Read Papantla Totonac Echonan di Apostel 22 Bible Online

Echonan di Apostel 22 - Papantla Totonac bible

Echonan di Apostel 22

¹"Rumannan i tatanan, tende awor kiko mi ta bai bisa na mi defensa."

²I ora nan a tende ku e tabata papia ku nan na lenga hebreo, nan a keda mas ketu ainda. I el a bisa:

³"Mi ta un hudiu, nasi na Tarso di Silisia, ma lanta den e stat aki, eduka na pia di Gamaliel, striktamente segun e lei di nos tatanan, yen di zelo pa Dios, meskos ku boso tur ta awe.

⁴I mi tabata persigui e Kaminda aki te na morto, i mi tabata mara i pone tantu homber komo muhe den prizon,

⁵manera tambe e sumosaserdote i henter e Konsilio di ansianonan por testigua. Di nan mi a risibl kartanan tambe pa e rumannan, i mi a sali bai Damasko pa trese komo prezo na Jerusalem tambe esnan ku tabata ayanan, pa nan wordu kastiga.

⁶"I a sosode ku ora mi tabata na kaminda i serka di yega Damasko banda di merdia, direpiente un lus masha skerpi a lusa for di shelu tur ront di mi,

⁷i mi a kai abou na suela i a tende un bos ta bisami: 'Saulo, Saulo, pakiko bo ta persiguiMi?'

⁸"I mi a kontesta: 'Ta Ken Bo ta, Senor?' "I El a bisami: 'Ami ta Jesus di Nazaret, Kende bo ta persigui.'

⁹I esnan ku tabata huntu ku mi a mira e lus wel, ma no a tende e bos di Esun ku tabata papia ku mi.

¹⁰"I mi a bisa: 'Kiko mi mester hasi, Senor?' "I Senor a bisami: 'Lanta i sigui pa Damasko; i aya nan lo bisabo tur loke a wordu designa pa bo hasi.'

¹¹I komo ku mi no por a mira pa motibu di e klaridat di e lus ei, esnan ku tabata huntu ku mi a guiami na mi man, i mi a yega Damasko.

¹²"I un tal Ananias, un homber deboto segun Lei, kende tabatin bon testimonio serka tur e hudiunan ku tabata biba ayanan,

¹³a bin serka mi, i para banda di mi el a bisami: 'Ruman Saulo, risibi bo bista!' I mesora mi a hisa kara i a mir'e.

¹⁴"I el a bisa: 'E Dios di nos tatanan a skohebo pa konose Su boluntat i pa mira Esun Hustu i pa tende un bos for di Su boka.

¹⁵Pasobra pa tur hende lo bo ta Su testigu di loke bo a mira i tende.

¹⁶I awor, pakiko bo ta tarda? Lanta, i wordu batisa i laba kita bo pikanan, invokando Su nomber.'

¹⁷"I a sosode ku ora mi a bai bek Jerusalem i tabata hasi orashon den tempel, mi a bai den un trans,

¹⁸i mi a mir'E ta bisami: 'Hasi lihe i sali unbes for di Jerusalem, pasobra nan lo no asepta bo testimonio tokante di Mi.'

¹⁹"I mi a bisa: 'Senor, nan mes sa ku mi tabata bai di snoa pa snoa i tabata sera den prizon i bati esnan ku tabata kere den Bo.

²⁰I ora sanger di Bo testigu Esteban tabata wordu drama, mi tambe tabata para einan i a aproba esei i tabata kuida e mantelnan di esnan ku tabata mat'e.'

²¹"I El a bisami: 'Bai! Pasobra lo Mi mandabo leu for di akinan serka e paganonan.'"

²²I nan a skuch'e te na e palabra aki, i e ora ei nan a halsa nan bos i a bisa: "Mata un homber asina kit'e for di riba mundu, pasobra e no mag di keda na bida!"

²³I komo ku nan tabata grita i tira nan mantel for di nan kurpa i tira stof den laira,

²⁴e komandante a duna ordu pa hib'e den kazerne i a ordena pa interogu'e ku sota, pa e por hana sa ta pa ki motibu nan tabata grita asina kontra dje.

²⁵I ora nan a rek e pa mar'e ku faha di kueru, Pablo a bisa e senturion ku tabata para einan: "Lei ta permit! boso suta un homber ku ta un romano i ku no a wordu kondena?"

²⁶I ora ku e senturion a tende esaki, el a bai serka e komandante i a kont'e, bisando: "Kiko bo ta bai hasi? Pasobra ta romano e homber aki ta."

²⁷I e komandante a bin i a bis'e: "Bisami, ta romano bo ta?" I el a bisa: "Si."

²⁸I e komandante a kontesta: "Ami a kumpra e siudadania aki pa un suma grandi di plaka." I Pablo a bisa: "Ma ami ta un siudadano di nasementu."

²⁹Pesei esnan ku tabata bai interogu'e a kita bai lagu'e mesora; i e komandante tambe a spanta ora ku el a hana sa ku Pablo tabata un romano i ku el a laga mar'e na kadena.

³⁰Ma e siguiente dia, komo ku e kier a hana sa sigur pakiko e hudiunan tabata akus'e, el a pon'e den libertat, i a ordena e saserdotenan prinsipal i henter e Konsilio pa reuni. I el a hiba Pablo ayanan i a pon'e nan dilanti.