Read Papantla Totonac Echonan di Apostel 2 Bible Online

Echonan di Apostel 2 - Papantla Totonac bible

Echonan di Apostel 2

¹I ora ku e dia di Pentekoste a yega, nan tur tabata huntu na un luga.

²I direpiente a bin un zonidu for di shelu, manera un bientu violento i fuerte, i esaki a yena henter e kas kaminda nan tabata sinta.

³I nan a mira loke tabata parse lenganan di kandela, kualnan a separa for di otro, i a bai para riba kada un di nan.

⁴I nan tur a wordu yena ku Spiritu Santu i a kuminsa papia den otro lenganan, manera e Spiritu tabata duna nan pa papia.

⁵Awor tabatin hudiu ta biba na Jerusalem, hombernan deboto, for di tur nashon bou di shelu.

⁶I ora nan a tende e zonidu aki, e multitut a kore bin huntu i a keda tur turdi, pasobra kada un tabata tende nan papia den su mes lenga.

⁷I nan a keda asombra i strana, bisando: "Mira, tur esakinan ku ta papia, no ta galileo nan ta?

⁸I kon anto nos kada un ta tende nan papia den nos mes lenga den kual nos a nase?

⁹Partonan i medonan i elamitanan i habitantenan di Mesopotamia, Judea i Kapadosia, Ponto i Asia,

¹⁰Frigia i Pamfilia, Egipto i e distriktonan di Libia, pega ku Sirene, i bishitantenan for di Roma, tantu hudiu komo proselito,

¹¹kretense i arabir--nos ta tende nan den nos mes lenga ta papia di e echonan poderoso di Dios."

¹²I nan tur a keda strana i babuka i tabata bisa otro: "Ta kiko esaki kier men?"

¹³Ma otronan tabata hasi bofon i tabata bisa: "Nan a bebe muchu bina dushi."

¹⁴Ma Pedro a lanta para huntu ku e diesunnan, i na bos haltu el a deklara na nan: "Hombernan di Judea i boso tur ku ta biba na Jerusalem, sabi esaki i pone atenshon na mi palabranan.

¹⁵Pasobra e hombernan aki no ta burachi manera boso ta supone, pasobra ta awor ta nueb'or di mainta;

¹⁶ma esaki ta loke a wordu papia pa medio di profeta Joel:

¹⁷'I lo sosode den e ultimo dianan,' Dios ta bisa, 'ku lo Mi basha di Mi Spiritu riba henter humanidat; i boso yu hombernan i boso yu muhenan lo profetisa, i boso hobennan lo mira vishonnan, i boso ansianonan lo sona sononan;

¹⁸tambe riba Mi sirbidonan, tantu homber komo muhe, lo Mi basha di Mi Spiritu den e dianan ei, i nan lo profetisa.

¹⁹I lo Mi mustra maraviyanan ariba den e shelunan i senalnan abou riba tera, sanger i kandela i nubia di huma.

²⁰Solo lo wordu kambia den skuridat, i luna den sanger, prome ku e dia grandi i glorioso di SENOR bin.

²¹I lo t'asina ku ken ku invoka e nomber di SENOR lo ta salba.'

²²"Hombernan di Israel, skucha e palabranan aki: Jesus di Nazaret, un Homber aproba pa Dios boso dilanti ku milagernan, maraviyanan i senalnan ku Dios a hasi pa medio di djé meimei di boso, manera boso mes sa,

²³e Homber aki, entrega pa medio di e plan predetermina i e konosementu previo di Dios, boso a klaba na krus pa medio di mannan di hombernan malbado i a mat'E.

²⁴I Dios a lant'E, poniendo un fin na e agonia di morto, komo ku tabata imposibel pa E keda tern den su poder.

²⁵Pasobra David ta bisa di djé: 'Semper mi tabata mira SENOR mi dilanti, pasobra E ta na mi man drechi, pa mi no wordu movi.

²⁶Pesei mi kurason tabata kontentu i mi lenga a regosiha; ademas, mi karni tambe lo biba den speransa;

²⁷pasobra lo Bo no entrega mi alma na Hades, ni permit! Bo Santu mira korupshon.

²⁸Bo a mustrami e kamindanan di bida; lo Bo yenami di alegria ku Bo presensia.'

²⁹"Rumannan, ku tur konfiansa mi por bisa boso tokante di e patriarka David, ku el a muri i a wordu dera, i su tumba ta serka nos te dia djawe.

³⁰I asina, pasobra e tabata un profeta i tabata sa ku Dios a primintie bou di huramentu di pone un di su desendientenan riba su trono,

³¹el a mira padilanti i a papia di e resurekshon di e Cristo, ku E no a wordu laga den Hades, ni Su karni no a mira korupshon.

³²E Jesus aki Dios a lanta, di lokual nos tur ta testigu.

³³Pesei, siendo halsa na man drechi di Dios i despues di a risibi for di e Tata e promesa di Spiritu Santu, El a drama esaki, lokual boso ta mira i tende.

³⁴Pasobra no ta David a subi na shelu, ma e mes ta bisa: 'SENOR a bisa mi SENOR: "Sinta na Mi man drechi,

³⁵te ora Mi hasi Bo enemigunan un banki pa Bo pianan."'

³⁶"Asina, laga henter kas di Israel sa sigur ku Dios a hasié tantu Senor komo Cristo--e Jesus aki, Kende boso a krusifika."

³⁷Awor ora nan a tende esaki, nan a wordu konmovi te den profundidat di nan kurason, i a puntra Pedro i e otro apostelnan: "Rumannan, kiko nos mester hasi?"

³⁸I Pedro a kontesta nan: "Repenti, i laga kada un di boso wordu batisa den e nomber di Jesu-Cristo pa pordon di boso pikanan; i boso lo risibi e don di Spiritu Santu.

³⁹Pasobra e promesa ta pa boso i pa boso yunan i pa tur ku ta leu, pa tur esnan ku Senor nos Dios lo yama serka djé."

⁴⁰I ku hopi otro palabra mas el a duna testimonio i a sigui spierta nan, bisando: "Skapa for di e generashon perverso aki!"

⁴¹Asina anto esnan ku a risibi su palabra a wordu batisa; i e dia ei a wordu anadi na nan mas o menos tres mil alma.

⁴²I nan tabata dedika nan mes kontinuamente na e sinansa di e apostelnan i na e komunion ku otro, na e kibramentu di pan i na orashon.

⁴³I a bin temor riba tur alma; i hopi maraviya i senal tabata tuma luga pa medio di e apostelnan.

⁴⁴I tur esnan ku a kere tabata huntu i tabata komparti ku otro tur loke nan tabatin;

⁴⁵i nan tabata bende nan propiedat i poseshonnan i tabata komparti nan ku tur, segun nesesidat di kada un.

⁴⁶I tur dia nan tabata konstantemente di un akuerdo den tempel. Nan tabata bai di kas pa kas i tabata kibra pan, i kome huntu ku alegria i sinseridat di kurason,

⁴⁷alabando Dios. I nan tabata bon mira serka henter e pueblo. I tur dia Senor tabata agrega na e iglesia esnan ku tabata wordu salba.