶I despues ku Pablo a pone su mannan riba nan, Spiritu Santu a bin riba nan, i nan a kuminsa papia den lenga i tabata profetisa.

⁷I na tur tabatin mas o menos diesdos homber.

⁸I el a bai den snoa i a sigui papia ku tur frankesa pa tres luna, i tabata rasona i konvense nan tokante di e kosnan di e reino di Dios.

⁹Ma ora ku algun tabata hasi nan kurason duru i tabata bira desobedesido, papiando malu di e Kaminda dilanti di e multitut, el a aleha for di nan i a hiba e disipelnan huntu kune, i tabata rasona tur dia den e skol di Tirano.

¹⁰I esaki a tuma luga dos ana largu, asina ku tur esnan ku tabata biba na Asia a tende e palabra di Senor, tantu hudiu komo griego.

¹¹I Dios tabata hasi milagernan ekstraordinario pa medio di man di Pablo,

¹²asina ku asta nan tabata hiba lensu of lantera di su kurpa pa e hendenan malu, i e enfermedatnan tabata kita for di nan i e spiritunan malu tabata sali for di nan.

¹³Ma tambe algun di e eksorsistanan hudiu, kendenan tabata bai di un luga pa otro, tabata trata di yama e nomber di Senor Jesus riba esnan ku tabatin spiritu malu, bisando: "Mi ta ordenabo pa sali den e nomber di Jesus, Kende Pablo ta predika."

¹⁴I shete yu homber di un tal Skeva, un saserdote prinsipal hudiu, tabata hasi esaki.

¹⁵I e spiritu malu a kontesta i a bisa nan: "Jesus mi konose i mi sa di Pablo, ma ta ken boso ta?"

¹⁶I e homber, den kende e spiritu malu tabata, a bula riba nan i a domina nan tur i a podera di nan, asina ku nan a hui bai for di e kas ei, sunu i herida.

¹⁷I tur, tantu hudiu komo griego, ku tabata biba na Efeso a hana sa di esaki; i temor a bin riba nan tur i e nomber di Senor Jesus a wordu engrandesi.

¹⁸Tambe hopi di esnan ku a kere a sigui bin, i tabata konfesa i revela nan praktikanan.

¹⁹I hopi di esnan ku tabata praktika magia a trese nan bukinan huntu i a kima nan dilanti di tur; i nan a kalkula nan balor i esaki tabata sinkuenta mil pida plata.

²⁰Asina e palabra di Senor tabata krese poderosamente i tabata prevalese.

²¹Awor despues ku e kosnan aki a kaba di sosode, Pablo a propone den spiritu pa bai Jerusalem, despues ku el a pasa dor di Masedonia i Akaya, bisando: "Despues di a bai ayanan, mi mester mira Roma tambe."

²²I despues di a manda dos di su yudadonan, Timoteo i Erasto, na Masedonia, e mes a keda na Asia pa un tempu.

²³I mas o menos den e tempu ei a surgi un lantamentu basta formal enkuanto e Kaminda.

²⁴Pasobra un homber ku yama Demetrio, un plate ku tabata traha tempelnan chikitu di plata di e diosa Artemis, tabata trese basta ganashi pa e hombernan di e ofishi aki;

²⁵el a trese esakinan huntu ku e trahadonan di ofishinan similar i a bisa: "Hombernan, boso sa ku nos prosperidat ta depende di e trabou aki.

²⁶I boso ta mira i ta tende ku no solamente na Efeso, ma na kasi henter Asia e Pablo aki a konvense masha hopi hende, i a hasi nan desvia dor di bisa ku diosnan traha ku man no ta dios.

²⁷I no solamente tin peliger ku e ofishi aki di nos ta wordu desakredita, ma tambe ku e tempel di e gran diosa Artemis ta wordu despresia, i e magnifisensia di esun ku henter Asia i henter mundu ta adora lo wordu despresia."

²⁸Ora nan a tende esaki, nan a yena ku furia i a kuminsa grita, bisando: "Grandi ta Artemis di e efesionan!"

²⁹I e stat a keda yen di konfushon, i di un akuerdo nan a basha bai den e teatro i a lastra e masedonionan Gayo i Aristarko, kompaneronan di biahe di Pablo, bai kune.

³⁰I ora Pablo kier a bai den e multitut, e disipelnan no a lagu'e.

³¹I tambe algun di e ofisialnan di Asia, kendenan tabata su amigu, a manda rogu'e bes tras bes pa no riska bai den e teatro.

³²Asina ta ku algun tabata grita esaki i otro esaya, pasobra e multitut tabata tur konfundi i e mayoria no tabata sa pa ki motibu nan a bin huntu.

³³I nan a saka Alehandro for di e multitut, i e hudiunan a push'e mand'e dilanti. I Alehandro a hasi sena ku su man i kier a defende su mes dilanti di e multitut.

³⁴Ma ora nan a hana sa ku e tabata un hudiu, nan tur a grita den un solo bos komo dos ora largu: "Grandi ta Artemis di e efesionan!"

³⁵Ma despues di a kalma e multitut, e sekretario di stat a bisa: "Hombernan di Efeso, ta ken no sa ku e stat di e efesionan ta wardado di e tempel di e gran diosa Artemis i di e imagen ku a kai for di shelu?

³⁶Komo ku esakinan ta kosnan ku hende no por nenga, boso mester keda kalmo i no hasi nada sin pensa.

³⁷Pasobra boso a trese serka nos e hombernan aki kendenan no ta ni robado di tempel ni blasfemado di nos diosa.

³⁸Asina anto, si Demetrio i e hombernan di ofishi ku ta huntu kune tin keho kontra kualkier hende: ta wordu tern seshon tribunal i tin prokurado; laga nan trese keho kontra otro.

³⁹Ma si boso ta desea kualkier otro kos, esei lo wordu disidi den un reunion legitimo.

⁴⁰Pasobra nos ta kore peliger di wordu akusa di un lantamentu en konekshon ku loke a sosode awe, komo ku di berdat no tin motibu ku nos por duna pa hustifika e reunion desordena aki."

⁴¹I despues di a bisa esaki, el a despedi e reunion.