Read Papantla Totonac Echonan di Apostel 23 Bible Online

Echonan di Apostel 23 - Papantla Totonac bible

Echonan di Apostel 23

¹I Pablo, fihando su bista riba e Konsilio, a bisa: "Rumannan, mi a biba ku un konsenshi limpi dilanti di Dios te dia djawe."

²I e sumosaserdote Ananias a duna ordu na esnan ku tabata para banda di Pablo pa dal e den su boka.

³E ora ei Pablo a bis'e: "Dios lo dal bo, abo muraya blancha! Anto abo ta sinta einan pa huzgami segun Lei, i kontra Lei bo ta duna ordu pa dal mi?"

⁴I esnan ku tabata para einan a bisa: "Ta insulta bo ta insulta e sumosaserdote di Dios?"

⁵I Pablo a bisa: "Mi no tabata sa, rumannan, ku e tabata sumosaserdote; pasobra ta para skirbi: 'No papia malu di un gobernante di bo pueblo.'"

⁶Ma ora Pablo a ripara ku un parti tabata saduseo i e otro parti, fariseo, el a grita den e Konsilio: "Rumannan, mi ta un fariseo, yu di fariseonan; mi ta wordu huzga pa motibu di e speransa i resurekshon di e mortonan!"

⁷I ora ku el a bisa esaki, a surgi desunion entre e fariseonan i e saduseonan; i e multitut a keda dividi.

⁸Pasobra e saduseonan ta bisa ku no tin resurekshon, ni angel, ni spiritu; ma e fariseonan ta kere den tur dos.

⁹E ora ei a surgi un gritamentu formal; i algun di e eskribanan, di partido di e fariseonan, a lanta para i a kuminsa diskuti fuertemente, bisando: "Nos no ta hana nada malu den e homber aki; ma si ta un spiritu of un angel a papia kune, laga nos no bringa Dios."

¹⁰I ora ku e desunion tabata bira mas i mas grandi, e komandante tabatin miedu ku Pablo lo a wordu kuartisa dor di nan i a duna ordu pa e trupanan bin sak'e for di meimei di nan, hib'e den kazerne.

¹¹I e anochi siguiente Senor a para banda di dje i a bisa: "Tene kurashi, pasobra meskos ku bo a duna testimonio di Mi kousa na Jerusalem, asina bo tin ku duna testimonio na Roma tambe."

¹²I ora dia a habri, e hudiunan a traha un komplot i a mara nan mes na un huramentu, bisando ku nan lo no kome ni bebe te ora ku nan mata Pablo.

¹³I nan tabata mas ku kuarenta ku a traha e komplot aki.

¹⁴I nan a bin serka e saserdotenan prinsipal i e ansianonan i a bisa: "Nos a mara nos mes na un huramentu solem pa no gasta nada te ora nos mata Pablo.

¹⁵Awor anto boso, huntu ku e Konsilio, manda bisa e komandante pa tres'e serka boso, komo si fuera ta un investigashon mas profundo boso lo tabata bai hasi tokante di dje; i nos, di nos parti, ta kla pa mat'e prome ku e yega."

¹⁶Ma yu homber di Pablo su ruman muhe a tende di nan trampa, i a bai den kazerne i a konta Pablo.

¹⁷I Pablo a yama un di e senturionnan bin serka dje i a bisa: "Hiba e hoben aki serka e komandante, pasobra e tin algu di bis'e."

¹⁸Asina el a bai kune i a hib'e serka e komandante. I e senturion a bisa: "Pablo, e prezo, a yamami i a pidimi pa trese e hoben aki serka bo, komo ku e tin algu di bisabo."

¹⁹I e komandante a koh'e na su man i a hal'e un banda i a puntr'e: "Ta kiko bo tin di bisami?"

²⁰I el a bisa: "E hudiunan a bin na akuerdo pa pidibo trese Pablo manan dilanti di Konsilio, komo si fuera nan tabata bai hasi un investigashon mas profundo tokante di dje.

²¹Ma no kere nan, pasobra mas ku kuarenta di nan ta lur e na skondi. Nan a mara nan mes na un maldishon pa no kome ni bebe te ora nan mat'e; i awor nan ta kla i ta sperando riba bo promesa."

²²Pesei, e komandante a laga e hoben bai i a dun'e ordu: "No konta ni un hende ku bo a bisami e kosnan aki."

²³I el a yama dos di e senturionnan bin serka dje i a bisa: "Prepara dos shen solda pa nueb'or di anochi nan bai Cesarea, i setenta homber riba kabai i dos shen kargado di lansa."

²⁴Nan mester a provee kabai tambe pa pone Pablo ariba i hib'e sano i salvo serka gobernado Felix.

²⁵I el a skirbi un karta ku e kontenido aki:

²⁶Claudio Lisias, Na e ekselentisimo gobernado Felix, Saludo.

²⁷Ora ku e hudiunan a aresta e homber aki i nan tabata bai mat'e, mi a bin riba nan ku e trupanan i a reskat'e, komo ku mi a hana sa ku e tabata un romano.

²⁸I deseando di sa pa kual delito nan tabata akus'e, mi a hib'e na nan Konsilio;

²⁹i mi a hana sa ku nan tabata akus'e riba preguntanan tokante di nan Lei, ma bou di ningun akusashon e no ta merese morto of prizon.

³⁰I ora mi a wordu avisa ku lo tabatin un komplot kontra e homber aki, mi a mand'e serka bo mesora, i tambe a instrui su akusadonan pa trese nan akusashonnan kontra dje bo dilanti.

³¹E soldanan anto, di akuerdo ku ordunan ku nan a risibi, a kohe Pablo, i den anochi nan a hib'e Antipatris.

³²Ma su manise nan a laga e hombernan riba kabai sigui kune i nan mes a bai bek kazerne.

³³I ora esakinan a yega Cesarea nan a entrega e gobernado e karta i a trese Pablo tambe su dilanti.

³⁴I despues ku el a lesa e karta, el a puntra di kual provinsia Pablo tabata; i ora ku el a hana sa ku e tabata di Silisia,

³⁵el a bisa: "Lo mi tendebo ora bo akusadonan tambe yega." I el a duna ordu pa ten'e sera den e Pretorio di Herodes.