Read Papantla Totonac Echonan di Apostel 21 Bible Online

Echonan di Apostel 21 - Papantla Totonac bible

Echonan di Apostel 21

¹I a sosode ku ora nos a separa for di nan i a hisa bela, nos a bai largu Kos i su manise Rodas i di einan Patara;

²i ora nos a hana un barku ku tabata di krusa bai Fenisia, nos a subi na bordo i a hisa bela.

³I ora nos a kuminsa mira Cyprus i a laga esaki na man robes, nos a sigui nabega pa Siria i a yega Tiro; pasobra einan e barku mester a deskarga.

⁴I despues di a hana e disipelnan, nos a keda einan shete dia; i nan tabata keda bisa Pablo, pa medio di e Spiritu, pa no bai Jerusalem.

⁵I ora nos dianan ayanan a pasa, nos a bai i a sigui nos biahe, mientras ku nan tur, huntu ku nan esposanan i yunan, a kompana nos te pafo di e stat. I despues di a hinka rudia riba playa i a hasi orashon, nos a despedi di otro.

⁶E ora ei nos a subi na bordo di barku, i nan a bolbe pa nan kas.

⁷I ora nos a termina e biahe for di Tiro i a yega Tolemaida, nos a saluda e rumannan i a keda un dia serka nan.

⁸I su manise nos a sali i a yega Cesarea, i nos a drenta kas di Felipe, e evangelista, kende tabata un di e shetenan, i nos a keda serka dje.

⁹Awor e homber aki tabatin kuater yu muhe birgen, kendenan tabata profeta.

¹⁰I durante di nos estadia ayanan pa un par di dia, un profeta ku yama Agabo a bin for di Judea.

¹¹I el a bin serka nos, a kohe e faha di Pablo i a mara su mes pianan i mannan i a bisa: "Esaki ta loke Spiritu Santu ta bisa: 'Asin'aki e hudiunan na Jerusalem lo mara e homber ku ta dono di e faha aki i lo entregu'e den man di e paganonan.'"

¹²I ora nos a tende esaki, tantu nos komo esnan ku tabata di e luga ei a kuminsa rogu'e pa no bai Jerusalem.

¹³E ora ei Pablo a kontesta: "Pakiko boso ta yora i ta kibra mi kurason? Pasobra mi ta kla, no solamente pa wordu mara, ma asta pa muri na Jerusalem pa e nomber di Senor Jesus."

¹⁴I komo ku e no por a wordu konvensi, nos a keda ketu, bisando: "E boluntat di Senor sea hasi!"

¹⁵I despues di e dianan aki nos a prepara nos mes i a sali pa Jerusalem.

¹⁶I algun di e disipelnan di Cesarea tambe a bin ku nos i a hiba nos serka Mnason di Cyprus, un disipel di hopi tempu, serka kende nos lo a bai hospeda.

¹⁷I ora nos a yega Jerusalem, e rumannan a risibl nos kontentu.

¹⁸I su manise Pablo a bai ku nos serka Santiago, i tur e ansianonan tabata presente.

¹⁹I ora ku el a kaba di saluda nan, el a kuminsa konta nan detayadamente e kosnan ku Dios a hasi den e paganonan pa medio di su ministerio.

²⁰I ora nan a tende esaki, nan a glorifika Dios; i nan a bis'e: "Bo ta mira, ruman, kuantu miles tin entre e hudiunan ku a kere, i nan tur ta yen di zelo pa e Lei;

²¹i nan a tende tokante di bo, ku bo ta sina tur e hudiunan ku ta entre e paganonan pa bandona Moises, bisando nan pa nan no laga sirkumsida nan yunan, ni kana segun e kustumbernan.

²²Kiko mester wordu hasi anto? Nan lo tende sigur ku bo a yega.

²³Pesei, hasi loke nos ta bisabo. Nos tin kuater homber ku a hasi un promesa;

²⁴hiba nan, purifika bo mes huntu ku nan i paga e gastu pa nan laga feita nan kabes; i tur hende lo sa ku nada no ta berdat di loke nan a konta nan di bo, ma ku abo mes tambe ta kana ordenadamente, kumpliendo ku Lei.

²⁵Ma tokante di e paganonan ku a kere, nos a skirbi i a disidi ku nan mester apstene nan mes di karni sakrifika na idolo, di sanger, di loke ta wordu sofoka i di fornikashon."

²⁶E ora ei Pablo a hiba e hombernan, i su manise el a purifika su mes huntu ku nan, a bai den tempel i a anunsia e kumplimentu di e dianan di purifikashon, te ora ku e sakrifisio a wordu ofresi pa kada un di nan.

²⁷I ora ku e shete dianan tabata kasi kumpli, e hudiunan di Asia, ora nan a mir'e den tempel, a kuminsa instiga e multitut i a tira man riba dje,

²⁸gritando: "Hombernan di Israel, bin yuda nos! Esaki ta e homber ku tur kaminda ta predika na tur hende kontra nos pueblo, kontra Lei i kontra e luga aki; i pa kolmo el a trese griegonan tambe den tempel i a profana e luga santu aki."

²⁹Pasobra anteriormente nan a mira Trofimo di Efeso huntu kune den stat, i nan a supone ku ta Pablo a tres'e den tempel.

³⁰I henter stat tabata arib'abou, i e hendenan tabata basha bin huntu; i nan a gara Pablo i a lastr'e hiba pafo di tempel, i mesora e portanan a wordu sera.

³¹I mientras ku nan tabata busk'e pa mata, e komandante di e batayon romano a hana notisia ku henter Jerusalem tabata den konfushon.

³²I mesora el a bai ku algun solda i senturion i a kore bin riba nan; i ora nan a mira e komandante i e soldanan, nan a stop di bati Pablo.

³³E ora ei e komandante a yega serka, a gar'e i a duna ordu pa mar'e ku dos kadena; i el a kuminsa puntra ken e tabata i kiko el a hasi.

³⁴Ma for di den e multitut algun tabata grita esaki, otro esaya, i ora ku pa motibu di e boroto e no por a hana sa ta kiko a pasa, el a duna ordu pa hib'e kazerne.

³⁵I ora ku el a yega na e trapi, a sosode ku e soldanan mester a kargu'e pa motibu di e violensia di e multitut;

³⁶pasobra e multitut di pueblo tabata sigui nan tras, gritando: "Mat'e!"

³⁷I ora nan tabata bai hiba Pablo den kazerne, el a bisa e komandante: "Mi por bisabo algu?" I el a bisa:"Bo sa griego?

³⁸Anto no t'abo ta e egipsio ku poko dia pasa a kousa un lantamentu i ku a hiba e kuater mil matadonan den desierto?"

³⁹Ma Pablo a kontesta: "Mi ta un hudiu di Tarso na Silisia, siudadano di un stat di basta importansia; i mi ta suplikabo, permitimi papia ku e pueblo."

⁴⁰I ora ku el a dun'e permit, Pablo, para riba e trapi, a hasi sena na e pueblo ku su man; i ora ku a keda un silensio profundo, el a papia ku nan na lenga hebreo, bisando: