Read Papantla Totonac Echonan di Apostel 20 Bible Online

Echonan di Apostel 20 - Papantla Totonac bible

Echonan di Apostel 20

¹I despues ku e lantamentu a pasa, Pablo a manda buska e disipelnan i despues di a eksorta nan i di a tuma despedida di nan, el a kohe kaminda pa Masedonia.

²I despues di a pasa dor di e distriktonan ei i di a duna nan hopi enkurashamentu, el a yega Gresia.

³I ayanan el a keda tres luna, i pa motibu ku e hudiunan a traha un komplot kontra dje net ora ku e tabata pa nabega bai Siria, el a disidi di bolbe via Masedonia.

⁴I Sopater di Berea, yu homber di Pirus, i e tesalonisensenan Aristarko i Segundo a kompan'e; i Gayo di Derbe i Timoteo; i Tikiko i Trofimo di Asia.

⁵Ma esakinan a bai dilanti i tabata spera nos na Troas.

⁶I despues di e dianan di Pan Sin Zurdeg, nos a nabega bai for di Filipos i a yega serka nan na Troas den sinku dia; i aya nos a keda shete dia.

⁷I riba e prome dia di siman, ora nos a bin huntu pa kibra pan, Pablo, kende kier a bai su manise, a kuminsa papia ku nan, i el a sigui ku su mensahe te mei anochi.

⁸I tabatin hopi lampi den e sala ariba kaminda nos a bin huntu.

⁹I tabatin un hoben ku yama Eutiko, kende tabata sinta den bentana, i el a pega un sono profundo; i ora Pablo a keda papia asina tantu, sono a podera di dje di tal manera ku el a kai for di e di tres piso, i nan a lant'e morto for djabou.

¹⁰Ma Pablo a baha bai abou, a kai drumi riba dje, i despues di a koh'e den su brasa, el a bisa: "Boso no alarma, pasobra e ta bibu."

¹¹I ora ku el a bai ariba atrobe, el a kibra e pan i a kome, i a keda papia basta ratu ku nan, te ora dia a habri, i asina el a bai.

¹²I nan a bai ku e hoben, bibu, i a keda masha konsola.

¹³Ma nos a bai dilanti na e barku i a hisa bela bai Asos, kaminda nos tabatin intenshon di tuma Pablo na bordo, pasobra asina el a regla e asunto, komo ku e mes tabatin intenshon di bai na pia.

¹⁴I ora ku el a topa nos na Asos, nos a tum'e na bordo i a yega Mitilene.

¹⁵I nabegando for di einan nos a yega e dia siguiente dilanti di Kios, i su manise nos a krusa bai Samos; i e dia siguiente nos a yega Mileto.

¹⁶Pasobra Pablo a disidi di nabega pasa Efeso forbei pa e no tin mester di perde tempu na Asia; pasobra e tabata pura pa, si ta posibel, ta na Jerusalem riba dia di Pentekoste.

¹⁷I for di Mileto el a manda rospondi na Efeso pa yama e ansianonan di iglesia pa bin serka dje.

¹⁸I ora nan a bin serka dje, el a bisa nan: "Boso mes sa for di e prome dia ku mi a pone pia na Asia, kon mi tabata huntu ku boso tur e tempu ei,

¹⁹sirbiendo Senor ku tur umildat i ku lagrima i ku pruebanan ku tabata bin riba mi dor di e komplotnan di e hudiunan;

²⁰kon mi no a laga di deklara nada ku tabata di probecho pa boso i tabata sina boso publikamente i di kas pa kas,

²¹dunando testimonio, tantu na hudiu komo na griego, di repentimentu pa ku Dios i di fe den nos Senor Jesu-Cristo.

²²"I mira, awor mara den spiritu, mi ta na kaminda pa Jerusalem, sin sa kiko lo pasa ku mi ayanan.

²³Solamente mi sa ku na tur stat Spiritu Santu ta dunami testimonio, bisando ku bui i aflikshon ta sperami.

²⁴Ma mi no ta konsidera mi bida di ningun balor, ni komo algu presioso pa mi mes, kontal ku mi por termina e kurso di mi bida i e ministerio ku mi a risibi di Senor Jesus, pa duna testimonio di e evangelio di e grasia di Dios.

²⁵"I awor, mira, mi sa ku boso tur, serka kendenan mi a pasa, predikando e reino di Dios, lo no mira mi kara mas.

²⁶Pesei mi ta testifika na boso riba e dia aki, ku mi ta inosente di e sanger di tur hende.

²⁷Pasobra mi no a laga di deklara na boso henter e proposito di Dios.

²⁸Perkura pa boso mes i pa henter e tou, meimei di kual Spiritu Santu a pone boso komo wardado, pa pastoria e iglesia di Dios, kual El a kumpra ku Su propio sanger.

²⁹Mi sa ku despues ku mi bai, lobo brabu lo drenta meimei di boso, ku lo no tin miserikordia di e tou;

³⁰i for di meimei di boso mes lo lanta hombernan ku ta papia kosnan perverso, pa desvia e disipelnan i hasi nan bai nan tras.

³¹Pesei, sea alerta i korda ku pa un temporada di tres ana di dia i anochi mi no a stop di spierta kada un di boso ku lagrima.

³²"I awor mi ta enkomenda boso na Dios i na e palabra di Su grasia, kual ta kapas pa edifika boso i pa duna boso e erensia entre tur esnan ku ta santifika.

³³Mi no a kudisha plata ni oro ni pana di ningun hende.

³⁴Boso mes sa ku e mannan aki a traha pa mi mes nesesidatnan i pa e nesesidatnan di e hombernan ku tabata huntu ku mi.

³⁵Den tur kos mi a mustra boso ku dor di traha duru asina boso mester yuda e debilnan i korda e palabranan di Senor Jesus, ku E mes a bisa: 'Ta mas bendishona pa duna ku pa risibi.'"

³⁶I ora ku el a kaba di bisa e kosnan aki, el a hinka rudia i a hasi orashon ku nan tur.

³⁷I nan a kuminsa yora duru i a brasa Pablo i a sunch'e bes tras bes,

³⁸masha tristu, spesialmente pa e palabra ku el a papia, ku nan lo no mira su kara mas. I nan a kompan'e bai na e barku.